NŌMIPA 16
16
Ko e Angatu‘u ‘a Kola mo Tētani
1PEA ko Kola ko e foha ‘o ‘Īsa‘a ko e foha ‘o Kōhate ko e foha ‘o Līvai, na‘a ne fa‘ufa‘ufono mo Tētani mo ‘Apilami ko e hako ‘o ‘Eliapi, pea mo ‘Oni ko e foha ‘a Peleti ko e hako ‘o Lūpeni:#Siuta 11 2pea nau tutu‘u ‘i he ‘ao ‘o Mōsese fakataha mo e tu‘unga me‘a mei ha‘a ‘Isileli, ko e toko uangeau mā nimangofulu ‘i he hou‘eiki ‘o e fakataha, ha ni‘ihi na‘e ui ki ai, ko e kau tangata ‘ilonga: 3pea nau fakataha mai ke fai mo Mōsese mo ‘Ēlone, ‘o nau pehē kiate kinaua, Kuo mo ‘afungi fau, he ‘oku tāpuhā kotoa pē ‘a e fakataha kotoa, pea ‘oku ‘afio ‘a Sihova ‘i honau lotolotonga: pea ko ho‘omo fakamahiki kimoua ‘i he fakataha ‘a e ‘Eiki koe‘uma‘ā?
4Pea ‘i he fanongo ki ai ‘e Mōsese na‘a ne tō fo‘ohifo: 5pea ne lea kia Kola mo ‘ene kau kātoa, ‘o pehē, ‘E fakae‘a ‘e Sihova ‘apongipongi pe ko hai ‘oku ‘o‘ona, mo ia ‘oku tāpuhā pea ngofua ke ofi kiate ia: pea ko ia ‘oku ne fili ki ai ‘e ngofua ke ofi kiate ia. 6Mou fai eni; to‘o ha‘amou ‘ainga malala, ‘a Kola mo ‘ene kau kotoa; 7pea mou ‘ai ki ai ha afi ‘apongipongi, ‘o hili ha ‘inisēnisi ki ai ‘i he ‘ao ‘o Sihova: pea ‘ilonga ha tangata ‘e fili ‘e Sihova ko e tāpuhā ia: ko kimoutolu ‘oku ‘afungi fau, hako‘i Līvai.
8Pea lea ‘a Mōsese kia Kola, Fanongo mai, hako‘i Līvai: 9‘oku mou pehē koā ko e me‘a si‘i ‘a e vahe‘i kimoutolu ‘e he ‘Otua ‘o ‘Isileli mei he fakataha ‘o ‘Isileli, ke fakaofiofi ki he‘ene ‘Afio ke fai ‘a e ngāue ‘o e Tāpanekale ‘o Sihova, pea ke tu‘u ‘i he ‘ao ‘o e fakataha ‘o fekau? 10‘Io, kuo ne fakaofiofi koe mo ho kāinga kotoa ko ha‘a Līvai: pea ‘oku mou kakapa, ke taula‘eiki foki? 11Ko ia, ko ho‘omou fakatefua mai, ‘a koe mo ho‘o fu‘u kau na, ko e fai kia Sihova; he ko ‘Ēlone, ko e hā ia ke mou lāunga kiate ia?
12Pea fekau atu ‘e Mōsese ke ui mai ‘a Tētani mo ‘Apilami, ko e hako ‘o ‘Eliapi: ka na pehē ‘e kinaua. 13‘E ‘ikai te ma ō hake: ko e me‘a si‘i koā ho‘o ‘omi kimautolu mei he fonua na‘e mahutafea ‘i he hu‘akau mo e honi ke tāmate‘i kimautolu ‘i he toafa, ka ke fai ai pē foki ho‘o fie pule mai? 14Kae‘uma‘ā tala‘ehai kuo ke ‘omi kimautolu ki he fonua ‘oku mahutafea ‘i he hu‘akau mo e honi, pe vahe mai ha ngaahi ngoue‘anga mo ha ngaahi ngoue vaine mōmau tofi‘a. Ko ho‘o fakanenefu‘i koā ‘a e mata ‘o e kau tangata ni?
15‘E ‘ikai te ma ‘alu ange. Pea tuputāmaki ‘aupito ‘a Mōsese, ‘o ne fakatau folofola kia Sihova, ‘o pehē, ‘Oua te ke fofonga ki he‘ena feilaulau: tala‘ehai kuo u to‘o ha‘anau fo‘i ‘asi ‘e taha, pe fai ha momo‘i kovi ki hanau toko taha.
