NŌMIPA 11
11
Ko e Potu ko Tāpela
1PEA ko e tō‘onga ‘a e kakai na‘e hangē kuo hoko ha mala, he‘enau fakapū atu ‘enau lāunga kia Sihova: pea ‘i he fanongo ki ai ‘a Sihova, na‘a ne tuputāmaki, pea na‘e pā ‘a e afi ‘a e ‘Eiki kiate kinautolu, ‘o keikeina mei he taupotu ‘o e ‘apitanga. 2Pea tangi ‘a e kakai kia Mōsese; pea ne hufekina kinautolu ki he ‘Eiki, pea ngata ‘a e afi. 3Ko ia na‘e fakahingoa ‘a e potu ko ia ko Tāpela (ko Vela)#11.3 Tāpela; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e vela. koe‘uhi ko e pā kiate kinautolu ‘a e afi ‘a Sihova.
Ko e Fili ‘e Mōsese ha Kau Taki ‘e Toko Fitungofulu
4Pea ko e ‘Isileli tea na‘e ‘i honau lotolotonga na‘a nau mātu‘aki manatu ki he me‘akai: pea ko e kau ‘Isileli foki na‘a nau toe tangi, he‘enau pehē, Ko hai ‘e ‘omi ha‘atau kiki? 5‘Oku mau manatu ki he ika na‘a mau kai ta‘etotongi ‘i ‘Isipite; ‘a e kukumipa, mo e meleni, mo e liki, mo e onioni, mo e kāliki: 6ka ko eni kuo kauikafa ‘etau mo‘ui; ‘oku ‘ikai ha momo‘i me‘a: ko e mana ni ‘oku tau sio ki ai.
7(Pea ko e mana na‘e hangē ia ko e tenga‘i kolianita, ko e mokimoki‘i me‘a hangē ko ha mata‘itofe.#‘Eki 16.31 8Na‘e fai holo ‘a e kakai hono tufi, ‘o nau momosi ‘i he ngaahi me‘a momosi, pe tuki ‘i he ngaahi tukinga, pea nau haka ‘i he ngaahi kulo, mo nau ngaohi keke ‘aki: pea ko hono ifo na‘e hangē ko e ifo ‘o e keke natu lolo. 9Pea ka tō po‘uli ‘a e hahau ki he ‘apitanga, na‘e tō mo ia ‘a e mana).#‘Eki 16.13-15
10Pea fanongo ‘e Mōsese ki he kakai ‘oku tangi honau ngaahi fāmili takitaha ‘i honau mata tēniti, mo e langa‘i ai ‘a e tuputāmaki lahi ‘a Sihova, pea na‘e tau kovi kia Mōsese. 11Pea fakatau folofola ‘a Mōsese ki he ‘Eiki, ‘o pehē, Ko e hā kuo ke ngaohikovi‘i ai ho‘o tamaio‘eiki ko au? Pea ko e hā kuo ‘ikai ai te ke hāngaifofonga mai ‘a e ‘Afiona, ho‘o tuku mai ke u fuesia ‘a e kakai ni kotoa? 12He ko au na‘a ku feitama‘i ‘a e fu‘u kakai ni? Pe ko au na‘a ku fā‘ele‘i kinautolu, koe‘uhi ke ke folofola mai ai ‘o pehē, Fua kinautolu ‘i ho fatafata, ‘o hangē ko e fua ‘o ha tamasi‘i huhu ‘e he tamai tauhi, kae‘oua ke a‘usia ‘a e kelekele na‘a ke fuakava ai ki he‘enau ngaahi kui? 13Mei fē ha‘aku kiki ke ‘atu ki he fu‘u kakai ni? Ka ‘oku nau tangi mai kiate au, ‘o pehē, ‘Omi ha‘amau kiki ke mau kai. 14‘E ‘ikai te u lava au ke fua toko taha ‘a e fu‘u kakai ni, he ‘oku mamafa fau kiate au. 15Pea kapau te ke fai pehē kiate au, pe‘i tāmate‘i mu‘a au ke ‘osi, ‘o kapau mo‘oni ‘oku ke ‘ofa mai: koe‘uhi ke ‘oua na‘a ku sio ki he kovi ‘e hoko kiate au.
16Pea folofola ‘a Sihova kia Mōsese, Tānaki mai kiate au ha toko fitungofulu ‘i he mātu‘a ‘Isileli, ha ni‘ihi ‘oku ke ‘ilo ko e mātu‘a ‘a e kakai, ‘o ‘ōfisa kiate kinautolu: pea te ke ‘omi kinautolu ki he Tēniti Fe‘iloaki‘anga ke nau tutu‘u ai fakataha mo koe. 17Pea te u ‘alu hifo ‘o alea mo koe ‘i ai: pea te u vahe‘i mei he laumālie ‘oku ‘iate koe, ‘o ‘ai kiate kinautolu; pea te nau kau mo koe ‘i he fua ‘a e mamafa ‘o e kakai, ‘o ‘oua te ke fua toko taha pē. 18Pea te ke tala ki he kakai, mou fakatāpui kimoutolu ki he ‘apongipongi, pea te mou kai kiki: he kuo mou tangi ‘o ongo kia Sihova, ‘o pehē, Ko hai ‘e ‘omi kiki ke mau kai? he na‘a mau tu‘umālie ‘i ‘Isipite: ko ia ‘e ‘atu ha‘amou kiki ‘e he ‘Eiki, pea te mou kai. 19Tala‘ehai ‘e ‘aho taha pē ho‘omou kai, pe ua, pe nima, hongofulu, pe uofulu ‘aho: 20ka ko e māhina kātoa, kae‘oua ke hake mai ‘i homou fofonga, ‘o mou fakalili‘a ki ai: koe‘uhi ā kuo mou li‘aki ‘a e ‘Eiki ‘oku ‘i homou lotolotonga, pea kuo mou tangi ‘i hono ‘ao, ‘o pehē, Ko ‘emau hū mai mei ‘Isipite koe‘uma‘aki?
