Mātiú 22

Ko e Talanoa Fakatātā ki he Kātoanga Mali

(Luk 14.15-24)

1PEA tali ‘e Sīsū, ‘o ne toe lea kiate kinautolu ‘i ha ngaahi fakatātā, ‘o pehē, 2Kuo tatau ‘a e Pule‘anga ‘o Hēvani pea mo ha tangata, ko e tu‘i, ‘a ia na‘a ne fai ‘a e ta‘ane ‘o hono ‘alo; 3pea ne fekau atu ‘ene kau tamaio‘eiki ke ui ‘a e kakai kuo tala ki ai ‘a e kātoanga: ka na‘e ‘ikai te nau fie ha‘u. 4Pea ne toe fekau atu ha kau tamaio‘eiki kehe, ‘o ne pehē, Fakahā kiate kinautolu na‘e tala, Ko eni, kuo u ‘osi teu ‘eku pongipongi: kuo tāmate‘i ‘eku fanga pulu, mo ‘eku fanga manu tali ‘eiki, pea kuo napangapangamālie kotoa pē: mou omi ki he ta‘ane. 5Ka ka fakava‘iva‘inga ‘aki ia ‘e kinautolu, ‘o nau ‘alu ko e taha ki he‘ene ngoue, ko e taha ki he‘ene fai fakatau; 6pea ko e toe na‘a nau puke ‘ene kau tamaio‘eiki, ‘o nau pā‘usi‘i mo tāmate‘i. 7Pea houhau ai ‘a e Tu‘i, ‘o ne fekau atu ‘ene ngaahi kongakau, ‘o ne faka‘auha ‘a e kau fakapō ko ia, ‘o tutu ‘enau kolo. 8Pea toki folofola ia ki he‘ene kau tamaio‘eiki, Ko e ta‘ane kuo teu; ka ko kinautolu na‘e tala ki ai tā na‘e ‘ikai te nau taau. 9Ko ia, mou ō ki he ngaahi manga‘i hala, pea ‘ilonga ha kakai te mou ‘ilo ai, tala ke nau ha‘u ki he kātoanga. 10Pea ‘alu atu ‘a e kau tamaio‘eiki ko ia ki he ngaahi hala, ‘o nau tānaki ‘a e kakai kotoa pē na‘a nau ‘ilo ki ai, ‘a e kovi mo e lelei fakatou‘osi: pea na‘e ma‘opo ‘a e kātoanga.

11Pea ‘i he me‘a mai ‘a e Tu‘i ke vakai ‘a e kakai na‘e keinanga, na‘a ne ‘ilo ai ha tangata kuo ‘ikai te ne tui ha kofu ta‘ane. 12Pea ne folofola ki ai, Siana, na‘e fēfē ho‘o hū mai ki heni ta‘e te ke ‘ai hao kofu ta‘ane? 13Pea ne mo‘ulongoa. Pea fekau ‘e he Tu‘i ki he kau sevāniti, Ha‘i hono va‘e mo hono nima, ‘o lī ia ki he po‘uli ‘o tua‘ā. Ko e Potu ia ‘e toki hoko ai ‘a e tangi mo e fengai‘itaki ‘o e nifo.#Māt 8.12; 25.30; Luk 13.28

14He ‘oku tokolahi ‘a e ui, kae toko si‘i ‘a e fili.

Ko e Totongi Tukuhau

(Ma‘ake 12.13-17; Luk 20.20-26)

15Pea toki ‘alu ‘a e kau Fālesi, ‘o nau puleaki‘i pe ‘e fēfē ha‘anau tauhele ia ‘i he alea. 16Pea nau fekau atu kiate ia ‘enau kau ako fakataha mo e fa‘ahi ‘a Hēlota, ‘a ia na‘a nau pehē, Tangata‘eiki ‘oku mau ‘ilo ‘oku ke mo‘oni koe, pea ‘oku ke ako totonu ‘aki ‘a e hala ‘o e ‘Eiki, pea ‘oku ‘ikai te ke toka‘i ha taha: koe‘uhi ‘oku ‘ikai te ke filifilimānako. 17Ko ia ke ke tala mai pe ko e hā ho‘o poa, pe ‘oku ngofua ke tukuhau kia Sisa, pe ‘ikai?

18Ka ka mea‘i ‘e Sīsū ‘enau kovi, ‘o ne pehē, ‘A e kau mālualoi, ko e hā ‘oku mou ‘ahi‘ahi‘i ai au? 19faka‘ali‘ali mai ‘a e pa‘anga tukuhau. Pea nau ‘omi kiate ia ha fo‘i tēnali.

20Pea pehē ‘e ia kiate kinautolu, Ko e fofonga ‘ena mo e hingoa ‘o hai?

21Pea nau pehē, ‘o Sisa.

Pea folofola ‘e ia kiate kinautolu, Pe‘i ‘ange kia Sisa ‘a e ngaahi me‘a ‘a Sisa; pea ki he ‘Otua ‘a e ngaahi me‘a ‘a e ‘Otua.

22Pea ‘i he‘enau fanongo ki ai na‘a nau ofo; pea nau tuku ia ‘o nau ‘alu.

