KO NEHEMAIA 12
12
Ko Hono Hiki Fakamā‘opo‘opo ‘o e ngaahi Hingoa ‘o e Kau Taula‘eikí mo e Kau Lī vaí
1PEA ko eni ‘a e kau taula‘eiki mo e kau Līvai na‘e ‘alu hake mo Seluipepeli foha ‘o Saletili, pea mo Sisua: ko Selaia, Selemaia, ‘Ēsela,
2‘Amalaia, Māluki, Hātusi, 3Sekonaia, Lēhumi, Melemoti, 4‘Ito, Kinetoi, ‘Apaia, 5Misiamini, Ma‘ataia, Pīleka, 6Sēmaia, mo Sioialipi, ‘Ītaia,
7Salu, ‘Āmoki, Hilikaia, ‘Ītaia. Ko e hou‘eiki ia ‘o e kau taula‘eiki mo honau kāinga ‘i he kuonga ‘o Sisua.
8Ko e kau Līvai foki: ko Sisua, Pinui, Katemieli, Selepaia, Siuta, mo Matanaia, ‘a ia na‘e pule ki he ngaahi kau hiva, ‘a ia mo hono kāinga.
9Pea ko Pakapukaia, mo ‘Uno, mo honau kāinga na‘e fehangahangai mo kinautolu ke fetāliaki.#12.9 ‘Oku fihi. ‘Oku toe hiki: ‘i he ngaahi lakanga le‘o.
10Pea ko e hako ‘o Sisua ‘a Sioiakimi, pea ko e hako ‘o Sioiakimi ‘a ‘Eliasipi, pea ko e hako ‘o ‘Eliasipi ‘a Sioiata, 11pea ko e hako ‘o Sioiata ‘a Sionatane, pea ko e hako ‘o Sionatane, ‘a ‘Iatua.
12Pea ‘i he kuonga ‘o Sioiakimi na‘e ‘i ai ‘ani taula‘eiki, ko e kau ‘ulumotu‘a: ‘o ha‘a Selaia, ko Melaia; ‘o ha‘a Selemaia, ko ‘Ananaia; 13‘o ha‘a ‘Ēsela, ko Mēsuilame; ‘o ha‘a ‘Amalaia, ko Sihohanani; 14‘o ha‘a Māluki, ko Sionatane; ‘o ha‘a Sepanaia, ko Siosifa;
15‘o ha‘a Hālimi, ko ‘Ātena; ‘o ha‘a Melaioti, ko Helekai; 16‘o ha‘a ‘Ito, ko Sākalaia; ‘o ha‘a Kinetoni, ko Mēsuilame; 17‘o ha‘a ‘Apaia, ko Sikeli; ‘o ha‘a Miniamini; ‘o ha‘a Moataia, ko Pilitai; 18‘o ha‘a Pīleka, ko Samua; ‘o ha‘a Sēmaia, ko Sihonatane;
19pea ‘o ha‘a Sioalipi ko Matenai; ‘o ha‘a ‘Ietaia, ko ‘Osi; 20‘o ha‘a Salai, ko Kālai; ‘o ha‘a ‘Āmoki, ko Hepelū;
21‘o ha‘a Hilikaia, ko Hasapaia: ‘o ha‘a ‘Ītaia, ko Nātaniela.
22Ko e kau Līvai ‘i he kuonga ‘o ‘Eliasipi, Sioiata, mo Siohanani, pea mo ‘Iatua na‘e tohi faka‘ulumotu‘a; pea pehē ‘a e kau taula‘eiki, ‘o fai hifo ki he pule ‘a Talaiasi Pēsia.
23Ko ha‘a Līvai na‘e tohi faka‘ulumotu‘a ‘i he Tohi Kalonikali, ‘o a‘u ki he taimi ‘o Siohanani foha ‘o ‘Eliasipi.
Ko e Vahevahe ‘o e ngaahi Fatongia Faka-Temipalé
24Pea ko e hou‘eiki Līvai eni: ko Hasapaia, Selepaia, mo Sisua ko e foha ‘o;#12.24 ko e foha ‘o Katemieli; Ko hono faka-Hepeluú ia, ka ‘oku ngali tonu hono hiki ‘o: Pinui mo (vakai ki he 10.9 mo e 12.8). pea na‘e fehangahangai mo kinautolu honau kāinga ke fai ‘a e fakamālō mo e fakafeta‘i, ‘o hangē ko e tu‘utu‘uni ‘a Tēvita ko e tangata ‘o ‘Elohimi, ‘o fehangahangai ‘a e lakanga mo e lakanga.
