Mātiú 24
24
Ko e Pau ke Faka‘auha e Temipalé
(Ma‘ake 13.1-2; Luk 21.5-6)
1PEA hū atu ‘a Sīsū mei he Temipale, ‘o kamata fononga: pea ‘unu‘unu ange ‘ene kau ako ke faka‘ali‘ali tala kiate ia ‘a e ngaahi fale ‘o e Temipale. 2Ka ka tali ‘e ia ‘o ne pehē kiate kinautolu, ‘Ikai ‘oku mou sio ni ki he ngaahi me‘a ni kotoa pē? Ko au ē, ‘oku ou tala atu, ‘E ‘ikai ‘aupito tuku ‘i heni ha fo‘i maka ‘o ta‘eholoki.
Ko e Ngaahi Faingata‘a mo e Ngaahi Fakatanga
(Ma‘ake 13.3-13; Luk 21.7-19)
3Pea ‘i he‘ene nofo hifo ‘i he funga mo‘unga ko ‘Ōlive, na‘e ‘unu‘unu kiate ia ‘a e kau ako fakaekinautolu, ‘o nau pehē, Tala mai pe ‘e hoko fakakū ‘a e ngaahi me‘a ko ia? Pea ko e hā nai ‘a e faka‘ilonga ‘o ha‘o hā mai, mo e faka‘osi ‘o e kuonga?
4Pea tali ‘e Sīsū ‘o ne pehē kiate kinautolu, Vakavakai, na‘a taki hē kimoutolu ‘e ha taha. 5Koe‘uhi ‘e ai ha tokolahi te nau ha‘u ‘i he hingoa ‘o‘oku, mo nau pehē, Ko au ko e Mīsaia; pea te nau taki hē ha tokolahi. 6Pea ‘e faifai pea te mou fanongo ki ha ngaahi tau, mo ha ngaahi tala tau: tokanga ke ‘oua na‘a fakamanavasi‘i ai kimoutolu: he kuo pau ke hoko ia, kae kei tuai pē ‘a e ngata‘anga. 7Koe‘uhi ‘e tu‘u ha kakai ki ha kakai, mo ha pule‘anga ki ha pule‘anga: pea ‘e ai ha ngaahi honge mo ha ngaahi mofuike ‘i he ngaahi potu kehekehe. 8Ka ko e ngaahi me‘a kotoa ko ia ko e kamata‘anga pē ‘o e langā.
9Ko e taimi ko ia te nau tukuange kimoutolu ki he fakamamahi, pea te nau tāmate‘i kimoutolu: pea te mou fehi‘anekina ‘e he ngaahi kakai kehekehe, ko e me‘a ‘i he hingoa ‘o‘oku.#Māt 10.22 10Pea ko e taimi ko ia ‘e tūkia ha tokolahi, pea te nau tau‘aki faka‘ilo kinautolu, mo fefehi‘anaki. 11Pea ‘e tokolahi ha kau palōfita loi ‘e tupu hake, pea te nau taki hē ha tokolahi. 12Pea ko e me‘a ‘i he ope ‘o e maumau lao, ‘e faka‘a‘au ‘o momoko ‘a e ‘ofa ‘a e tokolahi. 13Ka ko ia te ne kātaki ‘o a‘u ki he ngata‘anga, ko e toko taha ko ia te ne mo‘ui.#Māt 10.22 14Pea ‘oua ke fanongonongo ki māmani kātoa ‘a e ongoongo lelei ko eni ‘o e pule‘anga, ke ai ha fakamatala ki he ngaahi kakai kotoa pē, pea toki hoko ‘a e ngata‘anga.
Ko e Me‘a Faka‘uliá
(Ma‘ake 13.14-23; Luk 21.20-24)
15Ko ia, ka mou ka vakai ‘oku tu‘u ‘i he Potu Tapu ‘a e me‘a fakalielia ‘o e faka‘auha, ‘a ia na‘e folofola ki ai ‘i he palōfita ko Tāniela; (‘ilonga ha taha ‘oku lau, pea ke ne tokanga ki ai)#Tān 9.27; 11.31; 12.11 16pea ke toki hola ki he mo‘unga ‘a kinautolu ‘oku ‘i Siutea: 17pea ko ia ‘oku ‘i he tu‘a fale ke ‘oua te ne ‘alu hifo ke ‘ave ‘a e ngaahi me‘a mei hono fale:#Luk 17.31 18pea ko ia ‘oku ‘i he ngoue, ke ‘oua te ne foki ki ‘api ke ‘ave hono kofu. 19Ka ‘oiauē ‘a kinautolu ‘oku feitama, mo kinautolu ‘oku toutama ‘i he taimi ko ia! 20Pea mou lotua ke ‘oua na‘a hoko ho‘omou hola ‘i he fa‘ahita‘u momoko, kae‘uma‘ā ‘i ha Sāpate: 21koe‘uhi ‘e toki hoko ai ha mamahi lahi, ‘a ia kuo te‘eki hano tatau mei he kamata‘anga ‘o māmani ‘o a‘u mai ki he taimi ni, ‘oi, pea ‘e ‘ikai ‘aupito toe ‘i ai.#Tān 12.1; Fkhā 7.14 22Pea ka ne ta‘e‘oua ‘a e fakanounou ‘o e taimi ko ia, pehē ‘e ‘auha ‘a e kakano kotoa pē: kae telia ‘a e kakai fili ‘e fakanounou ai ‘a e taimi ko ia.
