Mātiú 25
25
Ko e Talanoa Fakatātā ki he Kau Fefine ‘e Toko Hongofulu
1‘I he taimi ko ia ko e fakatātā ‘o e Pule‘anga ‘o Hēvani ko e tu‘unga tāupo‘ou ‘e toko hongofulu, ‘a ia na‘a nau takitaha to‘o ‘ene maama, ‘o ‘alu mei ‘api ke kau ‘i he fakafetaulaki ‘o e ‘eiki ta‘ane.#Luk 12.35 2Pea ko honau toko nima ko e kau fai vale, ka ko e toko nima ko e kau fai fakapotopoto: 3he ko e kau fai vale na‘a nau to‘o ‘enau ngaahi maama, ka na‘e ‘ikai ha‘u mo kinautolu ha lolo; 4ka ko kinautolu na‘e fai fakapotopoto na‘e ha‘u mo kinautolu ha lolo ‘i he ngaahi hina na‘e kau ki he‘enau ngaahi maama. 5Pea ‘i he fakatotoka ‘a e ‘eiki ta‘ane, na‘a nau tulemohe kotoa pē ‘o mohe.
6Ka ‘i he tu‘uapō na‘e pā mai ha kalanga, Ko e ‘eiki ta‘ane ‘eni, mou ‘alu atu ‘o fakafetaulaki kiate ia. 7Toki ‘ā hake kotoa pē ‘a e kau tāupo‘ou ko ia, ‘o takitaha ngaohi ‘ene maama. 8Pea lea ‘e he kau fai vale ki he kau fai fakapotopoto, Tuku mai ha me‘a mei ho‘omou lolo, he ‘oku tei mate ‘emau ngaahi maama. 9Ka ka tali ‘a e kau fakapotopoto ‘o nau pehē, Ka na‘a ‘iloange ‘e ‘ikai fe‘unga mo kimautolu mo kimoutolu fakatou‘osi: mou ō mu‘a ki he kau fakatau, ‘o fakatau ma‘amoutolu. 10Kae lolotonga ‘enau ‘alu mei ai ke fakatau, mo e ha‘u ‘a e ‘eiki ta‘ane; pea ko kinautolu kuo ‘osi ‘enau teu na‘a nau ‘alu atu mo ia ‘o hū ki he kātoanga, pea tāpuni ‘a e matapā.
11Pea ha‘u tōmui ‘a hono toe ‘o e kau tāupo‘ou, ‘o nau pehē, ‘Eiki, ‘Eiki, to‘o kiate kimautolu.#Luk 13.25 12Ka ka tali ‘e ia ‘o ne pehē, Ko au ē, ‘oku ou tala atu, ‘oku ‘ikai te u ‘iloa kimoutolu.
13Ko ia, mou le‘o, he ‘oku ‘ikai te mou ‘ilo hono ‘aho, ‘uma‘ā hono houa.
Ko e Talanoa Fakatātā ki he Kau Tamaio‘eiki ‘e Tokotolu
(Luk 19.11-27)
14He ko e Pule‘anga ‘o Hēvani ‘oku hangē ko ha tangata na‘e teu ‘alu ki muli, pea ne ui ange ‘ene kau tamaio‘eiki ‘a‘ana, ‘o ne tuku kiate kinautolu ‘ene koloa. 15Ko e toko taha na‘a ne ‘ange ki ai ‘a e taleniti ‘e nima, pea ua ki he toko taha, pea taha ki he toko taha; ‘o fakatatau ki he‘enau mafai takitaha; pea ne ‘alu leva ki muli. 16Pea ‘alu ‘a ia na‘a ne ma‘u ‘a e taleniti ‘e nima, ‘o ne ngāue‘aki ia, ‘o ne fakatupu ‘aki ha nima kehe. 17Pehē foki mo ia na‘e ‘a‘ana ‘a e ua, na‘a ne ma‘u mo ha ua kehe. 18Ka ko ia na‘a ne ma‘u ‘a e taha, na‘a ne ‘alu leva ‘o keli ha luo, ‘o ne fufū ai ‘a e pa‘anga ‘a ‘ene ‘eiki.