Ko e Ngaahi Fehu‘i ‘o Kau ki he Toetu‘u mo e Pekia

(Ma‘ake 12.18-27; Luk 20.27-40)

23Ko e ‘aho ko ia na‘e ‘unu‘unu atu ai kiate ia ha kau Sātusi, ko ‘enau pehē ‘oku ‘ikai ha toetu‘u;#Ngā 23.8 24‘o nau fai ha fehu‘i kiate ia, ‘o pehē, Tangata‘eiki, na‘e pehē ‘e Mōsese, Kapau ‘e pekia ha tangata ta‘eha‘ane fānau, pea ke mali hono tokoua mo e finemotu‘a, ‘o ne fakatupu ha hako ki hono tokoua.#Teu 25.5 25Pea ko eni, na‘e nofo mo kimautolu ha tu‘unga me‘a ‘e toko fitu, ko e tautehina: pea mali ‘a e ‘uluaki ‘o pekia, pea ko e me‘a ‘i he ‘ikai hano hako na‘a ne tuku hake hono finemotu‘a ki hono tehina. 26Pehē foki ‘a hono toko ua, mo hono toko tolu, kae‘oua ke ‘osi ‘a e toko fitu. 27Pea toki pekia kimui ‘a e fefine. 28Pea ‘i he toetu‘u te ne hoko ko e uaifi ‘o hai ‘i he toko fitu? he na‘a nau ma‘u ia kotoa pē.

29Ka ka tali ‘e Sīsū, ‘o ne pehē kiate kinautolu, ‘oku mou hē, ko e ta‘e te mou ‘ilo ‘a e Tohitapu, kae‘uma‘ā ‘a e māfimafi ‘o e ‘Otua. 30He ‘oku ‘ikai ha ma‘u uaifi, pe ha ma‘u husepāniti ‘i he toetu‘u, ka ‘oku nau hangē ko e kau ‘āngelo ‘i he langi. 31Ka ko e me‘a ki he toetu‘u ‘a e pekia, ne ‘ikai te mou lau koā ‘a e folofola ‘a e ‘Otua kiate kimoutolu, ‘o pehē, 32Ko au ko e ‘Otua ‘o ‘Epalahame, pea ko e ‘Otua ‘o ‘Aisake, pea ko e ‘Otua ‘o Sēkope? Ko e ‘Otua ‘oku ‘ikai ko e me‘a ia ‘a ha kau mate, ka ‘a ha kau mo‘ui.#‘Eki 3.6

33Pea ‘i he fanongo ki ai ‘a e ngaahi fu‘u kakai, na‘e to‘oa honau loto ‘i he anga ‘o ‘ene ako.

Ko e Fekau Mamafa Tahá

(Ma‘ake 12.28-34; Luk 10.25-28)

34Ka ko e kau Fālesi, ‘i he‘enau fanongo kuo ne fakasīlongo‘i ‘a e kau Sātusi, na‘a nau fakataha ki he potu ko ia. 35Pea ko honau toko taha, ko e tufungalao, na‘a ne fai ha fehu‘i ki ai, ko ‘ene ‘ahi‘ahi‘i ia, ‘o ne pehē,#Luk 10.25-28 36Tangata‘eiki, ko e fa‘ahinga tu‘utu‘uni fē ‘i he Lao ‘oku mamafa taha?

37Pea ne pehē ki ai, Te ke ‘ofa ki he ‘Eiki ko ho ‘Otua, ‘o fai‘aki ‘a e kotoa ‘o ho loto, mo e kotoa ‘o ho laumālie, mo e kotoa ‘o ho ‘atamai.#Teu 6.5 38Ko eni ia ‘a e tu‘utu‘uni ‘oku mamafa taha mo tu‘ukimu‘a. 39Pea ‘oku fa‘ahinga mo ia ‘a hono ua, Te ke ‘ofa ki ho kaungā‘api ‘o hangē ko ho‘o ‘ofa kiate koe.#Lev 19.18 40Ko e ongo tu‘utu‘uni ko eni ‘e ua ‘oku tautau ki ai ‘a e Lao kotoa mo e Tohi Palōfita.

Ko e Fehu‘i ‘o Kau ki he Mīsaiá

(Ma‘ake 12.35-37; Luk 20.41-44)

41Pea lolotonga kuo fakataha mai ‘a e kau Fālesi, pea fai ‘e Sīsū ‘ene fehu‘i kiate kinautolu, ‘o pehē, 42Ko e hā ho‘omou poa ki he Mīsaia? Ko e hako nai ia ‘o hai?

Pea nau tali, ‘O Tēvita.

43Pea pehē ‘e ia kiate kinautolu, Kae fēfē ai hono ui ko e ‘Eiki ‘e Tēvita ‘i he‘ene Laumālie‘ia, ‘o ne pehē,

44Ne folofola ‘e he ‘Eiki ki hoku ‘Eiki,#Saame 110.1 Nofo koe ‘i hoku to‘omata‘u,

Kae‘oua ke u ‘ai ho fili ki ho lalo va‘e?

45Pea kapau ‘oku ui ia ‘e Tēvita ko hono ‘Eiki, pea ko hono hako fēfē ia?

46Pea na‘e ‘ikai ha taha ‘e lava ha‘ane momo‘i tali; pea hili ‘a e ‘aho ko ia na‘e ‘ikai toe ai ha toko taha ‘e fakato‘oto‘a ke fai ha fehu‘i kiate ia.

Currently Selected:

Mātiú 22: TMB

Highlight

Compare

Copy