NŌMIPA 14
14
Ko Lāunga ‘a e Kakaí
1PEA hiki ‘e he fakataha ‘enau fu‘u fākafoa; pea tangi ‘a e kakai ‘i he pō ko ia. 2Pea lāunga ‘a ha‘a ‘Isileli kātoa kia Mōsese mo ‘Ēlone; pea na‘e pehē kiate kinaua ‘e he fakataha kātoa, Taumaiā na‘a mau mate ‘i ‘Isipite! Pe taumaiā na‘a mau mate ‘i he toafa ni! 3Pea ko e hā kuo ‘omi ai kimautolu ‘e Sihova ki he fonua ni ke mau tō ‘i he heletā, kae taki pōpula homau uaifi mo e fānau? ne mei lelei mu‘a ‘etau foki ki ‘Isipite? 4Pea nau fepehē‘aki, Tau fokotu‘u hatau kapiteni, ‘o tau foki ki ‘Isipite.
5Pea tō fo‘ohifo ‘a Mōsese mo ‘Ēlone ‘i he ‘ao ‘o e fu‘u fakataha ‘o ha‘a ‘Isileli kuo kātoa mai. 6Pea ko Siosiua ko e foha ‘o Nuni mo Kēlepi ko e foha ‘o Sīfune, ‘a ia na‘e ‘i he kau asiasi, na‘a na hae hona kofu; 7‘o na lea ki he fakataha kotoa ‘o ha‘a ‘Isileli, ‘o pehē, Ko e fonua na‘a mau ‘alu atu ai hono asiasi ko e fonua lelei ‘aupito ‘aupito. 8Kapau ‘e hōifua ‘a e ‘Eiki kiate kitautolu te ne fakahū kitautolu ki he fonua ni, pea te ne foaki kiate kitautolu; ko e fonua ‘oku mahutafea ‘i he hu‘akau mo e honi. 9Kehe ke ‘oua te mou angatu‘u kia Sihova, pea ‘oua te mou manavahē ki he kakai ‘o e fonua ko ē; he ko ‘etau me‘akai kinautolu; kuo hiki honau malumalu meiate kinautolu, pea ko e ‘Eiki ‘oku ‘iate kitautolu: ‘oua te mou manavahē kiate kinautolu.#Hep 3.16 10Ka ka pehē ‘e he fakataha kotoa ke tolomaka‘i kinaua, mo e hā ‘a e kolōlia ‘o e ‘Eiki ‘i he Tēniti Fe‘iloaki‘anga, ‘o e‘a ki ha‘a ‘Isileli kātoa.
Ko e Hūfia ‘e Mōsese ‘a e Kakaí
11Pea folofola ‘a Sihova kia Mōsese, ‘E tuku ‘afē ‘a e ta‘etoka‘i au ‘e he kakai ni? Ko futu mo e ‘ikai te nau tui kiate au, neongo e ngaahi fu‘u mana kuo u fai ‘i honau lotolotonga? 12Ka u taa‘i kinautolu ‘aki ha mahaki faka‘auha, ‘o hifo mei honau tu‘unga; ka u ngaohi koe ko e kakai lahi mo mālohi ‘iate kinautolu.