19Pea fuoloa, fuoloa, pea ha‘u ‘a e ‘eiki ‘a e kau tamaio‘eiki ko ia, ‘o ne sivi ‘enau tohi. 20Pea ‘unu‘unu mai ‘a ia na‘a ne ma‘u ‘a e taleniti ‘e nima, ‘o ne ha‘u mo ia mo ha taleniti kehe ‘e nima, ‘o ne pehē, ‘Eiki, na‘a ke tuku mai ha taleniti ‘e nima: vakai, kuo u ma‘u mai mo ha nima kehe. 21Pea me‘a mai ‘e he‘ene ‘eiki, Mālō, si‘i tamaio‘eiki lelei mo lototō; kuo ke lototō ‘i ho‘o pule ki ha ngaahi me‘a si‘i, te u fakanofo koe ke pule ki ha ngaahi me‘a lahi: hū koe ki he fiefia‘anga ‘o ho‘o ‘Eiki. 22Pea ‘unu‘unu mai mo ia na‘e ‘a‘ana ‘a e taleniti ‘e ua, ‘o ne pehē, ‘Eiki, na‘a ke tuku mai ha taleniti ‘e ua: vakai kuo u ma‘u mai mo ha ua kehe. 23Pea me‘a mai ‘ene ‘eiki, Mālō, si‘i tamaio‘eiki lelei mo lototō; kuo ke lolotō ‘i he pule ki ha ngaahi me‘a si‘i, te u fakanofo koe ke pule ki ha ngaahi me‘a lahi: hū koe ki he fiefia‘anga ‘o ho‘o ‘eiki. 24Pea ‘unu‘unu mai mo ia kuo ne ma‘u ‘a e taleniti ‘e taha, ‘o ne pehē, ‘Eiki, ne u ‘ilo koe ko e tangata faingata‘a; ko ho‘o anga ke utu ‘i he potu na‘e ‘ikai te ke tō ta‘u ai, pea ke tānaki ‘i he potu na‘e ‘ikai te ke ‘au‘au ai: 25pea u manavahē, pea u ‘alu ‘o fufū ho‘o taleniti ‘i he kelekele: ‘ē, ko ena ā ho‘o me‘a. 26Ka ka tali ‘e he‘ene ‘eiki, ‘o ne folofola mai, ‘a e tamaio‘eiki pau‘u mo fakapikopiko! na‘a ke ‘ilo koā ‘oku ou utu ‘i he potu na‘e ‘ikai te u tō ta‘u ai, pea tānaki ‘i he potu na‘e ‘ikai te u ‘au‘au ai, ‘ō? 27pea na‘e mei totonu ai ke ke lī ‘a ‘eku pa‘anga ki he kau tauhi pangikē; pehē kuo u ma‘u mei ai ‘eku me‘a, mo hono fua foki, ‘i he‘eku ha‘u ni. 28Ko ia, mou to‘o ‘a e taleniti meiate ia, pea tuku kiate ia ‘oku ma‘u ‘a e hongofulu. 29He ‘ilonga ha taha ‘oku ma‘u ha me‘a ‘e ‘ange ki ai mo ha me‘a, pea te ne hulu atu: ka ko ia ‘oku ‘ikai ke ma‘u, na‘a mo e me‘a ‘oku ne ma‘u ‘e to‘o meiate ia.#Māt 13.12; Ma‘ake 4.25; Luk 8.18 30Ka mou lī ‘a e tamaio‘eiki ta‘e‘aonga ki he po‘uli ‘o tua‘ā. Ko e potu ia ‘e toki hoko ai ‘a e tangi mo e fengai‘itaki ‘o e nifo.#Māt 8.12; 22.13; Luk 13.28
Ko e Fakamaau Faka‘osí