25Ko Matanaia, mo Pakangukaia, ‘a ‘Opataia, Mēsuilame, Talemoni, ‘Ākupi, ko e kau le‘o matapā kinautolu na‘e le‘o ‘i he ngaahi fale koloa ‘o e ngaahi matapā.
26Na‘e kau kinautolu ki he taimi ‘o Sioiakimi foha ‘o Sisua, foha ‘o Siosataki, pea ki he taimi ‘o Nehemaia na‘e kōvana, mo ‘Ēsela Taula‘eiki na‘e sikalaipe.
Ko Hono Fakatāpui ‘e Nehemaia ‘a ‘Ā ‘o e Koló
27Pea ‘i he huufi ‘o e ‘ā ‘o Selusalema na‘a nau kumi ‘a e kau Līvai mei honau tukui feitu‘u, ke ‘omi kinautolu ki Selusalema, ke fai ‘a e huufi mo e fakafiefia, ‘io, ‘aki ‘a e ngaahi fakafeta‘i, mo e hiva, he fakasimipale, he fakahelefilo, mo fakaha‘ape.
28Ko ia na‘e fakataha mai ‘a e ha‘a hiva……… Pea mei he Siakale, ‘a e ngaahi feitu‘u takatakai ki Selusalema, pea mei he ngaahi vilisi ‘o e ha‘a Nētofa. 29Pea mei Pete-Kilikali, pea mei he ngaahi vao ‘o Kepa mo ‘Asimaueta; he kuo langa vilisi ‘e he kau hiva, ‘o takatakai ki Selusalema.
30Pea na‘e fakatāpui kinautolu ‘e he kau taula‘eiki mo e kau Līvai; pea nau toki fakatāpui ‘a e kakai, mo e ngaahi matanikolo, mo e ‘ā.
31Pea u toki ‘ohake ‘a e hou‘eiki Siuta ki he funga ‘ā, pea na‘a ku fokotu‘u ha ongo fu‘u fononga ke fai fakafeta‘i, ‘a ia na‘e afe ha taha ki he to‘omata‘u ‘i he funga ‘ā, ‘o taumu‘a ki he Matapā Veve.#12.31 Matapā Veve; Na‘e kamata fakataha atu ‘a e ongo fonongá ‘i ha potu ‘i he ‘āfaki fakatonga-hihifo ‘o e ‘ā ‘o e koló, pea fou ē hē kae fou ē hē, ‘o toki fetaulaki ki he toumu‘a ‘o e Temipalé ‘i he ‘āfaki fakatokelau-hahake ‘o e koló.
32Pea muimui ki ai ‘a Hosaia mo e vaeua ‘o e hou‘eiki Siuta, 33mo ‘Asalaia, ‘Ēsela, mo Mēsuilame, 34mo Siuta, mo Penisimani, mo Sēmaia, mo Selemaia, 35mo e ni‘ihi ‘o ha‘a taula‘eiki na‘e fakatalupite: ko Sākalaia foha ‘o Sionatane, foha ‘o Sēmaia, foha ‘o Matanaia, foha ‘o Maikaia, foha ‘o Sākuli, foha ‘o ‘Ēsafe; 36pea mo hono kāinga ko Sēmaia mo ‘Asaleli, ko Milalai, Kilalai, Ma‘ai, Nātaniela, mo Siuta, mo Hānani, ‘oku nau to‘o ‘a e nāunau hiva ‘a Tēvita, ko e tangata ‘o ‘Elohimi; pea ko ‘Ēsela sikalaipe na‘e taki. 37Pea nau ‘alu ‘i he Matapā Fauniteni, pea na‘e fakahangatonu ai pē ‘enau ‘alu ‘i he kaka‘anga ‘o Kolo-‘o-Tēvita, ‘i he hakenga ki he ‘ā, mei he feitu‘u ki ‘olunga ‘i he fale ‘o Tēvita, ‘o a‘u ki he Matapā Vai ki hahake.
