Mātiú 15
15
Ko e Tukufakaholo ‘a e Kau Mātu‘á
(Ma‘ake 7.1-13)
1PEA na‘e toki ha‘u kia Sīsū mei Selusalema ha kau Fālesi mo ha kau sikalaipe, ‘o nau pehē, 2Ko e hā ‘oku laka kehe ai ‘a ho‘o kau ako pea mo e lau ‘a e mātu‘a? he ‘oku ‘ikai te nau fanofano honau nima ‘i he‘enau nofo ke kai.
3Ka ka tali ‘e ia, ‘o ne pehē kiate kinautolu, Ko e hā ‘oku mou laka kehe ai foki kimoutolu pea mo e lao ‘a e ‘Otua, koe‘uhi ko e lau fakaeono‘aho ‘amoutolu? 4He ko e tu‘utu‘uni ‘a e ‘Otua na‘e pehē, Faka‘apa‘apa ki ho‘o tamai mo ho‘o fa‘ē: mo ‘eni, Ko ia te ne lea kovi ki he‘ene tamai, pe ko ‘ene fa‘ē; ke ne mate tāmate‘i.#‘Eki 20.12; 21.17; Teu 5.16; Lev 20.9 5Ka ‘oku mou pehē, ‘Ilonga ‘a ia te ne pehē ki he‘ene tamai, pe ko ‘ene fa‘ē ‘Ā, kuo tuku ki he ngāue ‘a e ‘Eiki ‘a e me‘a na‘a ku mei ‘aonga ai kiate koe: 6pea ‘e ‘ikai leva te ne fai ‘ene faka‘apa‘apa ki he‘ene tamai,#15.6 tamai; ‘Oku pehē ‘i hono ngaahi hiki fuoloa ‘e ni‘ihi: tamaí pe ko ‘ene fa‘eé. pe ko ‘ene fa‘ē: pea tā kuo mou fakata‘e‘aonga‘i ‘a e lao ‘a e ‘Otua ‘aki ho‘omou lau fakaeono‘aho. 7‘a e kau mālualoi! ‘E hala ā ‘a e palofisai ‘a ‘Aisea ‘iate kimoutolu, ‘o pehē, 8Ko e kakai ni ‘oku nau faka‘apa‘apa kiate au ‘aki honau loungutu,#‘Ais 29.13 (LXX) ka ko honau loto ‘oku fakamama‘o. 9Ka ko e kula noa ‘enau lotu mai; ‘oku nau ako ‘aki ha ngaahi tokāteline ‘a ia ko e ngaahi tu‘utu‘uni pē ‘a e tangata.
Ko e Ngaahi Me‘a ‘Oku ‘Uli ai ha Taha
(Ma‘ake 7.14-23)
10Pea ne ui ange ‘a e kakai, ‘o ne pehē kiate kinautolu, Fanongo mai ka mou ‘ilo. 11‘Oku ‘ikai ko e me‘a ‘oku hū ki he ngutu ‘oku ‘uli ai ha tangata, ka ko ia ‘oku hū mei he ngutu, ko eni ia ‘oku ‘uli ai ‘a e tangata.
12Pea na‘e toki ‘unu‘unu atu ‘e he kau ako, ‘o nau pehē ki ai, ‘oku ke mea‘i na‘e tūkia ai ‘a e kau Fālesi, ‘i he‘enau fanongo ki he lea na?
13Ka ka tali ‘e ia ‘o pehē, ‘Ilonga ha tō ‘akau, ‘a ia na‘e ‘ikai ko e fai ‘e he‘eku Tamai ‘oku ‘i he langi, ‘e ta‘aki fu‘u ia. 14Tuku ai pe ā ‘a kinautolu: ko e koto takimu‘a kui kinautolu, pea ka taki ‘e he kui ‘a e kui, te na fakatou tō ki ha luo.#Luk 6.39
15Pea tali ‘e Pita ‘o lea ki ai, Fakamatala mai ‘a e fakatātā ni.
16Pea ne pehē, ‘oku kei ta‘e‘ilo mo kimoutolu foki? 17Kuo te‘eki koā ke mahino atu, ka ‘ilonga ha me‘a ‘oku hū ki he ngutu, ‘oku mole ia ki he kete, pea toki laku atu ki tua‘ā? 18Ka ko e ngaahi me‘a ‘oku hū mei he ngutu ‘oku mei he loto; pea ko ‘ena pē me‘a ‘oku ‘uli ai ‘a e tangata.#Māt 12.34 19He ‘oku mei he loto ‘a e ngaahi fakakaukau pango, ‘a e ngaahi fakapō, ‘a e ngaahi faikovi ‘a alafia, ‘a e ngaahi fe‘auaki. ‘A e ngaahi kaiha‘a, ‘a e ngaahi tukuaki, ‘a e ngaahi laukovi ki he ‘Otua. 20Ko eni ‘a e ngaahi me‘a ‘oku ‘uli ai ha tangata: ka ko e kai ta‘efanofano ‘oku ‘ikai ‘uli ai ‘a e tangata.