13Pea fakatau folofola ange ‘e Mōsese ki he ‘Eiki, Pea tā ‘e fanongo ki ai ‘a e kakai ‘Isipite, he na‘a ke ‘omi ‘a e kakai ni mei honau lotolotonga ‘aki ho māfimafi;#‘Eki 32.11-14 14pea te nau tala ki he nofo he fonua ni. Kuo nau fanongo ko koe, Sihova, ‘oku ‘i he lotolotonga ‘o e kakai ni; tokua ko e femātaaki ho‘o hā, Sihova, kiate kinautolu, pea ko ho ‘Ao ē ‘oku malu ‘aki kinautolu, pea ‘oku ke hā‘ele mu‘omu‘a kiate kinautolu, ‘i ha pou-‘ao, ‘aho, mo e pou-afi, po‘uli. 15Pea kapau leva te ke tāmate‘i ‘a e kakai ni ‘aki ha fo‘i tā, pea ko e ngaahi kakai kuo fanongo ki ho ongoongo te nau lea, ‘o pehē, 16Koe‘uhi ā na‘e ‘ikai lava ‘e Sihova ke fakahū ‘a e kakai ki he fonua na‘a ne fuakava ai kiate kinautolu, ko hono ō ia kuo ne tāmate‘i ai kinautolu ‘i he toafa. 17Ko ia, tauange ā ke kaukaua ‘a e ivi ‘o ‘Ātonai, ‘o hangē ko e folofola na‘a ke fai, ‘o pehē, Ko Sihova Tuai-ki-he-houhau, pea Fonu-‘i-he-kelesi. 18‘Oku ne fakamolemole ‘a e kovi mo e talangata‘a, kae ‘ikai ‘aupito te ne faka‘atā ‘a e halaia. ‘Oku ne ‘eke ‘a e kovi ‘a e mātu‘a ki he fānau, ‘o a‘u ki he tolu mo e faa‘i to‘utangata.#‘Eki 20.5-6; 34.6-7; Teu 5.9-10; 7.9-10 19Fakamolemole mu‘a ‘a e kovi ‘a e kakai ni, ‘o taau mo ho‘o mohu kelesi, pea ke hoa mo ho‘o fa‘a fakamolemole, talu mei ‘Isipite ‘o a‘u mai ki heni.
20Pea folofola ‘a Sihova, Kuo u fakamolemole ‘o hangē ko ho‘o lea; 21kae tangi ‘eku mo‘ui mo e pau ke fonu ‘a māmani kātoa ‘i he lāngilangi ‘o e ‘Eiki!#Hep 3.18 22Ko e kau tangata kuo mamata ki hoku lāngilangi, mo e ngaahi me‘a fakaofo na‘a ku fai ‘i ‘Isipite mo e toafa, ka kuo nau ala‘aki mai tātu‘ohongofulu, ‘o ‘ikai te nau tokanga ki hoku le‘o– 23tangi ‘eku mo‘ui ha‘anau sio ki he fonua na‘a ku fuakava ai ki he‘enau ngaahi kui; ‘io, ‘e ‘ikai mamata ki ai ‘e ha taha ‘iate kinautolu kuo ta‘etoka‘i au: 24ka ko ‘eku tamaio‘eiki ko Kēlepi, ko e me‘a ‘i he kehe ‘a e laumālie na‘e ‘iate ia, mo ‘ene molomolomuiva‘e mai ‘iate au; ko ia te u fakahū ia ki he fonua na‘a ne ‘alu ki ai, pea ‘e tofi‘a ‘aki ‘e hono hako.#Sios 14.9-12 25Pea ko eni, ko ha‘a ‘Amaleki mo ha‘a Kēnani ‘oku nau nofo ‘i he talalo ko ē: mou foki ā ‘apongipongi, ‘o afe atu ki he toafa ‘i he hala ‘o e Tahi Kulokula.
Ko e Tautea ‘e he ‘Otuá ‘e e Kakaí ko ‘enau Lāungá
26Pea folofola ‘a Sihova kia Mōsese pea kia ‘Ēlone, ‘o pehē, 27Ko futu ‘eku kātaki ‘a e fakataha kovi ni, ‘a kinautolu na ‘oku lāunga mai kiate au: kuo u ongo‘i ‘a e mumuhu ‘a ha‘a ‘Isileli ‘oku nau fai kiate au. 28Tala kiate kinautolu ko e folofola ē ‘a Sihova, Tangi ‘eku mo‘ui te u fai kiate kimoutolu ‘o hangē ko ho‘omou lea kuo tau mai ki hoku telinga! 