23Pea kapau ‘e toki pehē atu ‘e ha taha, ‘Ē, ko e Mīsaia ‘oku ‘i heni, pe ‘i hena; ‘oua te mou momo‘i tui ki ai. 24Koe‘uhi ‘e tupu hake ha kau mīsaia loi, mo ha kau palōfita loi, pea ‘e ha‘u mo kinautolu ha ngaahi faka‘ilonga lahi mo e ngaahi me‘a fakaofo; ‘io, ka ne lava, na‘a mo e kakai fili ‘e taki hē ai. 25Ko eni kuo u sinaki tala atu.
26Ko ia, kapau te nau pehē kiate kimoutolu, Sī, ‘oku ne ‘i he toafa; ‘oua te mou ‘alu ki ai; Sī, ‘oku ne ‘i ha tukunga koloa; ‘oua te mou momo‘i tui ki ai.#Luk 17.23-24 27He hangē ko e pā mai ‘a e ‘uhila mei hahake, pea ‘oku hā ‘o a‘u ki hihifo; ‘e pehē foki ‘a e hoko mai ‘a e Fanautama ‘a Tangata.
28‘Ilonga ha potu ‘e ‘i ai ha ‘anga‘anga, pea ‘e fakataha ki ai ‘a e fanga ‘īkale.#Luk 17.37
Ko e Hoko Mai ‘a e Foha ‘o e Tangatá
(Ma‘ake 13.24-27; Luk 21.25-28)
29Pea hili leva ‘a e mamahi ‘o e taimi ko ia ‘e fakapo‘uli ‘a e la‘ā, pea ‘e tuku ‘e he māhina ‘ene huhulu, pea ‘e ngangana ‘a e ngaahi fetu‘u mei langi, pea ‘e ngatōtō ‘a e ngaahi mālohinga ‘o e ngaahi langi:#‘Ais 13.10; 34.4; ‘Isi 32.7; Sioelí 2.10,31; 3.15; Fkhā 6.12-13 30pea ‘e toki hā ‘i he langi ‘a e faka‘ilonga ‘o e Fanautama ‘a Tangata; pea ‘e toki lau‘aitu ‘a e ngaahi matakali ‘o māmani, pea te nau sio ki he Fanautama ‘a Tangata ‘oku hoko mai, ‘oku ne heka ki he ngaahi ‘ao ‘o e langi pea ha‘u mo ia ‘a e fakangeingei mo e nāunau lahi.#Tān 7.13; Sāk 12.10-14; Fkhā 1.7 31Pea te ne fekau atu ‘ene kau ‘āngelo ke ifi ‘a e talupite lahi; pea te nau tānaki ‘ene kakai fili mei he matangi ‘e fā, mei he ngata‘anga ‘e taha ‘o e ngaahi langi ‘o a‘u ki hono ngata‘anga ‘e taha.
Ko e Ako mei he Fu‘u Fikí
(Ma‘ake 13.28-31; Luk 21.29-33)
32Mou ma‘u mei he fiki hono fakatātā; ‘oka muimui hono muka pea ne kamata lau, ‘oku mou ‘ilo ‘oku ofi ‘a e fa‘ahita‘u māfana: 33pehē foki kimoutolu ka mou ka mamata ki he ngaahi me‘a ko ia pea mou ‘ilo kuo panaki ia, ‘io, kuo a‘u ki he matapā.#24.33 kuo panaki ia, ‘io, kuo a‘u ki he matapaá; pe kuo ofi, kuo ofi kamata. 34He ko au ē, ‘oku ou tala atu, ‘E ‘ikai ‘aupito mole ‘a e to‘utangata ko eni, kae‘oua ke hoko ‘a e ngaahi me‘a ko ia kotoa pē. 35‘E mole ‘a e langi mo māmani, ka ko ‘eku ngaahi lea ‘e ‘ikai ‘aupito mole.
