NŌMIPA 21
21
Ko e Ikuna‘i ‘o e Kau Kēnaní
1PEA ko Kingi ‘Ālati, ko e ‘eiki Kēnani na‘e nofo ‘i he feitu‘u ko Tonga, na‘a ne fanongo ‘oku ha‘u ‘a ‘Isileli ‘i he hala ‘o e kau asiasi; pea ne tau‘i ‘a ‘Isileli, ‘o ne taki pōpula honau ni‘ihi. 2Pea fai ‘e ‘Isileli kia Sihova ‘enau tukumo‘ui, ‘o pehē, Kapau te ke mātu‘aki tuku mai ‘a e kakai ni ki hoku nima, pea te u faka‘auha ‘enau ngaahi kolo. 3Pea ongo‘i ‘e he ‘Eiki ‘a e lea ‘a ‘Isileli, ‘o ne tuku atu ‘a ha‘a Kēnani; pea nau faka‘auha kinautolu, mo ‘enau ngaahi kolo: pea na‘e ui ‘a e potu ko Hoama (ko Faka‘auha).
Ko e Ngata Palasa
4Pea nau tuku fononga atu mei he mo‘unga ko Hoa ‘i he hala ki he Tahi Kulokula, ko ‘enau ‘alu takai ki he fonua ‘o ‘Ītomi: pea na‘e hoha‘a ‘a e laumālie ‘o e kakai koe‘uhi ko e hala.#Teu 2.1 5Pea lea ‘a e kakai ki he ‘Otua mo Mōsese, Ko ena kuo mo ‘omi ai kimautolu mei ‘Isipite ke mate ‘i he toafa? he ‘oku ‘ikai ha me‘akai, pea ‘oku ‘ikai ha vai; pea ‘oku fakalili‘a ‘emau mo‘ui ki he nge‘esi me‘akai ni.#1 Kol 10.9 6Pea fekau atu ‘e Sihova ki he kakai ha fanga ngata vela, pea nau ‘uusi ‘a e kakai, pea na‘e mate ha fu‘u tokolahi. 7Pea ha‘u ‘a e kakai kia Mōsese, ‘o nau pehē, Kuo mau hia, he kuo mau talakaa‘i ‘a Sihova mo koe; ke ke hū kia Sihova ke ne ‘ave ‘a e fanga ngata meiate kimautolu. Pea hufekina ‘e Mōsese ‘a e kakai. 8Pea folofola ‘a Sihova kia Mōsese, Ngaohi ha‘o ngata vela, ‘o ‘ai ki ha fuka; pea ka pehē, pea ‘ilonga ha taha kuo ‘ūsia te ne sio ki ai, te ne mo‘ui. 9Pea ngaohi ‘e Mōsese ha ngata palasa, ‘o ne ‘ai ki he fuka: pea hili ia, pea ka kuo u‘u ha taha ‘e ha ngata, pea ne fakasio ki he ngata palasa, na‘a ne mo‘ui ai.#2 Tu‘i 18.4; Sioné 3.14
Ko e Hiki ‘a e Kakaí mei he Mo‘unga ko Hōlepí ki he Tele‘a ‘o e Kau Moapé
10Pea tuku fononga atu ‘e ha‘a ‘Isileli, ‘o nau fokotu‘u tēniti ‘i ‘Ōpote. 11Pea nau tuku fononga atu mei ‘Ōpote ‘o nau fokotu‘u tēniti ‘i I‘i-‘apalemi, ‘i he toafa ‘oku ‘i he tafa‘aki ‘o Moape, ‘o tu‘u mei hahake. 12Pea nau fononga mei ai, ‘o fokotu‘u tēniti ‘i he tele‘a ‘o Sēleti. 13Na‘a nau tuku fononga mei ai, ‘o fokotu‘u tēniti ‘i he potu ki kō ‘o ‘Alanoni, ‘a ia ‘oku ‘i he toafa, ‘o ha‘u mei he tafafonua ‘o ha‘a ‘Āmoli, he ko ‘Alanoni ko e kau‘āfonua ‘o Moape ‘i he vaha‘a ‘o Moape mo ha‘a ‘Āmoli. 14‘A ē ā ‘oku lau ai ‘i he Tohi ‘o e ngaahi Tau ‘a Sihova:
‘A Vāhepi ‘i Sufa,
Mo ‘Alanoni, hono ngaahi tele‘a.
15‘Io, ko e lauua ‘o e ngaahi tele‘a
‘Oku hifo ki he nofo‘anga ‘o ‘Ala,
‘O faaki ki Moape, ki hono tafafonua.
16Pea hili ia na‘a nau a‘u ki Pea (ko Vaikeli): ko e vaikeli ia ‘a ia na‘e folofola ai ‘a Sihova kia Mōsese, Fakakātoa mai ‘a e fakataha, pea te u ‘atu ha‘anau vai. 17Toki fai ‘e ‘Isileli ‘a e tau‘a‘alo ni,
Vaikeli ē, puna hake mai!
‘Ē, mou tali ‘o hiva ki ai:
18Vai ne keli ‘e hou‘eiki,
Ne vili ‘e he ngaahi ‘ulu ‘o e kakai
‘Aki ‘a e sēpita, ‘a e me‘a na‘a nau faaki ki ai.
19Pea nau hiki mei he toafa ki Mātani: pea mei Mātani ki Nahalieli, pea mei Nahalieli ki Pāmoti: 20pea mei Pāmoti ki he tele‘a ‘oku ‘i he tuku‘uta ‘o Moape, ko e ‘ulu ‘o Pīsika, ‘a ia ‘oku hanga ki he lala.