Ko e Tui ‘a ha Fefine
(Ma‘ake 7.24-30)
21Pea ‘alu ‘e Sīsū mei he feitu‘u ko ia, ‘o ne mole ki he ngaahi potu ‘o Taia mo Saitoni. 22Pea ‘iloange, ko ha fefine Kēnani na‘e nofo ‘i he tafa‘ifonua ko ia, na‘a ne ‘alu atu ‘o kalanga, ‘o pehē, ‘E ‘Eiki, ko e Hako ‘o Tēvita, ke ke ‘alo‘ofa mai: ko si‘eku ta‘ahine ko e me‘a kovi ange hono ‘āvea.
23Ka na‘e ‘ikai ha‘ane ki‘i lea ki ai. Pea ‘unu‘unu atu ‘ene kau ako, ‘o nau kole kia Sīsū, ‘o pehē, Faka‘ata‘atā ange ‘a e fefine, he ‘oku ne tangi toupili mai.
24Ka ka tali ‘e ia ‘o ne pehē, Kuo ‘ikai fekau mai au, ka ki he fanga sipi kuo mole ‘i he hako ‘o ‘Isileli.
25Pea ha‘u ‘a e fefine, ‘o tū‘ulutui kiate ia, ‘o ne pehē, ‘Eiki, tokoni mai.
26Ka ka tali ‘e ia, ‘o ne pehē, ‘oku ‘ikai ngofua ke to‘o ‘a e mā ‘a e fānau, ‘o lī ki he fanga kulī.
27Pea pehē ‘e he fefine, Ka na‘e fai, ‘Eiki; he ‘oku kai ‘a e fanga kulī foki he ngaahi momo ‘oku ngangana mei he tēpile ‘a honau ‘eiki.
28Pea tali ‘e Sīsū ‘o ne pehē kiate ia, Fefine, tā ‘oku lahi ho‘o tui; ‘e fai ma‘au ‘a e me‘a ‘oku ke loto ki ai. Pea na‘e mo‘ui ‘ene ta‘ahine mei he feitu‘ula‘ā ko ia.
Ko e Fakamo‘ui ‘e Sīsū ha Tokolahi
29Pea kuo hiki ‘a Sīsū mei ai, na‘a ne ‘alu ‘o ofi ki he Tahi ‘o Kāleli; pea ne fai hake ki he mo‘unga, ‘o nofo hifo ai. 30Pea ‘alu atu kiate ia ha ngaahi fu‘u kakai, ‘o nau omi mo kinautolu ha ni‘ihi na‘e heke, mo e ni‘ihi na‘e kui, mo e ni‘ihi na‘e noa, mo e ni‘ihi na‘e pai, pea mo ha tokolahi na‘e puke kehe: ‘o nau laku kinautolu ki he va‘e ‘o Sīsū, pea ne fakamo‘ui kinautolu. 31Pea ofo ai ‘a e kakai, he‘enau sio ki he noa ‘oku lea, mo e pai ‘oku mo‘ui, mo e heke ‘oku ‘eve‘eva, mo e kui ‘oku ‘ā: pea nau fakamālō‘ia ‘a e ‘Otua ‘o ‘Isileli.
Ko e Fafanga ‘e Sīsū ‘a e Toko Fā Afe
(Ma‘ake 8.1-10)
32Pea ui ange ‘e Sīsū ‘ene kau ako, ‘o ne pehē, ‘oku langa hoku fatu ‘i he ‘ofa ki he kakai ni, he ko e ‘aho tolu mālō ‘eni mo ‘enau nofo mai, pea ‘oku ‘ikai ha‘anau me‘a tokoni: pea ‘oku ‘ikai te u loto ke tukuange kinautolu fiekaia, na‘a ‘iloange te nau pōngingia ‘i he hala.
33Pea pehē kiate ia ‘e he kau ako, Te tau ma‘u mei fē ‘i he lala ha mā pehē, ke totofu ai ha fu‘u kakai ‘oku pehē ni fau?
34Pea pehē ange ‘e Sīsū, ‘oku fiha ho‘omou fo‘i mā?
Pea nau tali, ‘oku fitu: mo e ngaahi mata‘i ika.
35Pea ne fekau ki he kakai ke nau tākoto atu ‘i he funga kelekele. 36Pea na‘a ne to‘o ‘a e fo‘i mā ‘e fitu, mo e ngaahi ika; pea ne fakafeta‘i; ‘o ne toki pakipaki, ‘o toutou ‘ange ki he kau ako, pea ‘ange ‘e he kau ako ki he kakai. 37Pea nau kai kotoa pē, ‘o mākona; pea nau tānaki ‘a e ngaahi mapakipaki‘i mā na‘e toe, pea pito ai ‘a e kato ‘e fitu. 38Pea ko kinautolu na‘e tokoni na‘e toko fā afe ‘a e tangata, ‘o ta‘elau ai ‘a e fefine mo e tamaiki iiki.
39Pea na‘a ne tukuange ‘a e kakai, ‘o ne heka ki he vaka, ‘o ne a‘u ki he ngaahi feitu‘u ‘o Makatani.
Currently Selected:
Mātiú 15: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
