Ma‘aké 2
2
Ko e Fakamo‘ui ‘e Sīsū ha Tangata Mamatea
(Māt 9.1-8; Luk 5.17-26)
1PEA hili ‘a e ‘aho ni‘ihi na‘a ne toe ‘alu ki Kāpaneume: pea ongo atu ‘oku ‘i ‘api ia. 2Pea fakataha leva ki ai ha tokolahi; ‘io, na‘e faifai pea na‘a mo e matafale na‘e ‘ikai haofia: pea ne lea kiate kinautolu ‘i he folofola. 3Pea ha‘u ha ni‘ihi ‘oku nau ‘omi kiate ia ha tangata mamatea, ‘oku kauala ‘e ha toko fā. 4Pea ‘i he ‘ikai te nau lava ke fakaofi ia kia Sīsū, koe‘uhi ko e tokolahi ‘o e kakai, pea nau tupangi ‘a e ‘ato ‘o e potu fale na‘a ne ‘i ai; pea kuo ‘a‘au kotoa, na‘a nau tuku hifo ‘a e mohenga ‘a ia na‘e tokoto ai ‘a e mamatea. 5Pea ‘i he vakai ‘e Sīsū ‘enau tui, pea pehē ‘e ia ki he mamatea, nga‘ata, kuo fakamolemole ho‘o ngaahi angahala.
6Pea na‘e ai ha ni‘ihi ‘i he kau sikalaipe na‘e nofo ai, na‘a nau fifili ‘i honau loto, 7‘o pehē, Ko e hā ‘oku lau pehē ai ‘e he siana ni? ‘oku ne lea fie ‘Otua. Ko hai ha taha ‘oku mafai ke fakamolemole angahala, ka ko e Toko Taha pē, ko e ‘Otua?
8Ka ka ‘ilo leva pē ‘e Sīsū ‘i hono laumālie ‘oku nau fifili pehē, pea ne lea kiate kinautolu ‘o pehē, Ko e hā ‘a e ngaahi me‘a ni ‘oku mou fifili ki ai ‘i homou loto? 9Ko e fē ‘oku faingofua, ‘a e pehē ki he tangata mamate ni, kuo fakamolemole ho‘o ngaahi angahala: pe ko e pehē, Tu‘u, to‘o ho mohenga, pea ‘eve‘eva? 10Ka koe‘uhi ke mou ‘ilo, ‘oku mafai ‘e he Fanautama ‘a Tangata ke fakamolemole angahala ‘i māmani, (pea hanga ia ‘o lea ki he tangata mamatea) 11‘Oku ou tala kiate koe, Tu‘u, to‘o ho mohenga, pea mole ki ho ‘api.
12Pea tu‘u ia, ‘o ne to‘o leva hono mohenga, ‘o ne ‘alu atu mei ai ‘i he ‘ao ‘o e kakai kotoa pē. Ko ia na‘a nau fakatumutumu kotoa pē, ‘o nau fakamālō‘ia ‘a e ‘Otua, mo nau pehē, Kuo te‘eki ke tau mamata ki ha me‘a pehē.
Ko e Ui ‘e Sīsū ‘a Līvai
(Māt 9.9-13; Luk 5.27-32)
13Pea ne toe hā‘ele atu ‘i he matātahi; pea ha‘u kiate ia ‘a e kakai kotoa, pea ne ako‘i kinautolu. 14Pea ‘i he‘ene ‘alu ange, na‘a ne ‘ilo ‘a Līvai, ko e foha ‘o ‘Alefiusi, ‘oku ne nofo ‘i he fale tute: pea ne pehē kiate ia, Muimui kiate au: pea ne tu‘u ‘o muimui kiate ia.
15Pea ‘i he‘ene keinanga ‘i he fale ‘o Līvaí:#2.15 ‘i he fale ‘o Līvaí; pe ‘i hono falé (‘o Sīsuú). na‘e tokolahi foki ‘a e kau pōpilikane mo e kau angahala na‘a nau fetākoto‘i mo Sīsū mo ‘ene kau ako ‘i he kai: he na‘a nau fa‘a tokolahi, pea nau muimui kiate ia. 16Pea ko e kau sikalaipe mo e kau Fālesi, ‘i he‘enau mamata kiate ia ‘oku ne kai mo e kau angahala mo e pōpilikane, na‘a nau kamata lau ki he‘ene kau ako, ‘o pehē, ‘oku ne kai mo inu fakataha mo e kau pōpilikane mo e kau angahala!