31Ka ‘oka ‘iloange ‘e hoko mai ‘a e Fanautama ‘a Tangata, kuo ne ‘ai hono nāunau, pea ha‘ofia ia ‘e he kau ‘āngelo kotoa pē, te ne toki nofo ‘i hono taloni lāngilangi‘ia:#Māt 16.27; 19.28 32pea ‘e fakatahataha ki hono ‘ao ‘a e ngaahi kakai kotoa pē; pea te ne vahe‘i kinautolu, ‘o hangē ‘oku vahe‘i ‘e ha tauhi sipi ‘a e fanga sipi mei he fanga kosi: 33pea te ne fokotu‘u ‘a e fanga sipi mei hono to‘omata‘u, ka ko e fanga kosi mei hono to‘ohema. 34Pea ‘e toki folofola ‘e he Tu‘i kiate kinautolu ‘i hono to‘omata‘u, Omi kimoutolu, ‘a e fa‘ahinga kuo fakamonū‘ia ‘e he‘eku Tamai, ‘o mou hoko ki he pule‘anga kuo toka teuteu mo‘omoutolu talu e tanu pou ‘o māmani: 35he na‘a ku fiekaia, pea mou ‘omi ha‘aku kai; na‘a ku fie inu, pea mou ‘omi haku inu; na‘a ku ‘āunofo, 36pea mou fakaafe‘i au; na‘e ‘ikai haku kofu, pea mou fakakofu au; na‘a ku mahaki, pea mou omi hoku vakai; na‘a ku ‘i he pilīsone, pea mou ‘a‘ahi mai. 37Pea ‘e toki tali ‘a e kau fai lelei, ‘o pehē, ‘Ēī, ‘anefē ha‘amau ‘ilo koe ‘oku ke hālofia, pea mau tauhi ange? pe fie epu pea mau ‘atu ha epu? 38Pea ‘anefē ha‘amau ‘ilo koe ‘oku ke ‘āunofo, pea mau fakaafe, pe ta‘ekofu pea mau fakakofu? 39Pea ‘anefē ha‘amau ‘ilo koe ‘oku ke tengetange, pe mo‘ua ‘i he pilīsone pea mau ‘a‘ahi atu? 40Pea ‘e tali ‘e he Tu‘i, ‘o ne folofola mai, Ko au ē, ‘oku ou tala atu, ‘I ho‘omou fai pehē ki ha taha ‘o hoku ngaahi tokoua mama‘o ni, na‘a mou fai ia kiate au.
41Te ne toki folofola foki kiate kinautolu ‘i he to‘ohema, ‘Alu meiate au, ‘a kimoutolu kuo mala‘ia, ki he afi ta‘engata ‘a ia ne teuteu ma‘a e Tēvolo mo ‘ene kau ‘āngelo: 42he na‘a ku fiekaia, ka na‘e ‘ikai te mou ‘omi ha‘aku kai; na‘a ku fie inu, ka na‘e ‘ikai te mou ‘omi haku inu; 43na‘a ku ‘āunofo, ka na‘e ‘ikai te mou fakaafe au; na‘a ku ta‘ekofu, ka na‘e ‘ikai te mou fakakofu au; na‘a ku mahaki, pea mo‘ua ‘i he pilīsone, ka na‘e ‘ikai te mou omi haku vakai. 44Pea ‘e toki tali mo kinautolu, ‘o pehē, ‘Ēī, ‘anefē ha‘amau ‘ilo koe ‘oku ke hālofia, pe fie epu, pe ‘āunofo, pe ta‘ekofu, pe tengetange, pe mo‘ua ‘i he pilīsone, ‘o ‘ikai te mau tokoni atu? 45Pea te ne toki tali kiate kinautolu, ‘o pehē, Ko au ē, ‘oku ou tala atu, Ko e ‘ikai te mou fai pehē ki ha taha ‘o e fa‘ahinga mama‘o ni, ko e ‘ikai ia te mou fai kiate au. 46Pea ‘e ‘alu atu ‘a kinautolu ni ki he tautea ta‘engata: ka ko e fai lelei ki he mo‘ui ta‘engata.#Tān 12.2
Currently Selected:
Mātiú 25: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.