21Pea tali ‘e Mōsese, Ko e kakai ‘oku ou nofo ki ai ‘oku toko ono kilu ‘enau tau ha‘ele; ka kuo ke folofola mai, Te u ‘atu ha‘anau kiki ke nau kai ‘o māhina kātoa. 22‘E tāmate‘i koā ‘a e monumanu ma‘anautolu ke nau mākona ai? pe tānaki mai ‘a e ika kotoa ‘o e tahi ke fe‘unga mo kinautolu?
23Pea folofola ‘a Sihova kia Mōsese, He kuo nounou ‘a e nima ‘o e ‘Eiki? te ke vakai eni pe ‘e hoko ‘eku lea kiate koe pe ‘ikai.
24Pea hū kitu‘a ‘a Mōsese, ‘o ne tala ki he kakai ‘a e folofola ‘a Sihova: pea ne fakataha mai ha toko fitungofulu ‘i he mātu‘a ‘a e kakai, ‘o ne fokotu‘u takatakai ki he Tēniti. 25Pea hā‘ele hifo ‘a Sihova ‘i he ‘Ao, ‘o fefolofolai mo ia, ‘o ne vahe‘i mei he laumālie na‘e ‘iate ia, ‘o ne tuku ki he fitungofulu‘i mātu‘a: pea ‘i he ‘iloange na‘e toka ‘a e laumālie kiate kinautolu pea nau palofisai; ka na‘e ‘ikai te nau toe fai.
26Ka na‘e toe ha toko ua ‘i he ‘apitanga, ko e hingoa ‘o e taha ko ‘Elitati mo e taha ko Meitati: kae toka pē ‘a e laumālie kiate kinaua, he na‘a na ‘i he kakai tohi, ka na‘e ‘ikai te na ‘alu atu ki he Tēniti: pea na‘a na palofisai ‘i he ‘apitanga. 27Pea lele mai ha talavou ‘o fakahā kia Mōsese, ‘o pehē, Ko ‘Elitati mo Meitati ‘oku na palofisai ‘i he ‘apitanga.
28Pea tali ‘e Siosiua ko e foha ‘o Nuni ko e tauhi ‘o Mōsese, ko e taha ‘o hono tākanga, ‘o ne pehē, ‘Ēī Mōsese, ta‘ofi ‘ena me‘a.
29Pea tali ‘e Mōsese ki ai, Ko ho‘o mamahi‘i au koā? ‘Ā, taumaiā ke palōfita ‘a e kakai kotoa ‘a e ‘Eiki, ke ‘atu mai ‘e he ‘Eiki hono laumālie kiate kinautolu! 30Pea foki ‘a Mōsese ki he ‘apitanga, ‘a ia mo e mātu‘a ‘Isileli.
31Pea ‘alu atu ha matangi meia Sihova, ‘o fakateka mai ‘a e fanga kueili mei he tahi, ‘o tufaki mai ‘i he funga ‘apitanga, ‘o fe‘unga mo e vaa‘i hala ‘o e ‘aho ‘e taha ki hē mo ē, takatakai ki he ‘apitanga, pea fe‘unga mo e kiupite ‘e ua mei he funga kelekele.#11.31 tahí … funga kelekelé; pe ‘o tufaki mai ‘i he funga ‘apitangá, ‘o fe‘unga mo e vaa‘i hala ‘o e ‘aho ‘e taha ki hē mo ē, takatakai ki he ‘apitanga, pea fe‘unga ‘enau puná mo e kiupite ‘e ua mei he funga kelekelé. 32Pea tutu‘u ‘a e kakai ‘i he ‘aho ko ia kātoa, mo e pō kātoa, mo e ‘aho kātoa ‘apongipongi, ‘o nau tufi ‘a e kueili: ko ia na‘e si‘i ‘ene tufi na‘e fe‘unga mo e homa ‘e hongofulu, pea nau tauaki ma‘anautolu takatakai ki he ‘apitanga. 33Lolotonga na‘e kei ‘i honau vaha‘a nifo ‘a e kakano, te‘eki lamu, na‘e tafu ‘a e houhau ‘a Sihova ki he kakai, pea ne taa‘i kinautolu ‘aki ha tā lahi ‘aupito. 34Ko ia na‘e fakahingoa ai ‘a e potu ko ē ko Kipilote-hataava (ko e Fa‘itoka ‘o e ‘Uakai): koe‘uhi na‘a nau tanu ai ‘a e kakai na‘e ‘uakai.
35Mei Kipilote-hataava na‘e hiki ‘a e kakai ki Heseloti, pea nau nofo ai.
Currently Selected:
NŌMIPA 11: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
