Mātiú 23
23
Ko e Valoki‘i ‘e Sīsū ‘a e Kau Faiako Lao mo e Kau Fālesi
(Ma‘ake 12.38-40; Luk 11.37-52; 20.45-46)
1NA‘E toki folofola ‘a Sīsū ki he ngaahi fu‘u kakai, pea mo ‘ene kau ako, 2‘o pehē, Ko e kau sikalaipe mo e Fālesi ‘oku nau ma‘u ‘a e tu‘unga ‘o Mōsese: 3ko ia, ‘ilonga ha me‘a ‘oku nau fekau kiate kimoutolu, mou fai ki ai mo tauhia; kae ‘oua na‘a mou fa‘ifa‘itaki ki he‘enau ngāue: he ‘oku nau lea kae ‘ikai fai ki ai. 4Pea ‘oku nau ha‘iha‘i ‘a e ngaahi kavenga mamafa, mo ‘ai ki he uma ‘o e kakai; ka ko kinautolu ‘oku ‘ikai te nau fie ‘ai hanau fo‘i tuhu ke hiki ia. 5Pea ka ai ha‘anau ngāue ‘oku fai, ko e fai pē ke mātā ‘e he kakai: he ‘oku nau failaketeli laulalahi, pea pao lōloa honau kofu;#23.5 pao… kofú; Ko e pao ko iá, ke faka‘ilonga‘i ‘aki ‘enau mamahi‘i ‘a e ‘Otuá (vakai kia Nōm 15.37-41). #Māt 6.1; Nōm 15.38; Teu 6.8 6pea nau manako ke tākoto ki mu‘a ‘i ha kātoanga, pea ke nofo ki mu‘a ‘i he falelotu, 7pea ke faka‘apa‘apa‘ia ‘i he mala‘e fakatau, pea ke ui ia ‘e he kakai, Lāpai.
8Ka ko kimoutolu ‘oua na‘a ui ko Lāpai: he ‘oku taha pē ho‘omou Faiako, ka ko kimoutolu ko e ngaahi tokoua kotoa pē. 9Pea ‘oua na‘a ui ha toko taha ‘i māmani ko ho‘omou tamai: he ‘oku taha pē ho‘omou Tamai, ko e Tamai Fakalangi. 10Kae‘uma‘ā ‘oua na‘a ui kimoutolu ko e kau takimu‘a: he ‘oku taha homou Takimu‘a, ko Kalaisi. 11Ka ‘oka ai ha taha ‘iate kimoutolu ‘e lahi hake, te ne nofo ko ho‘omou sevāniti.#Māt 20.26-27; Ma‘ake 9.35; 10.43-44; Luk 22.26 12Pea ko ia te ne hākeaki‘i ia ‘e fakavaivai‘i: pea ko ia te ne fakavaivai‘i ia ‘e hākeaki‘i.
Ko e Valoki‘i ‘e Sīsū ‘a e Kau Mālualoí
(Ma‘ake 12.40; Luk 11.39-42,44,52; 20.47)
13Ka ‘oiauē kimoutolu, sikalaipe mo e Fālesi, he mā‘oni‘oni loi! he ‘oku mou songo ‘a e Pule‘anga ‘o Hēvani ki he kakai ‘oku fangafanga hū ki ai: ‘io, ‘oku ‘ikai te mou fie hū kimoutolu, pea ko kinautolu ‘oku fai ke hū ‘oku ‘ikai te mou tuku ke nau hū. 14‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou folo kotoa ‘a e ngaahi ‘api ‘o si‘i kau uitou, pea mou mounu ‘aki ha lotu lōloa; ko ia, te mou ma‘u ‘e kimoutolu ha tautea ‘oku kehe ange.#23.14 ‘Oku ‘ikai ke ‘asi ‘a e vēsí ni ‘i he ngaahi hiki fuoloa ‘e ni‘ihi. (vakai kia Ma‘ake 12.40).
15‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou foli ‘a e tahi mo e fonua ke fakatafoki ha toko taha; pea ‘oka tafoki ia, ‘oku ne hoko ‘i ho‘omou ngāue ko e tama tātu‘oua ‘a Heli ‘iate kimoutolu.
