Mātiú TALATEU
TALATEU
Ko e Kōsipeli na‘e tohi ‘e Mātiú ko e ongoongolelei ia kia Sīsū ko e Fakamo‘ui na‘e tala‘ofá, ‘a e Tokotaha ‘e fakahoko mai ai ‘a e ngaahi tala‘ofa na‘e fai ‘e he ‘Otuá ki hono kakaí ‘i he Fuakava Motu‘á. ‘Oku ‘ikai ko e ongoongolelei pē ia ki he kakai Siú, ‘a ia na‘e ‘alo‘i mai ai ‘a Sīsuú, peá ne tupu hake aí, ka ko e ongoongolelei ai pē ki māmani kātoa.
Ko Mātiu ‘oku maau ‘aupito hono fokotu‘utu‘ú. ‘Oku kamata ‘aki ‘a e ‘alo‘i mai ‘o Sīsuú, hoko ai ki hono papitaisó mo hono ‘ahi‘ahi‘í, pea hoko atu ai ki he‘ene malanga, faiako, mo fakamo‘ui mahaki ‘i Kāleli. Hili iá ‘oku fakamatala ‘a Mātiu ki he fononga ‘a Sīsū mei Kāleli ki Selusalema, mo e ngaahi me‘a na‘e hoko ‘i he uike faka‘osi ‘o e nofo ‘a Sīsū ‘i māmaní, ‘o faka‘osi ki hono kalusefaí mo ‘ene toetu‘ú.
‘Oku fakafōtunga‘i mai ‘a Sīsū ‘i he Kōsipelí ni ko e faiako fungani, ‘a ia ‘oku ‘i ai hono fu‘u mafai lahi hono faka‘uhinga‘i e Lao ‘a e ‘Otuá, peá ne ako‘i ki he kakaí ‘a e anga ‘o e Pule‘anga ‘o e ‘Otuá. Ko ‘ene ngaahi akonakí ‘oku tānaki ‘o fakamā‘opo‘opo ke konga ‘e nima: 1) Ko e malanga he Mo‘ungá, ‘a ia ‘oku kau ki he ngaahi ‘ulungāanga, fatongia, tāpuaki, mo e kaha‘u ‘o e kakai ‘o e Pule‘anga ‘o Hēvaní (vahe 5-7); 2) Ko e ngaahi fakahinohino ki he‘ene kau ako ‘e toko hongofulu mā uá ‘o fekau‘aki mo ‘enau ngāué (vahe 10); 3) Ko e ngaahi talanoa fakatātā ‘o fekau‘aki mo e Pule‘anga ‘o Hēvaní (vahe 13); 4) Ko e fakahinohino ‘o fekau‘aki mo e anga ‘o e kaungāfononga mo Kalaisi (vahe 18); pea 5) Ko e ngaahi fakahinohino ‘o fekau‘aki mo e ngata‘anga ‘o e kuonga lolotongá pea mo e hoko mai ‘a e Pule‘anga ‘o Hēvaní (vahe 24-25).
Ko e Kakano ‘o e Tohí
Ko e tohi hohoko mo e ‘alo‘i mai ‘o Sīsū Kalaisí (1.1–2.23)
Ko e ngāue ‘a Sione Papitaiso (3.1-12)
Ko hono papitaiso mo ‘ahi‘ahi‘i ‘o Sīsū (3.13–4.11)
Ko e ngāue ‘a Sīsū ki he kakaí ‘i Kāleli (4.12–18.35)
Ko e fou ‘a Sīsū mei Kāleli ki Selusalema (19.1–20.34)
Ko e uike faka‘osi ‘o e nofo ‘i māmani ‘a Sīsuú ‘i Selusalema pea ofi ki Selusalema (21.1–27.66)
Ko e toetu‘u mo e hāhā holo ‘a e ‘Eikí (28.1-20)
Currently Selected:
Mātiú TALATEU: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.