Ko e ‘Ikai ‘ilo ‘e ha Taha ‘a e ‘Ahó mo e Houá
(Ma‘ake 13.32-37; Luk 17.26-30,34-36)
36Ka ko e me‘a ki he ‘aho ko ia mo hono houa, ‘oku ‘ikai ha taha ‘oku ‘ilo ki ai; ‘io, pe ko e kau ‘āngelo ‘i he langi; pea na‘a mo e ‘Alo ‘oku ‘ikai;#24.36 pea na‘a… ‘ikai; ‘Oku ‘ikai ke ‘asi ‘a e kupu‘i leá ni ‘i he ngaahi hiki fuoloa ‘e ni‘ihi. ngata pē ‘i he Tamai toko taha. 37Kae hangē ko e taimi ‘o Noa, ‘e pehē foki ‘a e hoko mai ‘a e Fanautama ‘a Tangata.#Sēn 6.5-8 38He hangē na‘e nofo ‘a e kakai ‘i he kuonga ‘o e Lōmaki, ‘o nau kai mo inu, ‘o nau ma‘u uaifi mo ma‘u husepāniti, ‘o a‘u ki he ‘aho ko ia na‘e hū ai ‘a Noa ki he ‘a‘ake; 39pea na‘e ‘ikai te nau ‘alo‘iloa kae‘oua ke hoko mai ‘a e Lōmaki, ‘o ‘ave kinautolu fuli pē: ‘e pehē foki ‘a e hoko mai ‘a e Fanautama ‘a Tangata.#Sēn 7.6-24 40Ko e taimi ko ia, ‘ene tokaange ha ongo me‘a te na ‘i he ngoue; ‘e ‘ave ‘a e taha, kae tuku ‘a e taha. 41‘Ene tokaange ha ongo fafine ‘oku fai ‘ena momosi koane; ‘e ‘ave ‘a e taha kae tuku ‘a e taha. 42Ko ia, ke mou le‘o; he ‘oku ‘ikai te mou ‘ilo pe ko e ‘aho fē ‘e hoko mai ai ‘a homou ‘Eiki. 43Ka ko e me‘a ko eni ‘oku mou lāu‘ilo ki ai, ‘oka ne tokamea‘i ‘e he Tangata‘eiki pe ko e uasi fē ‘e ha‘u ai ‘a e kaiha‘a, pehē ne le‘o, ‘o ‘ikai tuku hono fale ke haea.#Luk 12.39-40 44Ko ia, ke toka teuteu ‘a kimoutolu foki: he ko e hoko mai ‘a e Fanautama ‘a Tangata ‘e fai ‘i ha taimi ‘oku ‘ikai te mou ‘amanaki ai kiate ia.
Ko e Kau Tamaio‘eiki
(Luk 12.41-48)
45‘Io, ko hai nai ‘a e tamaio‘eiki lototō mo fai fakapotopoto, ‘a ia ne fakanofo ‘e he‘ene ‘eiki ke pule‘i hono kau nofo‘anga, mo ‘ange ‘enau me‘akai ‘i hono taimi totonu? 46Monū‘ia ā ‘a e tamaio‘eiki ko ia, ‘a ia ‘e ‘iloa ‘e he‘ene ‘eiki ‘i he‘ene hoko mai, ‘oku ne fai pehē. 47Ko au ē, ‘oku ou tala atu, te ne fakanofo ia ke ne pule ki he‘ene ngaahi me‘a kotoa. 48Ka ‘oka ka pehē ‘e he tamaio‘eiki kovi ko ena ‘i hono loto, ‘oku fakatotoka ‘e he‘eku ‘eiki ‘ene ha‘u; 49Pea ne hanga ai ‘o haha ‘a kinautolu ‘oku ‘i he kau ngāue mo ia, pea ne kai foki mo inu kava mo e kau inu; 50‘e toki ha‘u ‘a e ‘eiki ‘a e tamaio‘eiki ko ia ‘i ha ‘aho ‘oku ‘ikai te ne ‘amanekina ia, pea mo ha houa ‘oku ‘ikai te ne ‘ilo ki ai, 51pea te ne fahi ua ia,#24.51 fahi ua ia; pe lī ia ki tu‘a. pea tu‘utu‘uni ke ‘inasi fakataha ia mo e kau mā‘oni‘oni loi. Ko e potu ia ‘e toki hoko ai ‘a e tangi mo e fengai‘itaki ‘o e nifo.
Currently Selected:
Mātiú 24: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
