KO NEHEMAIA 13
13
Ko Hono Fakamavahe‘i ‘o e Kau Mulí
1‘I HE taimi ko ia na‘e lau hake ki he kakai ‘a e Puka ‘a Mōsese; pea na‘e hā ai tokua, ‘oku tapu ke hū ha ‘Āmoni, pe ha Moape ‘i he fakataha ‘o ‘Elohimi, ‘o ta‘engata;#Teu 23.3-5 2koe‘uhi na‘e ‘ikai te nau feitalitali ki ha‘a ‘Isileli ‘i he‘enau ha‘u ‘aki ‘a e me‘akai mo e vai; kaekehe na‘a nau nō ‘a Pēlami ke tukitala‘i kinautolu–ka ko homau ‘Otua na‘a ne liliu ‘a e tukitala ko e tāpuaki.#Nōm 22.1-6 3Pea ‘i he‘enau fanongo leva ki he lao ko ē, na‘a nau vahe‘i mei ‘Isileli ‘a e kakai kotoa na‘e huli kehe.
4Ko e ki mui ia, ka ko ‘Eliasipi ko e taula‘eiki, ‘a ia kuo tuku ke pule ki he ngaahi loki ‘i he fale ‘o homau ‘Otua–ko e kāinga‘anga ia ‘o Topaia, 5pea kuo ne teu ki ai ha fu‘u loki lahi, ‘a ia na‘a nau fa‘o ai mu‘a ‘a e ngaahi feilaulau mahoa‘a, ‘a e laipeno, mo e nāunau kehekehe, mo e tukuhau-hongofulu ‘o e uite mo e uaine mo e lolo, ‘a e me‘a na‘e tu‘utu‘uni ma‘a e kau Līvai, mo e kau hiva, mo e kau le‘o matapā, pea mo e ngaahi me‘a hapai ko e ‘inasi ‘o e kau taula‘eiki. 6Ka ko e fu‘u taimi ko ia na‘e ‘ikai te u ‘i Selusalema ai au: he ko e tolungofulu mā ua ta‘u ‘o ‘Atasease#13.6 ‘Atasease; ‘I hono tu‘unga Tu‘i Pēsiá, na‘e toe ‘i ai hono huafa ko e Tu‘i Pāpilone. Tu‘i Pāpilone na‘a ku ha‘u ai ki he tu‘i, pea kuo ‘osi ha taimi, pea u poaki ange ki he tu‘i: 7pea u ha‘u ki Selusalema, pea u ‘ilo ‘a e kovi kuo fai ‘e ‘Eliasipi koe‘uhi ko Topaia, ‘ene teu mo‘ona ha loki ‘i he ngaahi loto‘ā ‘o e fale ‘o ‘Elohimi. 8Pea na‘e tau kovi ‘aupito kiate au: pea u laku ki tu‘a ‘a e nga‘oto‘ota ‘a Topaia mei he loki. 9Pea u fekau, pea nau fakama‘a ‘a e ngaahi loki: pea u fakafoki ki ai ‘a e nāunau ‘o e fale ‘o ‘Elohimi, mo e feilaulau mahoa‘a mo e laipeno.
10Pea u ‘ilo, tā ko e ‘inasi ‘o e kau Līvai ‘oku ‘ikai ‘ange ki ai, pea kuo hola ‘a e kau Līvai mo e kau hiva na‘e fai ‘a e ngāue, takitaha ki hono konga vao.#Teu 12.19 11Pea u fakahopo ‘a e kau pule, pea u pehē, Ko e hā kuo li‘aki ai ‘a e fale ‘o ‘Elohimi? Pea u tānaki ‘a e fa‘ahinga ko ē, ‘o fokotu‘u kinautolu ki honau tu‘unga.
12Toki ‘omi ‘e Siuta kātoa ‘a e tukuhau-hongofulu ‘o e uite mo e uaine mo e lolo ki he ngaahi fale koloa.#Mal 3.10 13Pea u fokotu‘u sētuata ke pule ki he ngaahi fale koloa; ‘a Silimaia na‘e taula‘eiki, mo Sātoki ko e sikalaipe, pea mo Petaia, ko e taha mei ha‘a Līvai; pea ke tokoni ki ai ‘a Hānani foha ‘o Sākuli, foha ‘o Matanaia; he na‘e lau ko e fa‘ahinga ia ‘e ala falala ki ai; pea na‘e ‘anautolu ke tufa ki honau kāinga.
14‘E hoku ‘Otua, manatu‘i au ‘i he me‘a ko ia, ‘o ‘oua ‘e tāmate‘i ‘eku ngaahi ‘ofa kuo fai ma‘a e fale ‘o hoku ‘Otua mo hono ngāue.