16‘Oiauē kimoutolu, ‘a e kau takimu‘a kui! ho‘omou lau, Ka lea tuki ‘e ha taha ki he Fale Tapu ko e va‘inga ia, ka ‘oka lea tuki ‘e ha taha ki he koula ‘i he Fale Tapu pea pau ai ‘a e alea! 17‘a e koto vale mo kui! He ko e fē ‘oku lahi, ‘a e koula ko ia, pe ko e Fale ‘a ia ‘oku tu‘u ai ‘a e tapu ‘o e koula? 18Mo ho‘omou lau foki, Ka lea tuki ‘e ha taha ki he ‘ōlita, ko e va‘inga ia; ka ka lea tuki ‘e ha taha ki he me‘a‘ofa kuo hilifaki ki ai, pea pau ai ‘a e alea. 19‘a e koto kui! he ko e fē ‘oku lahi, ‘a e me‘a‘ofa ko ia, pe ko e ‘ōlita ‘oku tu‘u ai ‘a e tapu ‘o e me‘a‘ofa? 20‘Āua, ko ia ‘oku ne lea tuki ki he ‘ōlita, ‘oku ‘ikai te ne lea ki ai pē, ka ‘oku ne lea foki ki he me‘a kotoa pē kuo hilifaki ki ai. 21Pea ko ia ‘oku ne lea tuki ki he Fale Tapu, ‘oku ‘ikai te ne lea ki ai pē, ka kiate Ia foki ‘oku ‘afio ai. 22Pea ko ia ‘oku ne lea tuki ki he langi, ‘oku ne lea tuki ki he taloni ‘o e ‘Otua, pea mo Ia ‘oku ne ‘afio mei ai.#‘Ais 66.1; Māt 5.34
23‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou ‘atu ki he siasi ‘a e vahe hongofulu ‘o ho‘omou minite mo e ‘aneto mo e kumino; ka kuo mou tuku ‘a e ngaahi me‘a mamafa ‘o e Lao, ‘a e fakamaau totonu, mo e fai meesi, mo e lototō: ka na‘e totonu ke fai ‘eni, pea ‘oua na‘a tuku ‘ena.#Lev 27.30 24‘a e koto takimu‘a kui! ho‘omou sivi mei ho‘omou inu ‘a e namu, kae folofua ‘a e kāmeli!
25‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou fufulu ‘a e tu‘a ipu mo e tisi, ka ‘oku fokotu‘uniu ‘i loto ‘a e fakamālohi mo e ta‘efakama‘uma‘u. 26Fālesi kui! fufulu mu‘a ‘a e loto ipu, koe‘uhi ke hoko ‘o ma‘a mo tu‘a foki.
27‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou tatau tofu pē mo e ngaahi fonualoto kuo vali hina, ‘a ia ‘oku matamatalelei ‘i tu‘a nai, ka ‘i loto ‘oku fokotu‘uniu ai ‘a e hui ‘o e pekia mo e ngaahi fakalielia kehekehe.#Ngā 23.3 28Pehē ‘a kimoutolu foki; ‘i tu‘a ‘oku mou hā ki he kakai ko e kau mā‘oni‘oni, ka ‘i loto ‘oku mou pito ‘i he mā‘oni‘oni loi mo e maumau lao.
Ko e Tomu‘a Tala ‘e Sīsū hono Tauteá
(Luk 11.47-51)
29‘Oiauē kimoutolu, sikalaipe mo e Fālesi, he mā‘oni‘oni loi! he ‘oku mou langafale‘i ‘a e ngaahi fonualoto ‘o e kau palōfita, mo fakasanisani ‘a e ngaahi fale fa‘itoka ‘o e kakai lotu; 30‘o mou pehē, ‘Ē, ka ne mau ‘i he kuonga ‘o ‘emau ngaahi kui, ‘e ‘ikai te mau kau mo kinautolu ‘i he tāmate‘i ‘o e kau palōfita. 31Tā ‘oku mou fakamo‘oni kiate kimoutolu, ko e hako kimoutolu ‘o e kakai na‘a nau fakapoongi ‘a e kau palōfita. 32Pe‘i mou fakalato ā ‘a e ngafa hia ‘a ho‘omou ngaahi kui. 33‘a e fanga ngata! ‘a e hako‘i ngata fekai! Te mou hao fēfē mei he fakamaau Kihena?#Māt 3.7; 12.34; Luk 3.7 34Vakai ā! ko hono ō ia ‘oku ou fekau atu kiate kimoutolu ha kau palōfita, mo ha kau poto, mo ha kau sikalaipe: te mou tāmate‘i honau ni‘ihi mo kalusefai; pea te mou haha honau ni‘ihi ‘i homou ngaahi falelotu, pea fakafe‘ātungia mei he kolo ki he kolo: 35koe‘uhi ke ‘eke kiate kimoutolu e toto kotoa ‘o e kakai mā‘oni‘oni ‘a ia kuo lilingi ki he kelekele, mei he toto ‘o ‘Ēpeli mā‘oni‘oni ‘o a‘u ki he toto ‘o Sākalaia ko e foha ‘o Palakaia, ‘a ia na‘a mou fakapoongi ‘i he vaha‘a ‘o e Fale Tapu mo e ‘ōlita.#Sēn 4.8; 2 Kal 24.20-21 36Ko au ē, ‘oku ou tala atu, ‘E ‘eke ia kotoa pē ki he to‘utangata ko eni.
Ko e ‘Ofa ‘a Sīsū ki Selusalema
(Luk 13.34-35)
37‘A Selusalema! ‘a Selusalema! ‘a e kolo ‘oku fakapoongi ‘a e kau palōfita, mo tolongi ‘a e kakai ‘oku talafekau ki ai! hono tu‘o taha ‘eku loto ke tānaki ho‘o fānau, ‘o hangē ko e tānaki ‘e he motu‘a moa hono fānganga ‘o‘ona ki hono lalo kapakau, ka na‘e ‘ikai te mou loto ki ai! 38Ko eni kuo motuhi atu kiate kimoutolu ‘a homou fale kuo li‘aki.#Sel 22.5 39He ‘oku ou tala atu, Hili ‘eni ‘e ‘ikai ‘aupito te mou toe sio kiate au, kae‘oua ke mou pehē, Hoto ‘ofa kiate ia ‘oku hoko mai ‘i he huafa ‘o e ‘Eiki.#Saame 118.26
Currently Selected:
Mātiú 23: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
