NŌMIPA 15
15
Ko e ngaahi Lao ‘o kau ke he Fai Feilaulaú
1PEA folofola ‘a Sihova kia Mōsese, ‘o pehē, 2Lea ki ha‘a ‘Isileli, ‘o tala kiate kinautolu, Ka mou ka hū ki homou fonua nofo‘anga, ‘a ia ‘oku ou foaki kiate kimoutolu, 3pea ‘oku mou teu fai ha feilaulau tutu kia Sihova, pe ko ha feilaulau-mōifua, pe ko ha tāmate manu pē, ko e fakaai ha tukumo‘ui, pe ko e me‘a‘ofa, pe ko ha fai ha kātoanga tu‘utu‘uni, ke feia ha ngangatu fakahōifua kia Sihova ‘aki ha manu mei he fa‘ahinga ko ē mo ē: 4pea ko ia ‘oku ‘a‘ana ‘a e kōpano te ne ‘omi ki he ‘Eiki hono kinaki, ko e vahe hongofulu ‘o e ‘elito‘i mahoa‘a kuo natu ‘aki ‘a e vahefā ‘o e hina lolo. 5Ko e uaine foki mōno kava: te ke teuteu ‘a e vahefā ‘o e hina ki he feilaulau-mōifua, pe ko e tāmate manu, ki he lami takitaha. 6Pea kapau ko e sipi tangata, te ke teuteu mōno kinaki ‘a e vahe hongofulu ‘e ua ‘o e ‘elito‘i mahoa‘a, kuo natu ‘aki ‘a e vahetolu ‘o ha hina lolo: 7pea te ke ‘atu mōno kava ‘a e vahetolu ‘o e hina uaine mo‘o ngangatu fakahōifua kia Sihova. 8Pea ka ko ho‘o teuteu ha pulu ki ha feilaulau-mōifua, pe ko ha tāmate manu, ke fakaai ha tukumo‘ui pe ko ha feilaulau-‘ofa kia Sihova: 9pea te ne ‘atu fakataha mo e pulu mōno kinaki ‘a e vahe hongofulu ‘e tolu ‘o e ‘elito‘i mahoa‘a, kuo natu ‘aki ‘a e vaheua ‘o e hina lolo. 10Pea te ke ‘atu mōno kava ‘a e vaheua ‘o e hina uaine; ko e feilaulau fai‘aki ‘a e afi ia, ko e ngangatu fakahōifua kia Sihova.
11Pea ‘e fai pehē ki he pulu takitaha, pe sipi tangata, pe lami tangata, pe ‘uhiki‘i kosi. 12Pe ko e hā honau tokolahi te mou feia, te mou teuteu pehē ki ai takitaha. 13‘Ilonga ha tupu‘i fonua ‘e pehē ‘ene feia ‘a e ngaahi me‘a ko ia, ‘oka ne ka ‘atu ha feilaulau tutu mo‘o ngangatu fakahōifua kia Sihova. 14Pea ka ‘oku ‘āunofo kiate kimoutolu ha muli, pe ko hai ‘oku ‘i homou lotolotonga ‘o laui to‘utangata, pea ka ‘oku ne pehē ke feia ha feilaulau tutu mo‘o ngangatu fakahōifua kia Sihova; hangē ko ho‘omou fai, ‘e pehē ‘ene fai. 15Ko e me‘a ki he fakataha, ‘e taha pē#15.15 Ko e me‘a… taha pē; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘E taha pē. ‘a e tu‘utu‘uni kiate kimoutolu mo e muli ‘oku ‘āunofo mai, ko e tu‘utu‘uni ta‘engata ki homou ngaahi to‘utangata: hangē ko kimoutolu, ‘e pehē mo e muli ‘i he ‘ao ‘o Sihova. 16‘E taha pē ‘a e lao, pea taha pē ‘a e konisitūtone kiate kimoutolu mo e muli ‘oku ‘āunofo mai.#Lev 24.22
17Pea folofola ‘a e ‘Eiki kia Mōsese, ‘o pehē, 18Lea ki ha‘a ‘Isileli, ‘o tala kiate kinautolu, Ka mou ka a‘u ki he fonua ‘oku ou ‘ave kimoutolu ki ai, 19pea ka faifai pea mou kai ‘a e mā ‘o e fonua, te mou hapai ha feilaulau-hapai kia Sihova. 20Te mou hapai ha keke mei he polopolo ‘o ho‘omou takaonga mā: hangē ko e feilaulau-hapai ‘o e haha‘anga uite, ‘e pehē ho‘omou hapai ē. 21‘E ‘atu kia Sihova, ‘e kimoutolu mo homou ngaahi to‘utangata ‘amui, ha feilaulau-hapai mei he polopolo ‘o ho‘omou takaonga mā.
