Ma‘aké 6

Ko e Kapusi ‘o Sīsū mei Nāsaleti

(Māt 13.53-58; Luk 4.16-30)

1PEA na‘a ne ‘alu mei he potu ko ia, ‘o ne a‘u ki hono fonua ‘o‘ona; pea muimui ki ai ‘ene kau ako. 2Pea ‘i he hoko ‘a e Sāpate, na‘a ne kamata faiako ‘i he falelotu: pea to‘oa ai ha tokolahi na‘e fanongo ki ai, ‘o nau pehē, Mei fē ki he siana ni ‘a e ngaahi me‘a ni? pea ko e hā fua ‘a e poto ni kuo ‘ange ki ai? pea mei fē ‘ene fai ha ngaahi fu‘u ngāue fakaofo pehē? 3‘Ikai ko e tufunga ‘eni, ko e tama ‘a Mele, mo e tokoua ‘o Sēmisi mo Siose mo Siutasi mo Saimone? Pea ‘ikai ‘oku ‘i heni hono ngaahi tuofāfine, ‘o felemofafo ‘iate kitautolu? Pea nau tūkia ‘iate ia.

4Ka ka lea ‘e Sīsū kiate kinautolu, ‘o pehē, ‘oku ‘ikai masiva faka‘apa‘apa ‘e ha palōfita, ka ‘i hono fonua totonu, mo hono kāinga ‘o‘ona, mo hono fāmili.#Sioné 4.44

5Pea na‘e ‘ikai te ne lava ke fai ai ha ngāue fakaofo ‘e taha; ngata pē ‘i he‘ene hilifaki hono nima ki ha ni‘ihi na‘e mahaki, ‘o fakamo‘ui. 6Pea ko e me‘a fakaofo kiate ia ‘a ‘enau ta‘etui. Pea ne foli fakatakamilo ‘a e ngaahi vilisi, ‘o fai ‘ene ako.

Ko e Fekau Atu ‘e Sīsū ‘a e Toko-hongofulu-mā-uá

(Māt 10.5-15; Luk 9.1-6)

7Pea ne ui ange ‘a e kau Hongofulumāua, ‘o ne hanga ‘o fekau atu kinautolu, ‘o tautau toko ua; ‘o ne tuku kiate kinautolu ke fa‘iteliha ki he ngaahi fa‘ahikehe. 8Na‘a ne tu‘utu‘uni foki kiate kinautolu ke ‘oua te nau to‘o ha me‘a ki he hala, ngata pē ‘i ha tokotoko; kae ‘oua ‘e ‘ave ha mā, pe ha kato ‘oho, pe fakapona ha pa‘anga kapa ‘i honau no‘o.#Luk 10.4-11 9Pea ‘e topuva‘e ‘aki ‘a e teka pē, pea ‘e ‘ikai ‘ai ha sote ‘e ua. 10Na‘a ne pehē foki kiate kinautolu, pea ka ai ha‘amou hū ki ha fale, nofo pē ai kae‘oua ke mou hiki mei he potu ko ia. 11Pea ‘ilonga ha potu ‘e ‘ikai tali kimoutolu, pe fanongo kiate kimoutolu, pea ka mou ka tuku fononga mei ai, mou tūtuu‘i ‘a e efu ‘i homou ‘aofiva‘e, ko e faka‘ilonga kiate kinautolu.#Ngā 13.51

12Pea na‘a nau ‘alu atu, ‘o fanongonongo ke fakatomala ‘a e kakai. 13Pea nau kapusi ‘a e fanga tēvolo tokolahi, pea nau pani ‘aki ha lolo ‘a e tokolahi na‘e mahaki, ‘o fakamo‘ui.#Sēm 5.14

Ko e Fakapoongi ‘o Sione Papitaiso

(Māt 14.1-12; Luk 9.7-9)

