NŌMIPA 1
1
Ko e ‘Uluaki Tohi Kakai ‘o e Kakai ‘Isilelí
1PEA folofola ‘a Sihova kia Mōsese ‘i he Toafa ‘o Sainai, ‘i he Tēniti Fe‘iloaki‘anga, ‘i he ‘uluaki ‘aho ‘i hono ua ‘o e māhina, ‘i hono ua ‘o e ta‘u ‘o ‘enau hū mai mei ‘Isipite, ‘o pehē,#Nōm 26.1-51 2Lau ‘a e tokolahi ‘o e fakataha kātoa ‘o ha‘a ‘Isileli, honau fa‘ahinga mo honau ngaahi ‘ulumotu‘a mo honau ngaahi hingoa, ‘a e tangata kotoa pē tāutaha. 3‘O kamata mei he uofulu ta‘u ‘o fai hake, ‘a e ‘Isileli kotoa pē ‘oku tu‘u ‘i he tau: 4ko koe mo ‘Ēlone te mo lau kinautolu, ‘o fakafo‘itau, pea ‘e tokoni kiate kimoua ha tangata mei he matakali takitaha, ha taha ‘oku tu‘ukimu‘a ‘i he ngaahi ‘ulumotu‘a. 5Pea ko e ngaahi hingoa eni ‘o e tu‘unga me‘a ‘e tokoni kiate kimoua: ‘i ha‘a Lūpeni, ko ‘Elisiuli ko e foha ‘o Seteulo. 6‘I ha‘a Simione, ko Selumiela ko e foha ‘o Siulisatai. 7‘I ha‘a Siuta, ko Na‘asoni ko e foha ‘o ‘Aminatape. 8‘I ha‘a ‘Īsaka, ko Nātaniela ko e foha ‘o Sua. 9‘I ha‘a Sepulone, ko ‘Eliapi ko e foha ‘o Hēloni. 10Ko e me‘a ki he hako ‘o Siosifa; ‘i ha‘a ‘Ifalemi, ko ‘Elisama ko e foha ‘o ‘Amihuti; ‘i ha‘a Manase, ko Kāmelieli ko e foha ‘o Petasiuli. 11‘I ha‘a Penisimani, ko ‘Apitani ko e foha ‘o Kiteoni. 12‘I ha‘a Tani, ko ‘Ahiesa ko e foha ‘o ‘Amisatai. 13‘I ha‘a ‘Āseli, ko Pakiela ko e foha ‘o ‘Okelani. 14‘I ha‘a Kata, ko ‘Eliesafe ko e foha ‘o Teuela. 15‘I ha‘a Nafitalai, ko ‘Āhila ko e foha ‘o ‘Einani. 16Ko kinautolu ia na‘e ui mai mei he fakataha, ko e hou‘eiki ‘o e ngaahi matakali kuo nau tutupu ai, pea ko e ngaahi ‘ulu kinautolu ‘o e ngaahi toko afe ‘o ‘Isileli. 17Pea ‘ave ‘e Mōsese mo ‘Ēlone ‘a e tu‘unga me‘a ko ē, ‘a ia kuo ‘osi lau honau hingoa, 18pea nau fakakātoa mai ‘a e fakataha kotoa ‘i he ‘uluaki ‘aho ‘o hono ua ‘o e māhina, pea nau fai ‘a e hohoko, ‘o nau tala honau fa‘ahinga mo honau fāmili mo honau hingoa tāutaha, ‘o kamata mei he uofulu ta‘u ‘o fai hake. 19‘O hangē ko e tu‘utu‘uni ‘a Sihova kia Mōsese, na‘e pehē ‘enau lau kinautolu ‘i he Toafa ‘o Sainai. 20Pea ko e hako ‘o Lūpeni ko e ‘uluaki foha ‘o ‘Isileli, ko honau tohi hohoko, ‘o faka-e-honau-ngaahi fa‘ahinga mo honau ngaahi ‘ulumotu‘a, mo e tohi honau hingoa tāutaha, ‘a e tangata kotoa na‘e uofulu ta‘u ‘o fai hake, ‘a kinautolu kotoa na‘e tu‘u ‘i he tau; 21ko honau tokolahi na‘e lau mei he matakali ‘o Lūpeni ko e toko fā mano mā toko ono afe mā toko nimangeau. 22‘I ha‘a Simione, ko honau tohi hohoko, ‘o faka-e-honau ngaahi fa‘ahinga mo honau ngaahi ‘ulumotu‘a, ko hono kakai na‘e lau mo tohi honau ngaahi hingoa tāutaha, ‘a e tangata kotoa pē na‘e uofulu ta‘u ‘o fai hake, ‘a ia fua pē na‘e tu‘u ‘i he tau; 23ko honau tokolahi na‘e lau mei he matakali ‘o Simione ko e toko nima mano mā toko hiva afe mā toko tolungeau. 24‘I ha‘a Kata, ko honau tohi hohoko, ‘o faka-e-honau ngaahi fa‘ahinga mo ‘ulumotu‘a, mo e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 25ko honau tokolahi na‘e lau mei he matakali ‘o Kata ko e toko fā mano mā toko nima afe mā toko onongeau mā toko nimangofulu. 26‘I ha‘a Siuta, ko honau tohi hohoko, ‘o faka-e-honau-ngaahi fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 27ko honau tokolahi na‘e lau mei he matakali ‘o Siuta ko e toko fitu mano mā toko fā afe mā toko onongeau. 