22Pea ka ai ha‘amou laka hala, ‘o ‘ikai te mou fai hono kotoa ‘o e ngaahi tu‘utu‘uni ko ‘eni, ‘a ia kuo folofola‘aki mai ‘e Sihova kia Mōsese, 23‘io, ‘a e ngaahi me‘a kehekehe kuo tu‘utu‘uni ma‘amoutolu ‘e he ‘Eiki, ‘o fakafai ‘ia Mōsese, ‘o kamata mei he ‘aho na‘a ne tu‘utu‘uni ai, ‘o fai atu ki homou ngaahi to‘utangata; 24pea kapau ko e fai ta‘e‘ilo, ‘o puli mei he fakataha, pea ‘e toki feia ‘e he fakataha ha pulu mui ko e feilaulau-mōifua, mo‘o ngangatu fakahōifua kia Sihova, ai mo hono kinaki mo hono kava, ‘o hangē ko e konisitūtone, pea mo ha kosi tangata mo‘o feilaulau-angahala. 25Pea ‘e fai ‘e he taula‘eiki ha fakalelei ma‘a e fakataha kātoa ‘o ha‘a ‘Isileli, pea ‘e fakamolemole kinautolu; he ko e matavalea ia, pea kuo nau ‘omi ‘enau kōpano ko e feilaulau tutu kia Sihova, mo ‘enau feilaulau-angahala foki kuo nau ‘omi ki he ‘ao ‘o Sihova, ko e holo ‘o ‘enau matavalea. 26Pea ‘e fakamolemole ‘a e fakataha kotoa ‘o ha‘a ‘Isileli mo e muli ‘oku ‘āunofo kiate kinautolu; he ko e me‘a ki he fakataha ko ‘enau matavalea pē.
27Pea ka kuo hia ta‘e‘ilo ‘e ha toko taha, pea te ne ‘omi ha kosi fefine ‘oku taha ta‘u ko ‘ene feilaulau-angahala.#Lev 4.27-31 28Pea ‘e fai ‘a e fakalelei ‘e he taula‘eiki ma‘a e laumālie ‘oku matavalea, he‘ene hia ta‘e‘ilo ‘i he ‘ao ‘o Sihova, ke lava hono fakalelei; pea ‘e fakamolemole ia. 29‘E taha pē ho‘omou lao ki he tupu‘i fonua ‘o ha‘a ‘Isileli pea ki he muli ‘oku ‘āunofo kiate kimoutolu, ki ha taha kuo hia ta‘e‘ilo.
30Ka ko e toko taha ‘oku fai ha me‘a ko ha‘ane paetaku, pe ko e tupu‘i fonua ia, pe ko ha muli, ‘oku ne talakaa‘i ‘a Sihova, pea ‘e tu‘usi ‘a e toko taha ko ia mei he lotolotonga ‘o hono kakai. 31Koe‘uhi ā kuo ne ta‘etoka‘i ‘a e folofola ‘a Sihova, pea kuo ne maumau ‘ene fekau: ‘e mātu‘aki tu‘usi ‘a e laumālie ko ia: te ne fua hono kovi.
Ko e Tangata na‘e Maumau Sāpate
32Pea lolotonga na‘e ‘i he toafa ‘a ha‘a ‘Isileli, tokua na‘e ‘ilo ha tangata ‘oku fai ‘ene okooko ‘i he ‘aho Sāpate. 33Pea ko kinautolu na‘e ‘ilo ‘ene okooko, na‘a nau ‘omi ia kia Mōsese mo ‘Ēlone mo e fakataha kātoa. 34Pea nau tuku le‘ohi ia, koe‘uhi na‘e te‘eki ke mahino pe ko e hā ‘e fai kiate ia. 35Pea folofola ‘a e ‘Eiki kia Mōsese, ‘E mātu‘aki mate tāmate‘i ‘a e tangata: ‘e tolomaka‘i ia ‘e he fakataha kotoa ‘i tu‘a ‘apitanga. 36Pea na‘e ‘ave ia ‘e he fakataha kotoa ki tu‘a ‘apitanga, pea nau tolomaka‘i ia, ‘o ne pekia; ‘o hangē ko e tu‘utu‘uni ‘a Sihova kia Mōsese.
Ko e ngaahi Tu‘utu‘uni ‘o Kau ki he Pao ‘o e Kofu
37Pea folofola ‘a e ‘Eiki kia Mōsese, ‘o pehē, 38Lea ki ha‘a ‘Isileli, ‘o tala kiate kinautolu ke nau ngaohi pao ‘i honau kapa‘i kofu, ‘e kinautolu mo honau ngaahi to‘utangata ‘amui, pea ke nau ai ki he pao ‘o e kapa takitaha ha loufau lanu langi.#Teu 22.12 39Pea ‘e tu‘u ia ma‘amou kaho, ke mou sio ki ai mo manatu ki he ngaahi tu‘utu‘uni kehekehe ‘a e ‘Eiki, ‘o fai ki ai, ‘o ‘oua te mou feafeafe‘aki he muimui ki he loto ‘omoutolu, mo homou mata, ‘a ia ‘oku mou fa‘a muimui tango ki ai: 40koe‘uhi ā ke mou manatu ke fai ‘eku ngaahi fekau kotoa pē, pea ke mou tāpuhā ki homou ‘Otua. 41Ko Sihova au ko homou ‘Otua, ‘a ia na‘a ku fakahū mai kimoutolu mei ‘Isipite ke nofo ko homou ‘Otua. Ko au Sihova ko homou ‘Otua.
Currently Selected:
NŌMIPA 15: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
