KO MALAKAI 4
4
Kuo Panaki ‘a e ‘Aho ‘o Sihová
1He vakai, ‘oku hoko mai ‘a e ‘aho ko ē ‘oku ne ulo hangē ha ngoto‘umu; pea ‘iloange ko e kau pau‘u, mo e kau nofo ke faikovi, te nau hoko ko e veve, pea tutu kinautolu ‘e he ‘aho ‘oku ha‘u–ko e folofola ia ‘a Sihova Sāpaoti. Seuke, ‘e ‘ikai te ne tuku kiate kinautolu ha aka, pe ha va‘a. 2Ka ‘e hopo ‘a e La‘ā ‘o e Totonu kiate kimoutolu ‘oku ‘apasia ki hoku hingoa, pea ‘oku ai ha faito‘o ‘i hono ngaahi huelo:#4.2 pe kapakau. toki ‘alu atu kimoutolu, ‘o hopo fano, ‘o hangē ko e fanga pulu mui mei he ‘ā fafanga. 3Pea te mou malaki ‘a e kau angahala: seuke, te nau hoko ko e efuefu pe ‘i homou lalo va‘e, ‘i he ‘aho ‘oku ou kotofa–ko e folofola ia ‘a Sihova Sāpaoti.
4Manatu ki he Lao ‘a Mōsese ko ‘eku Sevāniti ‘a ia na‘a ku tu‘utu‘uni kiate ia ‘i Hōlepi, ke hilifaki ki ‘Isileli kātoa, ‘a e ngaahi fekau mo e ngaahi kupu‘i konisitūtone.
5Ko au eni ‘oku ou te u fekau atu ‘a e palōfita ko ‘Ilaisiā ‘i he te‘eki ke hoko ‘a e ‘Aho ‘o Sihova, ‘a e ‘aho lahi mo fakalilifu.#Māt 11.14; 17.10-13; Ma‘ake 9.11-13; Luk 1.17; Sioné 1.21 6Pea te ne fakafoki mai ‘a e loto ‘o e mātu‘a ki he fānau, mo e loto ‘o e fānau ki he‘enau mātu‘a; na‘a ‘iloange te u ha‘u, ‘o taa‘i ‘a e fonua ‘aki ‘a e mala.
Currently Selected:
KO MALAKAI 4: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.