17Pea ongo‘i ‘e Sīsū, ‘o ne pehē kiate kinautolu, Ko e tangata faito‘o ‘oku ‘ikai ma‘a e mālohi, ka ma‘a e mahaki. Na‘e ‘ikai te u ha‘u ke ui ‘a e angatonu, ka ko e angahala.
Ko e Fehu‘i ki he ‘Aukaí
(Māt 9.14-17; Luk 5.33-39)
18Pea na‘e ‘i ai ‘a e kau ako ‘a Sione mo e kau Fālesi, ‘oku nau ‘aukai, pea nau ha‘u ‘o pehē kiate ia, Ko e hā ‘oku ‘aukai ai ‘a e kau ako ‘a Sione, mo e kau ako ‘a e kau Fālesi; ka ko e kau ako ‘oku ‘iate koe ‘oku ‘ikai te nau ‘aukai?
19Pea tali ‘e Sīsū kiate kinautolu, He ‘e lava ke ‘aukai ‘e he kakai ‘o e fale ta‘ane, ‘i he kei ‘iate kinautolu ‘a e tangata-ta‘ane? Lolotonga ‘oku nau ma‘u ‘a e tangata ta‘ane ke kau mo kinautolu, ‘oku ‘ikai te nau fa‘a ‘aukai. 20Kae tokaange ha taimi ‘e hiki ‘a e tangata-ta‘ane meiate kinautolu; pea te nau toki ‘aukai ‘i he ‘aho ko ia.
21‘Oku ‘ikai ha taha te ne ‘oposi ha kofu motu‘a ‘aki ha konga tupenu fo‘ou; he ka pehē, ko e konga fo‘ou ‘oku ‘oposi ‘aki, ‘oku ne maikiiki‘i ‘a e kofu motu‘a, pea hoko ai ha fu‘u mahae ‘oku lahi ange. 22Pea ‘oku ‘ikai ha taha te ne ‘utu ha uaine fo‘ou ki he ngaahi hina leta ‘oku motu‘a; he ka pehē, ‘e hae ‘a e ngaahi hina ‘e he uaine, pea ‘e maumau ‘a e uaine mo e hina fakatou‘osi.
Ko e Fehu‘i ki he Sāpaté
(Māt 12.1-8; Luk 6.1-5)
23Pea ko eni, ko e Sāpate ‘e taha na‘a ne fononga ange ‘o hala loto ngoue: pea hanga ‘e he‘ene kau ako ‘o tofa hala, he‘enau toli ‘a e ngaahi fo‘i uite.#Teu 23.25 24Pea lea ‘e he kau Fālesi kiate ia, Vakai ē; ko e hā ‘oku nau fai ai ‘i he Sāpate ‘a e me‘a ‘oku ‘ikai ngofua?
25Pea pehē ‘e ia kiate kinautolu, Kuo te‘eki koā ke mou lau ‘a e me‘a na‘e fai ‘e Tēvita ‘i he‘ene tu‘utāmaki, ‘o hālofia, ‘a ia mo kinautolu na‘e ‘iate ia?#1 Sām 21.1-6 26‘A ‘ene hū ki he Fale ‘o e ‘Otua, ‘i he kuonga na‘e Taula‘eiki Lahi ai ‘a ‘Apaiata, pea ne kai ‘a e mā fono, ‘a ia ‘oku ‘ikai ngofua hono kai, ka ki he kau taula‘eiki pē: mo ne ‘ange foki kiate kinautolu na‘e ‘iate ia?#Lev 24.9
27Pea ne toe pehē kiate kinautolu, Na‘e fokotu‘u ‘a e Sāpate ma‘a e tangata, ‘o ‘ikai ko e tangata ma‘a e Sāpate: 28ko ia ko e Fanautama ‘a Tangata ko e ‘Eiki ia ‘o e Sāpate foki.
Currently Selected:
Ma‘aké 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