38Pea ko hono ua ‘o e fononga fakafeta‘i na‘a nau ‘alu ke fakafetaulaki kiate kinautolu; pea na‘a ku muimui ai au mo e vaeua ‘o e kakai, ‘i he funga ‘ā, ‘o fai ki he funga ‘o e Taua Ngoto‘umu, ‘o a‘u ki he ‘Ā Lau Lahi, 39pea ‘i he funga ‘o Matapā ‘Ifalemi, pea ‘i he funga ‘o Matapā Motu‘a,#12.39 Matapā Motu‘a; pe Matapā ‘Ifalemi, Matapā ‘Iasana. pea ‘i he Matapā Ika, mo e Taua ‘o Hananeli, mo e Taua ‘o Hamea, ‘o a‘u ki he Matapā Sipi: pea nau tu‘u ‘i he matapā ‘o e Kā‘ate.
40Ko ia, na‘e tutu‘u ‘a e ongo fononga fakafeta‘i ‘i he fale ‘o ‘Elohimi, mo au foki, pea na‘e ‘iate au foki ‘a e vaeua ‘o e kau pule:
41ko e kau taula‘eiki foki, ‘a ‘Īlaiakimi, Ma‘aseia, Miniamini, Maikaia, ‘Elioenai, Sākalaia, mo ‘Ananaia, na‘a nau fakatalupite;
42ko Ma‘aseia foki, mo Sēmaia, mo ‘Eliesa, mo ‘Osi, mo Sihohanani, mo Malakai, mo ‘Īlami, mo ‘Ēseli. Pea na‘e ha‘aki mai ‘a e kau hiva, mo ‘enau tama taki ko ‘Isilaia.
43Pea na‘a nau feia ‘i he ‘aho ko ia ‘a e ngaahi fu‘u feilaulau ‘o nau fefiefia‘i; he kuo ‘ange kiate kinautolu ‘e ‘Elohimi ha fu‘u fiefia: na‘e fefiefia‘i foki ‘a e kau finemātu‘a mo e fānau: ‘io, na‘e ongo mama‘o ‘a e fiefia ‘a Selusalema.
Ko e Tānaki mo e Tauhi ‘o e ngaahi Me‘a‘ofa ke Fai ‘aki e Lotu he Temipalé
44Pea ‘i he ‘aho ko ia na‘e fokotu‘u ‘a e tu‘unga me‘a ke pule ki he ngaahi loki na‘e fa‘o ai ‘a e koloa: ki he ngaahi me‘a na‘e hapai ki he polopolo ta‘u, pea ki he tukuhau-hongofulu, ke tānaki ki ai, ‘o fakatatau ki he ngaahi vao ‘o e ngaahi kolo, ‘a e ngaahi ‘inasi kuo tu‘utu‘uni ‘e he lao ma‘a e kau taula‘eiki mo Līvai. He na‘e māfana ‘a e loto ‘o Siuta ‘i he kau taula‘eiki, mo e kau Līvai–si‘enau tu‘u na! 45Pea nau tauhi ‘a e fatongia ‘o honau ‘Otua, mo e fatongia ‘o e fakatapu, pea pehē mo e kau hiva, mo e kau le‘o matapā, ‘o hangē ko e tu‘utu‘uni ‘a Tēvita mo hono foha ko Solomone.#1 Kal 25.1-8; 26.12 46He ‘i he kuonga ‘o Tēvita mo ‘Ēsafe ‘i mu‘a, na‘e ‘i ai ha pule ‘o e kau hiva, mo e ngaahi hiva fakamālō mo fakafeta‘i ki he ‘Otua. 47Pea ‘i he kuonga ‘o Seluipepeli mo e kuonga ‘o Nehemaia na‘e ‘ange ‘inasi ‘e ‘Isileli kotoa ki he kau hiva mo e kau le‘o matapā, ‘a e me‘a ‘o e ‘aho ki hono ‘aho; ‘o nau vahe ‘inasi ai pē ki he kau Līvai, pea vahe ‘inasi ‘e he kau Līvai ma‘a ha‘a ‘Ēlone.
Currently Selected:
KO NEHEMAIA 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
