Mātiú 21

Ko e A‘u ‘a Sīsū ki Selusalema

(Ma‘ake 11.1-11; Luk 19.28-38; Sioné 12.12-19)

1PEA ‘i he‘enau ofi ki Selusalema, pea kuo nau a‘u ki Petefesi ‘i he mo‘unga ko ‘Ōlive, na‘e toki fekau atu ‘e Sīsū ha ongo ako ‘e toko ua, 2‘o ne pehē kiate kinaua, Mo ō ki he vilisi ko ena ‘oku hanga mai, pea te mo ‘ilo leva ki ha ‘asi ‘oku no‘otaki, pea ai mo hono ‘uhiki: vete, ‘o taki mai. 3Pea ka ai ha lea ‘e fai atu ‘e ha taha, pea mo pehē, ‘Ou fiema‘u kinaua ‘e he ‘Eiki;#21.3 ‘Eiki; pe tokotaha ‘oku ‘o‘oná. pea te ne tuku mai leva kinaua.

4Pea na‘e fai ‘eni koe‘uhi ke fakamo‘oni ki he me‘a ne folofola‘aki ‘i he palōfita, ‘o pehē,

5Mou lea ki si‘i Saione,#Sāk 9.9

Ko ena ho Tu‘i ‘oku me‘a mai kiate koe.

Ko e ‘Eiki fa‘a kātaki, pea ‘oku ne heka ki ha ‘asi:

‘Io, ki ha ki‘i manu,

Ko e tama ‘a ha manu toho palau.

6Pea ‘alu ‘a e ongo ako, ‘o na fai ‘o hangē ko e tu‘utu‘uni kinaua ‘e Sīsū; 7pea na taki mai ‘a e ‘asi mo hono ‘uhiki, pea nau ‘ai ki ai honau ngaahi pulupulu, pea ne heka ai. 8Pea ko e fu‘u tokolahi ‘o e kakai na‘a nau falikiliki ‘a e hala ‘aki honau pulupulu ‘onautolu; pea ko e ni‘ihi na‘a nau tu‘usi ‘a e ngaahi va‘akau, ‘o falikiliki ‘aki ‘a e hala. 9Pea ko e fu‘u kakai na‘e ‘alu mu‘omu‘a ‘iate ia, pea mo kinautolu na‘e muimui mai, na‘a nau fekālanga‘i ‘o pehē,

Hōsana ki he Hako ‘o Tēvita!

Hoto ‘ofa kiate ia ‘oku hoko mai ‘i he huafa ‘o e ‘Eiki!

Hōsana ki Langi Taupotu!#Saame 118.25,26

10Pea ‘i he‘ene hū ki Selusalema, na‘e ngatū ‘a e kolo kotoa, ‘o nau pehē, Ko hai ‘eni?

11Pea tali ‘e he fu‘u fononga, Ko Sīsū ‘eni ko e palōfita mei Nāsaleti ‘i Kāleli.

Ko e Hū ‘a Sīsū ki he Temipalé

(Ma‘ake 11.15-19; Luk 19.45-48; Sioné 2.13-22)

12Pea hū ‘a Sīsū ki he Temipale, ‘o ne kapusi ‘a kinautolu kotoa pē na‘e fakatau atu mo fakatau mai ‘i he Temipale, ‘o ne fulihi ‘a e ngaahi tēpile ‘a e kau fetongi pa‘anga, mo e ngaahi nofo‘a ‘o e kakai na‘e ‘omi lupe ke fakatau; 13pea ne pehē kiate kinautolu, Kuo tohi, Ko hoku fale ‘e ui ko e falelotu; ka ko kimoutolu ‘oku mou ngaohi ia ko e ‘ananga ‘o ha kaiha‘akau.#‘Ais 56.7; Sel 7.11

14Pea na‘e ha‘u kiate ia ‘i he Temipale ha kau kui mo ha kau heke, pea ne fakamo‘ui kinautolu.

15Ka ko e hou‘eiki taula‘eiki mo e kau sikalaipe, ‘i he‘enau vakai ki he ngaahi me‘a fakaofo na‘a ne fai, mo e kau tamaiki ‘oku nau kalanga ‘i he Temipale, ‘o pehē, Hōsana ki he Hako ‘o Tēvita; na‘a nau ‘ita; 16pea nau pehē kiate ia, ‘oku ke fanongo ki he me‘a ‘oku lau ‘e kinautolu na?#Saame 8.2 (LXX)

Pea pehē ange ‘e Sīsū, ‘Io: pea kuo te‘eki koā ke mou lau, ‘o pehē,

Ko e ngutu ‘o e tamaiki mo e valevale

Kuo ke tu‘utu‘uni mei ai hao fakamālō.