14Pea na‘e fanongo ki ai ‘a e tu‘i ko Hēlota;#6.14 tu‘i ko Hēlota; Ko e Hēlota ‘Anitipasa ia, ko e pule ‘o Kāleli. (he kuo ongoongoa hono hingoa) pea pehē ‘e ia, Ko Sione Papitaiso kuo ne toetu‘u mei he mate, pea ko hono ‘uhinga ia ‘o e ngaahi fu‘u mafai ‘oku ngāue ‘iate ia.#Māt 16.14; Ma‘ake 8.28; Luk 9.19

15Ka ka pehē ‘e ha ni‘ihi, Ko ‘Ilaisiā pe ‘eni: pea mo ha ni‘ihi, Ko ha palōfita ia, hangē ha toko taha ‘i he kau palōfita mu‘a.

16Ka ‘i he fanongo ki ai ‘a Hēlota, na‘a ne pehē, Ko e tangata pē na‘a ku tu‘usi hono ‘ulu–‘a Sione–ko ia ia kuo tu‘u hake. 17He ko e Hēlota ko ia na‘a ne fekau atu ke puke ‘a Sione; pea ne ha‘i ia ‘o lī ki he pilīsone, koe‘uhi ko Helotiasi ko e uaifi ‘o hono tokoua ko Filipe; he kuo na mali.#Luk 3.19-20 18He na‘e fa‘a lau ‘e Sione kia Hēlota, ‘oku ‘ikai ngofua kiate koe ke ma‘u ‘a e uaifi ‘o ho tokoua.

19Pea na‘e fakalililili ‘a Helotiasi kiate ia, ‘o ne holi tu‘u ke tāmate‘i ia; ka na‘e ‘ikai te ne lava: 20he na‘e manavahē ‘a Hēlota kia Sione, ko ‘ene ‘ilo ko e tangata faitotonu ia mo mā‘oni‘oni, ‘o ne fakahaofi ia; pea ka ne ka fanongo ki ai, te ne mātu‘aki toumoua, pea ne fa‘a fanongo fiefia kiate ia.

21Pea faifai pea ai ha ‘aho faingamālie, ko e fai kātoanga ‘e Hēlota ‘i hono ‘aho fakamanatu, mo hono hou‘eiki, mo e ngaahi ‘eikitau, mo e kau tu‘ukimu‘a ‘o Kāleli. 22Pea hū atu ‘a e ta‘ahine ‘a e Helotiasi ko ia#6.22 ‘a e ta‘ahine ‘a e Helotiasi ko ia: ‘Oku pehē ‘i he ngaahi hiki fuoloa ‘e ni‘ihi: ‘a hono ‘ōfefine (‘o Hēlota) ko Helotiasi., ‘o me‘e; pea mālie‘ia ai ‘a Hēlota mo kinautolu na‘e taumafa mo ia, pea pehē ‘e he Tu‘i ki he ta‘ahine, Fai mai ha‘o kole; ha me‘a pē ‘oku ke loto ki ai; pea te u ‘atu. 23Pea na‘a ne fuakava ki he ta‘ahine, Neongo pe ko e hā te ke kole, te u ‘atu; ‘io, ‘o a‘u ki he vaeua ‘o hoku pule‘anga.

24Pea na‘a ne ‘alu atu mei ai ‘o pehē ki he‘ene fa‘ē, Ko e hā ha me‘a te u kole?

Pea tali ‘e ia, Ko e ‘ulu ‘o Sione ko e Faipapitaiso.

25Pea toe hū leva ia, ‘o ‘alu fakatotepi ki he Tu‘i, ‘o ne kole ‘o pehē, Ko hoku loto ke ke ‘omi leva ni kiate au ‘i ha peleti ‘a e ‘ulu ‘o Sione Papitaiso.