16Pea lea ‘a Mōsese kia Kola, ‘A koe mo ho‘o kau kotoa, ke mou ‘i he ‘ao ‘o Sihova ‘apongipongi; ‘a koe, mo kimoutolu mo ‘Ēlone: 17pea mou takitaha to‘o ‘ene ‘ainga malala, mo ‘ai ‘inisēnisi ki ai, pea mou omi mo kimoutolu ki he ‘ao ‘o Sihova, ‘a e tangata mo ‘ene ‘ainga malala, ko e ‘ainga ‘e uangeau mā nimangofulu; mo koe foki mo ‘Ēlone, te mo takitaha ‘ene ‘ainga malala. 18Pea nau to‘o takitaha ‘ene ‘ainga malala, ‘o ‘ai ki ai ha afi, ‘o nau hilifaki ai ha ‘inisēnisi, pea nau tutu‘u ‘i he mata Tēniti Fe‘iloaki‘anga, pea ‘i ai ‘a Mōsese mo ‘Ēlone. 19Pea ui mai ‘e Kola ‘a e fakataha kotoa ki he mata Tēniti Fe‘iloaki‘anga ke fai mo kinaua–mo e hā ‘a e kolōlia ‘o e ‘Eiki ki he fakataha kotoa. 20Pea folofola ‘a e ‘Eiki kia Mōsese pea kia ‘Ēlone, ‘o pehē, 21Mavahe mai kimoua mei he fakataha na, ka u faka‘osi kinautolu ‘i ha fo‘i kemo.
22Pea na tō fo‘ohifo kinaua, ‘o na pehē, ‘Ēī, ko e ‘Otua ‘o e ngaahi laumālie ‘o e kakai fuli pē, ‘e hia koā ha toko taha, pea ke tuputāmaki ki he fakataha kotoa?
23Pea folofola ‘a Sihova kia Mōsese. 24Lea ki he fakataha, ‘o pehē, Mou hiki mei he feitu‘u takatakai ki he nofo‘anga ‘o Kola, Tētani, mo ‘Apilami.
25Pea tu‘u ‘a Mōsese, ‘o ne ‘alu kia Tētani mo ‘Apilami, pea muimui kiate ia ‘a e mātu‘a ‘o ‘Isileli. 26Pea ne me‘a ki he fakataha ‘o pehē, Mou faka‘atā mu‘a mei he ngaahi tēniti ‘o e kau tangata pau‘u ni, ‘oua ‘e lave ki ha‘anau me‘a, na‘a mou ‘auha ‘i he‘enau ngaahi angahala. 27Ko ia, na‘a nau hiki atu mei he nofo‘anga ‘o Kola mo Tētani mo ‘Apilami mei he potu kotoa pē: pea hū ki tu‘a ‘a Tētani mo ‘Apilami, ‘o nau tutu‘u ‘i hona ngaahi mata tēniti, fakataha mo hona ngaahi uaifi mo hona ngaahi foha mo ‘ena tamaiki.
28Pea lea ‘a Mōsese, Ko e me‘a ko ‘eni te mou ‘ilo ai kuo fekau au ‘e Sihova ke fai ‘a e ngaahi ngāue ni kotoa pē, he tala‘ehai na‘a ku fai ko hoku loto pē. 29He kapau ‘e mate ‘a e tu‘unga me‘a ni ‘o hangē ko e pekia ‘a e kakai kotoa, pea kapau ‘e hoko kiate kinautolu ‘o hangē ko e ‘inasi ‘o māmani kātoa, pea tā kuo ‘ikai fekau au ‘e Sihova. 30Ka ‘o kapau ‘e fai ‘e Sihova ha me‘a fo‘ou, pea fakamanga ‘e he kelekele hono ngutu, ‘o folo ‘a kinautolu mo e me‘a kātoa ‘oku kau ki ai, ‘o nau ‘alu hifo mo‘ui ki lolofonua; pea te mou ‘ilo ai kuo fai pau‘u ‘e he kau tangata ni kia Sihova.
31Pea ‘i he ‘osi leva ‘ene ngaahi lea ko ia, ‘iloange na‘e mafahi ‘a e kelekele na‘a nau tu‘u ai; 32‘io, na‘e mafa‘a ‘e he fonua hono ngutu, ‘o ne folo fua kinautolu mo honau fale mo e kau tangata ‘a Kola, mo ‘enau nga‘oto‘ota kotoa. 33‘Io, ko kinautolu mo ia kotoa pē na‘e kau kiate kinautolu na‘a nau ‘alu hifo mo‘ui ki lolofonua, pea na‘e mapuni ‘a e fonua kiate kinautolu, pea nau mole mei he lotolotonga ‘o e fakataha. 34Pea ko e kau ‘Isileli kotoa na‘e takatakai kiate kinautolu na‘e hola ‘i he‘enau fekekee‘i, he‘enau pehē, Na‘a folo kinautolu foki ‘e he kelekele.