28‘I ha‘a ‘Īsaka, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 29ko honau tokolahi na‘e lau mei he matakali ‘o ‘Īsaka ko e toko nima mano mā toko fā afe mā toko fāngeau. 30‘I ha‘a Sepulone, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 31ko honau tokolahi na‘e lau mei he matakali ‘o Sepulone ko e toko nima mano mā toko fitu afe mā toko fāngeau. 32Ko e me‘a ki he hako ‘o Siosifa; ‘i ha‘a ‘Ifalemi, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 33ko honau tokolahi na‘e lau mei he matakali ‘o ‘Ifalemi ko e toko fā mano mā toko nimangeau. 34‘I ha‘a Manase, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 35ko honau tokolahi na‘e lau mei he matakali ‘o Manase ko e toko tolu mano mā toko ua afe mā toko uangeau. 36‘I ha‘a Penisimani, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 37ko honau tokolahi na‘e lau mei he matakali ‘o Penisimani ko e toko tolu mano mā toko nima afe mā toko fāngeau. 38‘I ha‘a Tani, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e lau ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 39ko honau tokolahi na‘e lau mei he matakali ‘o Tani ko e toko ono mano mā toko ua afe mā toko fitungeau. 40‘I ha‘a ‘Āseli, ko honau tohi hohoko, ‘o faka-e-honau-ngaahi-fa‘ahinga mo ‘ulu motu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 41ko honau tokolahi na‘e lau mei he matakali ‘o ‘Āseli ko e toko fā mano mā toko nimangeau. 42‘I ha‘a Nafitalai, ko honau tohi hohoko, ‘o faka-e-honau-ngaahi-fa‘ahinga mo ‘ulumotu‘a, ‘a e tohi ‘o honau hingoa, ‘o kamata mei he uofulu ta‘u ‘o fai hake, ‘a kinautolu na‘e tu‘u ‘i he tau; 43ko honau tokolahi na‘e lau mei he matakali ‘o Nafitalai ko e toko nima mano mā toko tolu afe mā toko fāngeau. 44Ko kinautolu ia na‘e lau, ‘a ia na‘e lau ‘e Mōsese mo ‘Ēlone mo e hou‘eiki ‘i ‘Isileli, ‘a ia na‘a nau toko hongofulu mā ua, ‘o takitaha fakafofonga ki hono ‘ulumotu‘a. 45Ko ia ko e lau kātoa ‘o ha‘a ‘Isileli ‘i honau ngaahi ‘ulumotu‘a, kamata mei he uofulu ta‘u ‘o fai hake, ‘a e ‘Isileli kotoa na‘e tu‘u ‘i he tau. 46‘Io, ko honau lau kotoa ko e toko ono kilu mā toko tolu afe mā toko nimangeau mā toko nimangofulu.
47Ka ko e kau Līvai na‘e ‘ikai tohi fakataha kinautolu ‘i he lau ‘o e ngaahi matakali fakatupu‘anga. 48He na‘e folofola ‘a Sihova kia Mōsese, ‘o pehē, 49Ka ko e matakali ‘o Līvai ‘e ‘ikai te ke lau, pea ko honau tokolahi ‘e ‘ikai te ke fatu fakataha mo ‘Isileli; 50ka te ke fakanofo ‘a e kau Līvai ke ngāue ki he Tāpanekale Fakamo‘oni‘anga, pea mo hono nāunau kehekehe, mo e me‘a kotoa pē ‘oku kau ai; te nau fua ‘a e Tāpanekale mo hono nāunau kotoa, ‘io, ko e fa‘ahinga ko ia te nau tauhi ia, pea te nau fokotu‘u hanau tēniti ‘o takatakai ki he Tāpanekale. 51Pea ka hiki atu ‘a e Tāpanekale, ‘e veteki ia ‘e he kau Līvai; pea ka pehē ke tu‘u ‘a e Tāpanekale, ‘e fokotu‘u ia ‘e he kau Līvai; pea ko ha kehe ‘oku fakaofi mai ‘e tāmate‘i. 52Pea ‘e fokotu‘u tēniti ‘a ha‘a ‘Isileli takitaha ‘i hono ‘apitanga, pea takitaha ‘i hono fuka ‘o fakakongakau. 53Ka ko e kau Līvai te nau ‘apitanga takatakai ki he Tāpanekale Fakamo‘oni‘anga, ke ‘oua na‘a tō ha houhau ki he fakataha ‘o ha‘a ‘Isileli; pea ‘e fai ‘e he kau Līvai ‘a e tauhi ‘o e Tāpanekale Fakamo‘oni‘anga. 54Pea fai ‘e ha‘a ‘Isileli; hangē ko ia kotoa na‘e tu‘utu‘uni ‘e Sihova kia Mōsese, na‘e pehē ‘enau fai.
Currently Selected:
NŌMIPA 1: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