26Pea mamahi lahi ai ‘a e Tu‘i; ka na‘e ‘ikai te ne fa‘a fakafisi kiate ia, telia ‘ene ngaahi lea tuki, mo e kakai na‘a nau taumafa. 27Pea na‘e kouna leva ‘e he Tu‘i ha toko taha ‘i he kau le‘o, ‘o ne tala ke ne ‘omi ‘a e ‘ulu ‘o Sione: pea ‘alu atu ia ‘o tu‘usi hono ‘ulu ‘i he pilīsone, 28‘O ne ‘omi ‘a e ‘ulu ‘i ha peleti, ‘o ne ‘ange ki he ta‘ahine; pea ‘ange ‘e he ta‘ahine ki he‘ene fa‘ē. 29Pea ‘i he fanongo ki ai ‘ene kau ako, na‘a nau ha‘u ‘o ‘ave hono ‘anga‘anga, ‘o telio ‘i ha fonualoto.

Ko e Fafanga ‘e Sīsū e Toko Nima Afe

(Māt 14.13-21; Luk 9.10-17; Sioné 6.1-14)

30Pea fakataha ‘a e kau ‘Aposetolo kia Sīsū, ‘o nau ‘a‘au kotoa kiate ia ‘a e ngaahi me‘a kuo nau fai mo ako‘aki. 31Pea pehē ‘e ia kiate kinautolu, Mou omi ki ha potu lala fakaekimoutolu pē, ‘o mālōlō si‘i: he na‘e ‘i ai ma‘u pē ha kakai na‘e ha‘u mo ha kakai na‘e ‘alu, ko e tokolahi; pea na‘a mo e kai na‘e ‘ikai ha taimi ki ai. 32Pea nau ‘alu ‘i he vaka ki ha potu lala, fakaekinautolu pē.

33Ka ka sio ‘e he tokolahi ki he‘enau ‘alu, ‘o nau ‘ilo hono ‘uhinga; pea nau felelei ‘i ‘uta mei he kolo kehekehe ki he potu ko ia, ‘o nau mu‘omu‘a ki ai. 34Pea ‘i he‘ene hifo ki ‘uta, na‘a ne ‘ilo ha fu‘u kakai lahi; pea na‘e langa hono fatu ‘i he ‘ofa kiate kinautolu, koe‘uhi ko ‘enau hangē ha fanga sipi ta‘ehanau tauhi: pea na‘a ne hanga ‘o ako kiate kinautolu ha ngaahi me‘a lahi.#Nōm 27.17; 1 Tu‘i 22.17; 2 Kal 18.16; ‘Isi 34.5; Māt 9.36 35Pea kuo mei ‘osi ‘a e ‘aho ko ia, na‘e ‘unu‘unu kia Sīsū ‘ene kau ako, ‘o nau pehē, Ko e potu lala ‘eni, pea kuo mei ‘osi ‘a e ‘aho ni: 36tukuange mu‘a kinautolu ke nau ‘alu ki he ngaahi ngoue takatakai, mo e ngaahi vilisi, ‘o fakatau ma‘anautolu ha me‘akai.

37Ka ka tali ‘e ia ‘o ne pehē, ‘ange ‘e kimoutolu ha‘anau me‘akai. Pea nau pehē ki ai, Ka mau ‘alu koā ‘o fakatau ha mā ke uangeau‘i tēnali?#6.37 tēnali; Ko e tēnalí ko e pa‘anga ia na‘e fe‘unga hono mahu‘ingá mo ha ngāue faama ‘a ha tokotaha ‘i ha ‘aho ‘e taha (vakai kia Māt 20.2). kapau ko ia pea mau ‘ange ha‘anau kai. 38Pea ne pehē kiate kinautolu, ‘oku fiha ho‘omou fo‘i mā? ‘Alu ‘o vakai.

Pea kuo nau ‘ilo, pea nau pehē, ‘oku nima, pea mo e ika ‘e ua.