29‘E tō homou ngaahi ‘anga‘anga ‘i he toafa ni; ‘io, ko kimoutolu na‘e lau, ‘a kimoutolu kotoa pē na‘e tohi, ‘o kamata meiate ia na‘e uofulu ta‘u ‘o fai hake, ‘a ia kuo mou lāunga kiate au;#Hep 3.17 30tangi ‘eku mo‘ui ha‘amou hū ki he fonua, ‘a ia na‘a ku hiki ai hoku nima ke tuku mo‘omou nofo‘anga; ko Kēlepi pē ko e foha ‘o Sīfune, mo Siosiua ko e foha ‘o Nuni. 31Ka ko ho‘omou tamaiki, ‘a ia na‘a mou pehē ‘e taki pōpula kinautolu, te u fakahū ki ai, pea te nau ‘ilo fonua na‘a mou fakafisi ki ai. 32Ka ko e me‘a kiate kimoutolu, ‘e tō homou ‘anga‘anga ‘i he toafa ni. 33Pea ko ho‘omou fānau ‘e hiki holo ‘o hangē ha tauhi sipi ‘i he toafa ni, ‘o fāngofulu ta‘u; pea te nau fuesia ho‘omou fe‘auaki, kae‘oua ke ‘osi‘osingamālie homou ‘anga‘anga ‘i he toafa.#Ngā 7.36 34‘E fai ki he lau ‘o e ngaahi ‘aho ‘o ho‘omou asiasi ‘a e fonua, ko e ‘aho ‘e fāngofulu, ‘o lau ‘a e ‘aho takitaha ko e ta‘u: te mou fua ho‘omou kovi ‘o fāngofulu ta‘u, pea te mou ‘ilo kuo u hanga kehe. 35Ko au Sihova kuo u lea, Ko au ē te u fai ‘a e me‘a ni ki he fakataha kovi ni kātoa, ‘a ia kuo fakatefua mai ke tu‘u kiate au; he ko e toafa ni te nau ‘osi ai, pea te nau pekia ai.
36Pea ko e tu‘unga tangata na‘e fekau atu ‘e Mōsese ke asiasi ‘a e fonua, ‘a ia na‘a nau foki ‘o fakatupu ‘a e lāunga ‘a e fakataha kiate ia, he‘enau fakaongo kovi ‘a e fonua; 37‘io, ko e tu‘unga me‘a na‘a nau ‘omi ‘a e ongoongokovi ‘o e fonua, na‘a nau mate fakafokifā ‘i he mahaki ‘i he ‘ao ‘o e ‘Eiki. 38Ka ko Siosiua ko e foha ‘o Nuni mo Kēlepi ko e foha ‘o Sīfune na‘e mo‘ui; ko kinaua pē ‘i he kakai na‘e ‘alu ke asiasi ‘a e fonua.
Ko e ‘Uluaki ‘Ahi‘ahi ke Ma‘u ‘a e Fonuá
(Teu 1.41-46)
39Pea ‘a‘au ‘e Mōsese ‘a e ngaahi lea ko ia ki ha‘a ‘Isileli kātoa, pea na‘e mamahi lahi ‘a e kakai. 40Pea nau tu‘u hengihengi hake, ‘o nau ‘alu hake ki he tumutumu ‘o e mo‘unga, ‘o nau pehē, ‘Oku tau ‘i heni; pea tau ‘alu hake mu‘a ki he potu kuo folofola ki ai ‘a Sihova: he kuo tau hia.
41Pea lea ange ‘e Mōsese, Ko e hā eni ‘oku mou hiki mei he fekau ‘a Sihova? He tala‘ehai ‘e sia‘a? 42‘Oua te mou ‘alu hake; he ‘oku ‘ikai ‘i homou lotolotonga ‘a Sihova; na‘a te‘ia kimoutolu ‘i he ‘ao ‘o homou ngaahi fili. 43He ko ha‘a ‘Amaleki mo ha‘a Kēnani ena ‘oku hanga mai, pea te mou tō ‘i he heletā: he ko e me‘a ‘i ho‘omou foki mei he muimui kia Sihova, ko ia ‘e ‘ikai ‘iate kimoutolu ‘e Sihova.
44Ka na‘a nau fakata‘emālū‘ia, ‘o ‘alu atu ki he tumutumu ‘o e mo‘unga; ka ko e ‘A‘ake ‘o e Kovinānite ‘o e ‘Eiki pea mo Mōsese na‘e ‘ikai te na hiki mei he ‘apitanga. 45Pea ‘alu hifo ‘a ha‘a ‘Amaleki mo ha‘a Kēnani na‘e nofo ‘i he mo‘unga ko ia, ‘o nau te‘ia kinautolu mo laiki, ‘o a‘u ki Hoama.
Currently Selected:
NŌMIPA 14: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