35Pea pā atu ha afi meia Sihova, ‘o keina ‘a e toko uangeau mā nima-ngofulu‘i tangata na‘e to‘o ‘inisēnisi.
Ko e ngaahi ‘Ainga Malala
36Pea folofola ‘a Sihova kia Mōsese, ‘o pehē, 37tala kia ‘Eliesa ko e foha ‘o ‘Ēlone ko e taula‘eiki, ke ne hiko ‘a e ‘ainga malala mei he loto vela, pea ke lingi ‘e koe ‘a e afi ki hē, he ‘oku nau tapu ‘a e ngaahi ‘ainga ‘a e kau mala-fai-e-tangata na: 38pea ke nau tuki ia ‘o ngaohi ‘aki ‘a e ngaahi lau‘i ukamea, ‘o ‘ufi‘ufi ‘aki ‘a e ‘ōlita, he na‘a nau ‘atu ia ‘i he ‘ao ‘o e ‘Eiki, ko ia ‘oku nau tapu ai; pea te nau tu‘u ko e faka‘ilonga ki ha‘a ‘Isileli, 39pea to‘o ‘e he taula‘eiki ko ‘Eliesa ‘a e ngaahi ‘ainga kapa, ‘a ia na‘e ‘atu ‘e he kakai na‘e mōfia; pea nau tuki ke lafalafa ke ‘ufi‘ufi ‘aki ‘a e ‘ōlita: 40ko e me‘a fakamanatu ki ha‘a ‘Isileli, koe‘uhi ke ‘oua na‘a ofi mai ha kehe, ha taha ‘oku ‘ikai ‘i he hako ‘o ‘Ēlone, ke tutu ‘inisēnisi ‘i he ‘ao ‘o Sihova; na‘a ne hangē ko Kola mo ‘ene kau: ‘o tatau mo e folofola ‘a Sihova kiate ia na‘e fakafai ‘ia Mōsese.
Ko e Fakahaofi ‘e ‘Ēlone ‘a e Kakaí
41Ka ‘i he pongipongi hake na‘e lāunga ‘a e fakataha kotoa ‘a ha‘a ‘Isileli kia Mōsese mo ‘Ēlone, ‘o pehē, Kuo mo tāmate‘i ‘a e kainanga ‘a Sihova. 42Pea ‘i he kātoa mai ‘a e fakataha ke fai mo Mōsese mo ‘Ēlone, ‘iloange na‘a nau sio ki he Tēniti Fe‘iloaki‘anga, pea tā ‘oku pulonga ai ‘a e ‘Ao, pea hā ai ‘a e kolōlia ‘o e ‘Eiki. 43Pea ō ‘a Mōsese mo ‘Ēlone ki he mata Tēniti Fe‘iloaki‘anga. 44Pea folofola ‘a Sihova kia Mōsese, ‘o pehē, 45Mo hiki kimoua mei he fakataha ni, ka u faka‘auha kinautolu ‘i ha fo‘i kemo. Ka na‘a na tō fo‘ohifo.
46Pea lea ‘a Mōsese kia ‘Ēlone, To‘o ho‘o ‘ainga malala, ‘o ‘ai ki ai ha afi mei he ‘ōlita, ‘o hili ai ha ‘inisēnisi, ‘o fakahā‘ele ke vave ki he fakataha, pea fai ha fakalelei ma‘anautolu: he kuo pā atu ha houhau meia Sihova; kuo kamata ‘a e mala. 47Pea to‘o ia ‘e ‘Ēlone, ‘o hangē ko e lea ‘a Mōsese, ‘o ne lele ki he lotolotonga ‘o e fakataha; pea tā kuo kamata ‘a e mala ‘i he kakai: pea ne fokotu‘u ha ‘inisēnisi, ‘o ne feia ha fakalelei ma‘a e kakai. 48Pea ne tu‘u ‘i he vaha‘a ‘o e mate mo e mo‘ui; pea na‘e ta‘ofi ‘a e ‘au. 49Pea ko kinautolu na‘e tō ‘i he ‘au ko e toko taha mano mā fā afe mā fitungeau; tukukehe ‘a kinautolu na‘e tō ‘i he me‘a ‘a Kola. 50Pea foki ‘a ‘Ēlone kia Mōsese ki he mata Tēniti Fe‘iloaki‘anga, pea kuo tuku ‘a e ‘au.
Currently Selected:
NŌMIPA 16: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