17Pea ne mahu‘i meiate kinautolu, ‘o ne ‘alu mei ai kitua‘ā kolo, ki Pētani, ‘o ne toka ‘i he potu ko ia.

Ko e Talatuki‘i ‘e Sīsū ha Fu‘u Fiki

(Ma‘ake 11.12-14,20-24)

18Pea pongipongi hake, ‘i he‘ene foki ki he kolo, na‘a ne hālofia. 19Pea ‘i he‘ene vakai ki ha fu‘u fiki ‘oku tu‘u taha ‘o heke mai ki hala, na‘a ne ‘alu ki ai; ka na‘e ‘ikai te ne ‘ilo ai ha me‘a, ko e ngaahi lau pē. Pea folofola ia ki ai, ‘o pehē, Ke ‘oua na‘a toe ai hao fua ‘o ta‘engata. Pea mate leva ‘a e fu‘u fiki.

20Pea ‘i he mamata ki ai ‘a e kau ako, na‘a nau ofo, ‘o nau pehē, Na‘e fēfē ‘ene mate vave pehē ‘a e fu‘u fiki?

21Pea tali ‘e Sīsū ‘o ne pehē kiate kinautolu, Ko au ē, ‘oku ou tala atu, Kapau te mou tui, ‘o ‘oua ‘e tāla‘a, ‘e ‘ikai ngata ‘i he me‘a kuo fai ki he fiki ‘a e me‘a te mou lava; ka ‘o kapau te mou lea ki he mo‘unga ni, Fei mo mahiki koe, ‘o patū ki tahi; pea ‘e hoko.#Māt 17.20; 1 Kol 13.2 22Pea ko e me‘a kotoa pē te mou kole‘i he hū, ‘o mou tui pē, te mou ma‘u.

Ko e Fehu‘i he Mafai ‘o Sīsū

(Ma‘ake 11.27-33; Luk 20.1-8)

23Pea kuo ne hū ki he Temipale, pea ko e hou‘eiki taula‘eiki mo e kau mātu‘a ‘o e kakai Siu na‘a nau ‘unu‘unu kiate ia ‘i he‘ene faiako, ‘o nau pehē, Ko e hā ho tu‘unga ‘oku ke fai ai ‘a e ngaahi me‘a ko eni? Pea ko hai na‘a ne tuku kiate koe ‘a e tu‘unga ko ia?

24Pea tali ‘e Sīsū, ‘o ne pehē kiate kinautolu, Ka u fai atu mo au ha‘aku fehu‘i ‘e taha, pea kapau te mou tali mai, pea te u toki fakahā atu pe ko e hā hoku tu‘unga ‘oku ou fai ai ‘a e ngaahi me‘a ko eni. 25Ko e fai papitaiso ‘a Sione na‘e mei fē ia? mei he langi, pe mei he tangata? Pea nau fekīhiaki, ‘o pehē, Kapau te tau tali, mei langi; te ne pehē mai, pea ko e hā ai na‘e ‘ikai te mou tuitala kiate ia?

26Pea kapau te tau pehē, Mei he tangata; kae telia ‘a e kakai; he ‘oku nau lau kotoa pē ko e palōfita ‘a Sione. 27Pea nau tali kia Sīsū ‘o pehē, ‘oku ‘ikai te mau ‘ilo.

Pea lea ai mo ia kiate kinautolu, pea ‘e ‘ikai ā te u tala atu ‘e au pe ko e hā hoku tu‘unga ‘oku ou fai ai ‘a e ngaahi me‘a ko eni.

Ko e Talanoa ki he Ongo Foha

28Ka ko e hā ho‘omou poa ki he me‘a ni? Tokua na‘e ai ha tangata mo hono ongo foha; pea ne ‘unu‘unu atu ki he ‘uluaki, ‘o ne pehē, Tama, ke ke ‘alu ‘o ngāue he ‘aho ni ‘i he ngoue vaine. 29Ka ka tali ‘e ia, ‘o ne pehē, ‘E ‘ikai: ka na‘e tautea ia ‘e hono loto ki mui, ‘o ne ‘alu. 30Pea ne ‘unu‘unu ki he tama ‘e taha, ‘o ne lea ki ai ‘o hangē ko e ‘anenai.

Pea tali ‘e ia, ‘o ne pehē, ‘Oku lelei, Tangata‘eiki: ka na‘e ‘ikai ‘alu ia.

31Ko e fē nai ‘i he ongo tama ne ne fai ‘a e tu‘utu‘uni ‘a ‘ena tamai?

