KO MAIKA 3
3
Ko Hano Valoki‘i ‘e Maika ‘a e Kau Taki ‘o ‘Isileli
1PEA U pehē, Fanongo mu‘a, ‘a e hou‘eiki ‘o Sēkope, mo e angi ‘i he fale ‘o ‘Isileli: ‘ikai ko homou taau ke ‘ilo ‘a e fakalao? 2‘a e ha‘a fehi‘a ki he lelei, mo ‘ofa ki he kovi; ‘oku to‘o ‘a e kili meiate kinautolu, mo e kakano mei honau ngaahi hui. 3‘Io, ko e fa‘ahinga kuo keina ‘a e kakano ‘o hoku kakai; pea kuo nau fohi honau kili, pea ko honau hui kuo nau fesifesi; mo tu‘utu‘u ‘o hangē ko e ‘ai ki ha kulo, ‘io, hangē ha kanomate ‘i ha sasepani. 4Te nau toki tautapa kia Sihova, kae ‘ikai te ne tali kinautolu: ‘io, te ne hanga kehe meiate kinautolu ‘i he taimi ko ia, koe‘uhi na‘a nau ‘ai ke kovi ‘enau ngāue.
5Ko e folofola eni ‘a Sihova ki he kau palōfita ‘oku takihee‘i hoku kakai; ‘a ia lolotonga ‘enau u‘usi ha me‘a ‘aki honau nifo, ‘oku nau tala melino; ka ‘o kapau ‘e ‘ikai ‘ai ‘e ha taha ha me‘a ki honau ngutu, te nau lotua leva ha tau ki he toko taha ko ia. 6Ko ia, ‘e hoko ‘a e pō kiate kimoutolu, ‘o ‘ikai te mou sio vīsone; ‘io, ‘e hoko ‘a e po‘uli kiate kimoutolu, ‘o ‘ikai lava ha tongafisi; pea ‘e ‘alu hifo ‘a e la‘ā ki he kau palōfita, pea ‘e fakapo‘uli ‘a e ‘aho kiate kinautolu. 7Pea ‘e mā ‘a e kau sio vīsone; pea ‘e kula ‘a e kau tongafisi; ‘io, te nau ‘ufi‘ufi kotoa pē honau kava: he ‘oku ‘ikai ha tali ‘a e ‘Otua.
8Kā, tala atu, kuo u fonu au ‘i he ivi ko e me‘a ‘i he Laumālie ‘o Sihova, pea fonu ‘i he fakamaau totonu, mo e to‘a, ke faka‘ilo kia Sēkope ‘ene faihala, pea kia ‘Isileli ‘ene maumau lao. 9Fanongo mu‘a ki he me‘a ni, ‘a e hou‘eiki ‘o e fale ‘o Sēkope, mo e angi ‘i he fale ‘o ‘Isileli, ‘a e fa‘ahinga ‘oku fehi‘a ki he fakalao, pea ‘oku nau piko‘i ‘a e totonu kotoa. 10‘Oku nau langa ‘a Saione ‘aki ‘a e toto, mo Selusalema ‘aki ‘a e faihala. 11Ko honau hou‘eiki ‘oku sio me‘a‘ofa ‘i he fai fakamaau, pea ko hono kau taula‘eiki ‘oku faiako ko e sio vāhenga pē, pea ko hono kau palōfita ‘oku nau fakalalave ko e sio pa‘anga pē: ka ‘oku nau nofo falala kia Sihova he‘enau pehē, ‘Ikai ko hotau tokaikolo ‘a Sihova? tala‘ehai ‘e hoko ha kovi kiate kitautolu.
12Ko ia, ‘e keli ‘a Saione ‘o hangē ha ngoue‘anga koe‘uhi ko kimoutolu, pea ‘e hoko ‘a Selusalema koni ngaahi tuva maka, pea ko e mo‘unga ‘oku tu‘u ai ‘a e Fale ‘e hoko ko e ngaahi mā‘olunga ‘i ha vao tātā.#Sel 26.18
Currently Selected:
KO MAIKA 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