15‘I he taimi ko ia na‘a ku sio ki ha ni‘ihi Siuta ‘oku nau malaki kālepi ‘i he ‘aho Sāpate, mo ha ni‘ihi ‘oku fetuku uite mai, ‘o fakaheka ki he fanga ‘asi; kae‘uma‘ā ‘a e uaine, kālepi, mo e fiki, mo e ngaahi kavenga kehekehe, ‘o nau ‘omi ki Selusalema ‘i he ‘aho Sāpate. Pea u talatalaaki‘i kinautolu ‘i he ‘aho na‘a nau fakatau ai ‘a e me‘akai.#‘Eki 20.8-10; Teu 5.12-14; Sel 17.21-22
16Pea na‘e ‘i ai ha kau Taia na‘e nofo ai, ‘a ia na‘e fetuku ika mai, mo e koloa kehekehe, ‘o nau fakatau ‘i he ‘aho Sāpate, ki ha‘a Siuta, pea ‘i Selusalema. 17Pea u fakahopo ‘a e hou‘eiki Siuta, pea u pehē kiate kinautolu, Ko e hā ‘a e ngāue kovi ko eni kuo mou fai, ‘o maumau Sāpate ai? 18‘Ikai na‘e fai pehē ‘e ho‘omou ngaahi kui, pea ‘ikai na‘e ‘omi ai ‘e hotau ‘Otua ‘a e fu‘u mala ni kiate kitautolu, pea ki he kolo ni? Pea ko eni ‘oku mou fakalahi houhau ki ‘Isileli ‘i he maumau Sāpate ni.
19Ko ia ‘i he kamata malu efiafi#13.19 kamata malu efiafi; ‘Oku kamata ‘a e Sāpate faka-Siú he tō ‘a e la‘aá. ‘a e ngaahi matanikolo ‘o Selusalema, ‘i he ofi ‘a e Sāpate, na‘a ku fekau ke songo ‘a e ngaahi lau matapā, pea u fekau ke ‘oua na‘a to‘o kae‘oua ke hili ‘a e Sāpate: pea ko e ni‘ihi ‘o ‘eku kau tama na‘a ku fokotu‘u ke pule ki he ngaahi matanikolo, ke ‘oua na‘a fakahū mai ha kavenga ‘i he ‘aho Sāpate. 20Pea hanga ‘a e kau mesianiti mo e kau fakatau me‘a kehekehe, ‘o mohe tua‘ā Selusalema, tu‘o taha mo tu‘o ua. 21Pea u lea ‘asi kiate kinautolu, ‘o u pehē ange, Ko e hā ‘oku mou mohe ve‘e ‘ā ai? Kapau te mou toe fai, ko e nima ni ‘e ala atu kiate kimoutolu. Talu ai mo e ‘ikai te nau ha‘u ‘i he Sāpate. 22Pea u fekau ki he kau Līvai ke nau sinaki fakama‘a kinautolu, pea ke nau ha‘u ki he ngaahi matanikolo kae tapu ‘a e ‘aho Sāpate.
Ko e me‘a ko ia foki ke ke manatu‘i ma‘aku ‘e hoku ‘Otua, pea ke mamae kiate au ‘o taau mo ho‘o ‘ofa lahi.
23‘I he taimi ko ia foki na‘a ku vakai ‘a e kau Siu kuo mali mo e kau fefine ‘Asitoti, ‘Āmoni, mo Moape:#‘Eki 34.11-16; Teu 7.1-5 24pea ko ‘enau fānau na‘e lea vaeua ‘i he lea faka-‘Asitoti, ka na‘e ‘ikai te nau lava ‘a e lea faka-Siu, ‘o nau faiaki ‘a e lea ‘a e kakai ko ē mo ē.
25Pea u fakahopo kinautolu, pea u tūvangia kinautolu, pea u taa‘i honau kau tangata ni‘ihi, pea u fusi honau ‘ulu, pea u fakafuakava‘i kinautolu ‘ia ‘Elohimi, ‘Ilo ‘e kimoutolu ‘o kapau te mou ‘ange homau ngaahi ‘ōfefine ki he‘enau fānau tangata, pe ‘omi ‘enau fānau fefine ki homou ngaahi foha, pe kiate kimoutolu. 26‘Ikai ko e me‘a pehē na‘e hia ai ‘a Solomone Tu‘i ‘Isileli? Ka neongo ‘e lau holo ha ngaahi pule‘anga lahi, kae ‘ikai ma‘u ha tu‘i hangē ko ia pea ko e pele ia ‘o hono ‘Otua, pea na‘e tuku ‘e he ‘Otua ke ne tu‘i ki ‘Isileli kātoa. Ka na‘a mo ia ka na‘e fakaangahala‘i ‘e he kau fefine muli.#2 Sām 12.24-25; 1 Tu‘i 11.1-8 27Pea te mau tui koā kiate kimoutolu, ke fai ‘a e fu‘u kovi ni ‘oku pehē fau, ke hia ki hotau ‘Otua ‘i he nonofo mo e kau fefine muli?
28Pea ko e taha ‘i he fānau ‘a Sioiata foha ‘o ‘Eliasipi ko e taula‘eiki lahi kuo ne mali mo e ‘ōfefine ‘o Sanipalate ko e matāpule Hōloni: ko ia na‘a ku tuli ia ke fei mo ‘alu.#Nehe 4.1
29‘E hoku ‘Otua, manatu‘i kinautolu, he kuo nau fakalielia‘i ‘a e tu‘unga taula‘eiki, mo e tapu ‘o e taula‘eiki mo e Līvai.
30Ko ia na‘a ku fakama‘a kinautolu mei he me‘a muli kehekehe, pea u fokotu‘u lakanga ki he kau taula‘eiki mo e Līvai, ke takitaha hono fatongia; pea ki he kōpano fefie foki ‘i hono taimi tu‘utu‘uni, pea ki he polopolo ta‘u. ‘E hoku ‘Otua, manatu‘i au ‘o ke ‘ofa mai.
Currently Selected:
KO NEHEMAIA 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