Pea nau pehē, Ko e ‘uluaki.

Pea pehē ‘e Sīsū kiate kinautolu, Ko au ē, ‘oku ou tala atu, Ko e kau pōpilikane mo e kau fe‘auaki ‘oku nau takimu‘a kiate kimoutolu ‘i he hū ki he Pule‘anga ‘o e ‘Otua.

32He na‘e ha‘u ‘a Sione kiate kimoutolu ‘i he hala ko e tauhi tu‘utu‘uni, pea na‘e ‘ikai te mou tuitala ki ai: ka ko e kau pōpilikane mo e fe‘auaki na‘a nau tuitala ‘e kinautolu: pea ko kimoutolu, neongo na‘a mou sio ki ai, ka na‘e ‘ikai tautea homou loto kimui ke mou tuitala kiate ia.#Luk 3.12; 7.29-30

Ko e Kau Nofo Lisi he Ngoue Vaine

(Ma‘ake 12.1-12; Luk 20.9-19)

33Mou fanongo mai ki ha fakatātā ‘e taha: Tokua na‘e ai ha tangata, ko e matāpule, ‘a ia na‘a ne tō ha ngoue vaine, pea na‘a ne ‘aa‘i takai ia, mo ne foa ai ha tata‘o‘anga kālepi, ‘o ne langa ai ha taua, pea ne tuku ke lisi e ha kau fa‘a, ‘o ne ‘alu ki muli.#‘Ais 5.1-2 34Pea ‘i he ofi ‘a e to‘ukai kālepi, na‘a ne fekau atu ‘ene kau tamaio‘eiki ki he kau fa‘a ke ma‘u mai hono ‘inasi: 35ka ka puke ‘e he kau fa‘a ‘ene kau tamaio‘eiki, ‘o nau haha ha toko taha, pea tāmate‘i ha toko taha, pea tolomaka‘i ha toko taha. 36Pea ne toe fekau atu mo ha tu‘unga tamaio‘eiki kehe, ‘o tokolahi ‘i he fua ō: pea nau ngaohi ‘a kinautolu ‘o hangē ko e ‘uluaki. 37Pea na‘a ne fekau atu kimui hono foha, he‘ene pehē, Te nau toka‘i hoku foha. 38Ka ko e kau fa‘a ‘i he‘enau mamata ki he foha, na‘a nau fealēlea‘aki, ‘o pehē, Ko e hoko ‘ena; ‘ē, tau tāmate‘i mu‘a ia, ‘o tau ma‘u hono tofi‘a. 39Pea nau puke ia ‘o toho ki he tua‘ā ngoue, ‘o nau tāmate‘i ai.

40Pea ka ‘iloange ai ‘e hoko mai ‘a e ‘eiki ‘o e ngoue vaine, ko e hā te ne fai ki he kau fa‘a ko ia?

41Pea nau pehē kiate ia, Te ne faka‘auha fakalielia‘i ‘a e kau fakalielia ko ia, pea te ne tuku ke lisi ‘a e ngoue ‘e ha kau fa‘a kehe, ‘a ia ko e fa‘ahinga te nau ‘ange hono ‘inasi ‘i hono taimi totonu.

42Pea lea ‘a Sīsū kiate kinautolu, Kuo te‘eki koā ke mou lau ‘i he Tohitapu?#Saame 118.22-23

Ko e maka ne fakatale‘i ‘e he kau tufunga

Kuo hoko ‘o tuliki tau‘olunga:

Ko e me‘a mei he ‘Eiki ia, pea fakaofo ki hotau mata.

43Ko ia, ‘oku ou tala atu, ‘E to‘o meiate kimoutolu ‘a e Pule‘anga ‘o e ‘Otua, pea ‘e tuku ki ha kakai ‘oku fua ‘o taau mo ia. 44Pea ko ia te ne tō ki he maka ko ia ‘e mafesifesi: ka ka ‘ilonga ‘a ia ‘e tō ‘a e maka ki ai ‘e laiki ke efu.#21.44 ‘Oku ‘ikai ke ‘asi ‘a e vēsí ni ‘i he ngaahi hiki fuoloa ‘e ni‘ihi. (vakai kia Luk 20.18).

45Pea ‘i he fanongo ‘a e hou‘eiki taula‘eiki mo e kau Fālesi ki he‘ene ngaahi fakatātā, na‘a nau ‘ilo ‘oku kau ‘ene lea kiate kinautolu. 46Pea nau feinga ke puke ia, ka nau manavahē pē ki he kakai, ko ‘enau lau ko e palōfita ia.

Currently Selected:

Mātiú 21: TMB

Highlight

Compare

Copy