NŌMIPA 13
13
Ko e Kau Mataki
(Teu 1.19-33)
1PEA folofola ‘a e ‘Eiki kia Mōsese, ‘o pehē, Fekau atu hao kau tangata ke nau asiasi ‘a e fonua ko Kēnani, ‘a ia kuo u foaki ki ha‘a ‘Isileli: 2ke mou tuku atu ha tangata mei he matakali takitaha, ko e ngaahi fo‘i ‘eiki kotoa pē ‘i honau fa‘ahinga. 3Ko ia na‘e fekau atu kinautolu ‘e Mōsese mei he Toafa ‘o Pēlana ‘i he fekau ‘a Sihova: ko e ngaahi fo‘i ‘eiki kotoa pē kinautolu ‘i ha‘a ‘Isileli, 4pea ko honau hingoa eni: mei he matakali ‘o Lūpeni, ko Samua ko e foha ‘o Sākuli. 5Mei he matakali ‘o Simione, ko Sāfati ko e foha ‘o Holi. 6Mei he matakali ‘o Siuta, ko Kēlepi ko e foha ‘o Sīfune. 7Mei he matakali ‘o ‘Īsaka, ko ‘Īkali ko e foha ‘o Siosifa. 8Mei he matakali ‘o ‘Ifalemi, ko Hosea ko e foha ‘o Nuni. 9Mei he matakali ‘o Penisimani, ko Pāleti ko e foha ‘o Lafu. 10Mei he matakali ‘o Sepulone, ko Katieli ko e foha ‘o Soti. 11Mei he matakali ‘o Siosifa, ‘a e matakali ‘o Manase, ko Kati ko e foha ‘o Susi. 12Mei he matakali ‘o Tani, ko ‘Amieli ko e foha ‘o Kēmali. 13Mei he matakali ‘o ‘Āseli, ko Sētuli ko e foha ‘o Maikeli. 14Mei he matakali ‘o Nafitalai, ko Nā‘api ko e foha ‘o Vōfesi. 15Mei he matakali ‘o Kata, ko Keueli ko e foha ‘o Maki.
16Ko e ngaahi hingoa eni ‘o e tu‘unga me‘a na‘e fekau atu ‘e Mōsese ke asiasi ‘a e fonua. Pea ui ‘e Mōsese ‘a Hosea ko e foha ‘o Nuni ko Siosiua.
17Pea fekau kinautolu ‘e Mōsese ke asiasi ‘a e fonua ko Kēnani, ‘o ne pehē kiate kinautolu, ‘Alu hake pē ‘i he feitu‘u ko Tonga, ‘o fai atu ki he fonua mo‘unga; 18pea vakai ‘a e fonua, pe kuo fēfē; mo e kakai ‘oku nofo ai, pe ‘oku nau mālohi pe vaivai, pe ‘oku nau toko si‘i pe tokolahi; 19mo e fonua ‘oku nau nofo ai, pe ‘oku lelei ia pe kovi; pea fēfē ‘a e ngaahi kolo ‘oku nau nofo ai, pe ko e ngaahi ‘apitanga pē, pe ko e kolotau; 20pe kuo fēfē ‘a e kelekele, pe ‘oku mo‘ui, pe ‘oku kākā, pe ‘oku ‘akau‘ia, pe ‘oku ‘ikai. Pea mou lototo‘a ‘o ‘omi ‘a e fua ‘o e fonua. (Pea ko e fa‘ahi ta‘u ko ia ko e taimi ke polopolo ‘a e kālepi.)