Ko e Ikuna‘i ‘o e Ongo Tu‘i ko Sīhoni mo ‘Oki
(Teu 2.26–3.11)
21Pea tuku atu ‘e ‘Isileli ha kau talafekau kia Sīhoni ko e Tu‘i ‘Āmoli, ke fakahā, 22Ka u laka atu mu‘a ‘i ho fonua: ‘e ‘ikai te mau afe ki ha ngoue‘anga, pe ki ha ngoue vaine; ‘e ‘ikai te mau inu hao vaikeli: ko e hala pule‘anga pē#21.22 hala pule‘anga; pe hala ‘o e tu‘i. te mau fou ai, kae‘oua kuo mau laka atu ‘i ho kau‘ā. 23Ka ka ‘ikai tuku ‘e Sīhoni ke laka atu ‘a ‘Isileli ‘i hono kau‘ā; ka ka tānaki ‘e ia hono kakai kotoa, ‘o ne ‘alu atu ki he toafa ke fakafetaulaki kia ‘Isileli, ‘o ne a‘u ki Siahasa: ‘o ne fai tau ai kia ‘Isileli, 24pea taa‘i ia ‘e ‘Isileli ‘aki ‘a e mata ‘o e heletā, ‘o ne puke hono fonua mei ‘Alanoni ‘o a‘u ki Siapoki mo e kau ‘Āmoni: he na‘e kaukaua fau ‘a e kau‘āfonua ‘o ha‘a ‘Āmoni.#21.24 he na‘e kaukaua fau ‘a e kau‘āfonua ‘o ha‘a ‘Āmoni; ‘Oku pehē he ngaahi hiki fuoloa ‘e ni‘ihi: ‘o a‘u ki Siasea ‘i he kau‘āfonua ‘o ‘Āmoni. 25Pea hamu ‘e ‘Isileli ‘a e ngaahi kolo kotoa ko ia: pea nofo ‘a ‘Isileli ‘i he ngaahi kolo ‘o e kau ‘Āmoli, ‘i Hesiponi mo hono ngaahi kolo fakaongo. 26He ko Hesiponi ko e kolo ‘o Sīponi ko e Tu‘i ‘Āmoli, ‘a ia kuo ne tau mo e tu‘i mu‘a ‘o Moape, pea kuo ne to‘o meiate ia hono fonua kotoa, ‘o a‘u ki ‘Alanoni. 27‘A ē ā ‘oku lau ai ‘e he kau maau:
Mou omi ki Hesiponi;
Ke langa mo fokotu‘u ‘a e kolo ‘o Sīhoni:
28He kuo ‘alu atu ha afi mei Hesiponi,#Sel 48.45-46
Ha maama mei he kolo ‘o Sīhoni:
Ko ‘Ala-Moape kuo ne keina#21.28 keina: ‘Oku pehē ‘a e hiki fuoloa ‘e taha; ka ko hono faka-Hepeluú ko e hou‘eiki ‘o. ‘o ‘osi,
‘A e hou‘eiki ‘o Pāmoti-‘Alanoni.
29‘Oiauē koe, Moape!
Kainanga ‘o Kīmosi, kuo ke ‘auha ē!
Kuo ne tuku ngaahi foha ke feholataki,
Mo hono ngaahi ‘ōfefine ke fakapōpula‘i
Ki he Tu‘i ‘Āmoli ko Sīhoni.
30Ka kuo tau fai honau fakamomofi,
Ko Hesiponi kuo ‘auha ki Tīponi,
Kuo tau laiki ‘o a‘u ki Nofa,
Ko e afi kuo a‘u ki Mētepa.#21.30 ‘Oku ‘ikai ke mahino ‘a e veei 30 ‘i he faka-Hepeluú.
31Ko ia, na‘e nofo ‘a ‘Isileli ‘i he fonua ‘o e kau ‘Āmoli. 32Pea fekau atu ‘e Mōsese ke asiasi ‘a Siasea, pea na‘a nau hamu honau ngaahi kolo fakaongo, ‘o kapusi ‘a e kau ‘Āmoli na‘e ‘i ai.
33Pea nau foki ‘o ‘alu hake ‘i he hala ki Pēsani: pea hū ki tu‘a ‘a ‘Oki ko e Tu‘i Pēsani ke ta‘ofi kinautolu, ‘a ia mo hono kakai kotoa, ke fakahoko tau ‘i ‘Etilei. 34Pea folofola ‘a Sihova kia Mōsese, ‘Oua ‘e manavahē kiate ia, he kuo u tuku ki ho nima ‘a ia mo hono kakai kotoa mo hono fonua: pea te ke fai kiate ia ‘o hangē ko ho‘o fai kia Sīhoni ko e Tu‘i ‘Āmoli na‘e nofo ‘i Hesiponi. 35Pea nau taa‘i ia mo hono ngaahi foha mo hono kakai kotoa, ‘o ‘ikai te nau tuku hano toko taha ke hao; pea nau ma‘u hono fonua. 36Pea tuku fononga atu ‘a ha‘a ‘Isileli, ‘o nau fokotu‘u tēniti ‘i he ngaahi potu ‘o ‘Alapā-Moape, ‘i he kauvai ‘o Soatani na‘e hanga ki Sielikō.
Currently Selected:
NŌMIPA 21: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