39Pea ne fekau ke nau fakatokoto ‘a e kakai kotoa pē ‘i he musie mā‘ui‘ui, ‘o fakakalasi pē. 40Pea nau tākoto ki lalo ‘o faka‘otu, ‘o taki teau ki hē, mo taki nimangofulu ki hē. 41Pea ne to‘o ‘a e fo‘i mā ‘e nima pea mo e ongo ika, ‘o ne tāngaki hake ki he langi, ‘o ne fai ha tāpuaki; mo ne pakipaki ‘a e ngaahi fo‘i mā, ‘o ne toutou ‘ange ki he‘ene kau ako ke tufaki ki he kakai; na‘a ne vahevahe foki ‘a e ongo ika, ‘o nau totofu ai. 42Pea nau kai kotoa pē, ‘o mākona. 43Pea nau tānaki ‘a e ngaahi mapakipaki‘i mā, ‘o fe‘unga mo e kato fakahunga ‘e hongofulu mā ua, pea mo e ngaahi konga ika foki. 44Pea ko kinautolu na‘e kai ‘a e ngaahi fo‘i mā na‘e toko nima afe ‘a e tangata pē.

Ko e Laka Atu ‘a Sīsū he Fukahi Vaí

(Māt 14.22-33; Luk 6.15-21)

45Pea hanga leva ‘e Sīsū ‘o ne fekau fakamālohi ki he‘ene kau ako ke fei mo heka ki he vaka, ‘o mu‘omu‘a ki he kauvai, ‘o taumu‘a ki Petesaita, ka ne tuku ange ‘e ia ‘a e kakai. 46Pea kuo fai ‘ene tatau ki he kakai, na‘a ne ‘alu mei ai ki he mo‘unga ke lotu. 47Pea ‘i he‘ene efiafi po‘uli, na‘e ‘i he vaha‘amālie ‘o e tahi ‘a e vaka, ka ka toko taha pē ia ‘i ‘uta. 48Pea ne mamata kiate kinautolu ‘oku nau faingata‘a‘ia ‘i he‘enau ‘a‘alo, he na‘e tokai ‘a e matangi: pea fe‘unga nai mo hono fā ‘o e uasi ‘i he pō mo ‘ene ha‘u kiate kinautolu, ‘oku ne hā‘ele ‘i he fukahi tahi; pea na‘a ne fai ke laka atu ‘iate kinautolu.#6.48 laka atu ‘iate kinautolu; pe fetaulaki mo kinautolu. 49Ka ko kinautolu, ‘i he‘enau mamata kiate ia ‘oku ne hā‘ele ‘i he fukahi tahi, na‘a nau mahalo ko ha fa‘ahikehe, ‘o nau fu‘u kekē: 50he na‘a nau sio kotoa pē ki ai, ‘o nau puputu‘u. Pea ne fetāpaaki leva mo kinautolu, ‘o ne pehē ki ai, Fiemālie pē: ko au pē; ‘oua ‘e manavahē.

51Pea heka ia ki he vaka kiate kinautolu; pea tālolo ‘a e matangi: pea na‘e makehe atu ‘aupito ‘enau fakatumutumu. 52He na‘a mo e mana he ngaahi fo‘i mā, kuo ‘ikai o‘o kiate kinautolu; he kuo fefeka honau loto.

Ko e Fakamo‘ui ‘e Sīsū e Mahaki ‘i Kenesaleti

(Māt 14.34-36)

53Pea kuo nau ‘i kauvai na‘a nau ‘alu ki he fonua ko Kenesaleti, ‘o tau ai. 54Pea ‘i he‘enau hifo mei he vaka, na‘e ‘ilo leva ‘e he kakai ko Sīsū; 55pea nau lele holo ‘i he fonua ko ia kotoa, ‘o nau kamata ke fata fano ‘i honau mohenga ‘a kinautolu na‘e puke, ki he potu te nau fanongo ‘oku ne ‘i ai. 56Pea neongo pe ko e fē ha vilisi, pe ha kolo, pe ha ngoue‘anga, na‘a ne fononga ki ai, te nau ‘ai ‘enau kakai mahaki ‘i he mala‘e; ‘o kole kiate ia ke tuku ke nau ala atu, neongo ko e pao pē ‘o hono kofu; pea ‘ilonga kinautolu na‘e ala kiate ia na‘a nau mo‘ui.

Currently Selected:

Ma‘aké 6: TMB

Highlight

Copy

Compare