21Ko ia na‘a nau ‘alu hake, ‘o asiasi ‘a e fonua mei he Toafa ‘o Sini ‘o a‘u ki Lēhopi ki he Hū‘anga ki Hēmati. 22Pea ko ‘enau ‘alu na‘e fai ‘i he feitu‘u ko Tonga, ‘o nau a‘u ai ki Hepeloni; pea kuo ‘i ai ‘a ‘Ahimani, Sesai, mo Tali mai, ko e hako ‘o ‘Ānaki. (Pea na‘e langa ‘a Hepeloni ko e ta‘u ‘e fitu ki mu‘a ‘i Soani ‘i ‘Isipite.) 23Pea nau a‘u ki he Tele‘a ‘o ‘Esikoli, pea nau ta ai ha fuhinga kālepi ‘e taha, pea na‘e ha‘amo ‘e ha toko ua; na‘a nau ‘omi pomikānite foki, moni fiki. 24Na‘e fakahingoa ‘a e potu ko ia ko Tele‘a ‘Esikoli (ko Fuhinga)#13.24 ‘Esikoli; Ko e ‘uhinga ‘o e hingoá ni ‘i he lea faka-Hepeluú ko e “fuhinga kālepi”. koe‘uhi ko e fuhinga na‘e tu‘usi mei ai ‘e ha‘a ‘Isileli.
25Pea na‘a nau foki mei he asiasi ‘o e fonua kuo ‘osi ‘a e fāngofulu‘i ‘aho. 26Pea na‘a nau ‘alu ‘o a‘u kia Mōsese mo ‘Ēlone mo e fakataha kātoa ‘o ha‘a ‘Isileli, ki he Toafa ‘o Pēlana ki Kētesi; pea nau tala kiate kinaua mo e fakataha kātoa honau fekau, pea nau ‘ange ‘a e fua ke nau mamata ai. 27Pea nau ‘a‘au kiate ia ‘o pehē, Na‘a mau a‘u ki he fonua na‘a ke fekau kimautolu ki ai, pea tā ‘oku mahutafea ‘i he hu‘akau mo e honi; pea ko hono fua ē. 28Ko hono me‘a pē ‘oku mālohi ‘a e kakai ‘oku nofo‘i ‘a e fonua, pea ‘oku ‘aa‘i ‘a e ngaahi kolo ‘o fu‘u lalahi: kae‘uma‘ā foki na‘a mau mamata ki he hako ‘o ‘Ānaki. 29‘Oku nofo ‘a ‘Amaleki ki he fonua ko Tonga: pea ko e Heti mo e Siepusi mo e ‘Āmoli ‘oku nofo ‘i he fonua mo‘unga: pea ‘oku nofo ‘a e Kēnani ki tahi, pea mo e tafa‘aki ‘o Soatani.
30Pea na‘e lolomi ‘e Kēlepi ‘a e me‘a ‘a e kakai kia Mōsese,#13.30 na‘e lolomi… Mōsese; pe na‘e fakalongoki ‘e Kēlepi ‘a e kakai na‘e haha‘o ‘ia Mōsesé. he‘ene pehē, Tau ‘alu hake leva, ‘o ma‘u ia: he te tau lava noa pē.
31Ka ko e tu‘unga me‘a na‘a nau ō mo ia na‘a nau pehē, ‘E ‘ikai te tau lava ke ‘alu ‘o tau‘i ‘a e kakai, he ‘oku nau mālohi ‘iate kitautolu. 32Pea na‘a nau fakaongokovi ki ha‘a ‘Isileli ‘a e fonua na‘a nau asiasi, he‘enau pehē, Ko e fonua na‘a mau ‘alu atu ai hono asiasi ko e fonua ia ‘oku ne keina ‘a e kakai ‘oku nofo ai; pea ko e kakai kotoa na‘a mau mamata ai ko e kakai lalahi. 33Pea mau mamata ai ki he kau saiāniti ko e hako ‘o ‘Ānaki, ‘a ia ko e hako ‘o e fa‘ahinga lalahi: pea na‘a mau hā kiate kinautolu ko e fanga he‘e pē, pea pehē ‘emau hā kiate kinautolu.#Sēn 6.4
Currently Selected:
NŌMIPA 13: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
