KONI TANGILĀULAU 4
4
1 a ‘OIAUĒ ‘a e hoko ‘a e koula ‘o nenefu!
‘a e liliu ‘a e koula tafesino‘ivai!
‘a e malingi noa ‘a e ngaahi maka tapu
‘I he tuliki ‘o e hala kotoa!
2 b Si‘i ngaahi foha mahu‘inga ‘o Saione,
Ko e fa‘ahinga ke fua mo e koula fungani,
Hono kuo lau kinautolu ‘o tatau mo e ipu ‘umea,
Ko e ngāue ‘a e nima ‘o e tufunga ‘umea!
3 g Na‘a mo e fanga siakali ‘oku nau humaki ange ‘a e huhu
‘Oku nau fakahuhu honau fānganga;
Ko e ‘ōfefine ‘o hoku kakai kuo hoko ‘o ta‘e‘ofa,
Hangē ko e fanga ‘ositalesi ‘o e toafa.
4 d ‘Oku piki ‘a e ‘elelo ‘o si‘i valevale ki hono ‘ao‘ingutu
Ko ‘ene fie inu:
‘Oku kole mā e tamaiki iiki,
‘Oku ‘ikai ha taha ‘e paki‘i mai ha‘anau me‘a.
5 h Ko kinautolu na‘e kai ma‘anga ngako
‘Oku nau nofo tuēnoa ‘i he ngaahi hala:
Ko kinautolu na‘e hapai ‘i he funga kula ‘aho‘aho
‘Oku nau pipiki mai ki he ngaahi tu‘unga veve.
6 w Tā kuo hopo hake ‘a e faikovi ‘a e ‘ōfefine ‘o hoku kakai
‘I he angahala ‘a Sōtoma,
‘A ia na‘e mafuli ‘i ha fo‘i kemo,
Pea na‘e ‘ikai kuku ia ‘e ha ngaahi nima.
7 z Na‘e ma‘a ange hono hou‘eiki ‘i he sinou,
Na‘a nau kili ‘atā ange ‘i he hu‘akau,
Na‘e momoho ange honau sino ‘i he makakula koloa,
Ko e sāfaia honau kau langanga.”#4.7 langanga; pe tongitongi.
8 x Ko honau fōtunga ‘oku ‘uli‘uli ange ‘i he malala;
‘Oku ‘ikai ‘iloa kinautolu ka nau ka ‘i hala:
‘Oku piki honau kili ki honau ngaahi hui;
Kuo mōmoa, kuo hoko ‘o tātāfefie.
9 t ‘Oku ngutuhua ange ‘a e mate ‘i he heletā
‘Iate kinautolu ‘oku mate ‘i he honge;
He ‘oku faka‘au‘ausino ‘a e fa‘ahinga ko ē hangē ha kau veloi,
Ko e ta‘e te nau ma‘u ‘a e fua ‘o e ngoue‘anga.
10 y Ko e nima ‘o si‘i kau fefine manava‘ofa
Kuo nau haka ‘a e fānau ‘anautolu;
Kuo nau me‘akai ‘aki kinautolu
‘I he maumau ‘o e ‘ōfefine ‘o hoku kakai.
11 k Kuo ‘osiki ‘e Sihova ‘ene tuputāmaki,
Kuo ne lilingi ‘a e kakaha ‘o ‘ene houhau;
Pea kuo ne tafu ha afi ‘i Saione,
‘A ia kuo ne keina hono ngaahi tu‘unga.
12 l Tala‘ehai na‘e tui ‘a e ngaahi tu‘i ‘o e fonua,
Pe ko e fu‘u nofo māmani,
‘E hū ha taha fakamamahi mo ha fili
‘I he ngaahi matanikolo ‘o Selusalema.
13 m Koe‘uhi ā pē ko e ngaahi hia ‘a ‘ene kau palōfita,
‘A e ngaahi kovi ‘a ‘ene kau taula‘eiki,
‘A ia na‘a nau lilingi ‘a e toto ‘o e kau mā‘oni‘oni
‘I loto kolo.
14 n ‘Oku nau ‘alu taupō ‘i he ngaahi hala,
Hangē ni kui;
Kuo pani toto kinautolu,
Ko ia ‘oku ‘ikai ke lava ha taha ke ala ki honau kofu.
15 s “Afe atu–ta‘ema‘a”–na‘e pehē ‘enau kalanga ange–
“Afe atu, afe atu–‘oua ‘e lave mai!”
‘I he‘enau hola, na‘a nau ō ai pē;
Ko e lau na‘e fai ‘e he ngaahi pule‘anga,
‘E ‘ikai te nau toe ‘āunofo heni.
16 ‘Kuo vete kinautolu ‘e he fofonga ‘o Sihova;
‘Oku ‘ikai te ne kei tokanga‘i kinautolu:
Ko e fōtunga ‘o e kau taula‘eiki ‘oku ‘ikai toka‘i ‘e he fa‘ahinga ko ē;
‘Oku ‘ikai te nau ‘ofa‘i ‘a e mātu‘a.
17 p ‘Oku fai atu ‘a e ‘osi‘osi ‘o hotau mata
He fakasio atu ki hatau tokoni muna:
‘I he‘etau fakasio kuo fai,
Ko e fakasio ki ha kakai ‘e ‘ikai fakahaofi.
18 c ‘Oku nau lama ‘a e taulaka,
Ko ia ‘oku ‘ikai te tau lava ke ‘alu ‘i he ngaahi mala‘e.
‘Oku panaki hotau ngata‘anga, kuo kakato hotau taimi;
Seuke, ko hotau ngata‘anga kuo a‘u mai.
19 q Na‘e vave ange hotau kau tuli
‘I he fanga ‘īkale ‘o e ‘atā:
‘I he ngaahi mo‘unga na‘a nau tuli tā mai,
‘I he toafa na‘a nau tokamalumu mai.
20 r Ko si‘i mānava ‘a hotau ihu, ko e Pani ‘a Sihova,
Na‘e pō ‘i he‘enau ngaahi luo tō;
‘A e ‘afio na‘a tau lau ki ai,
Ko hono malu te tau mo‘ui atu ai ‘i he ngaahi pule‘anga.
21 s Fai ‘a ho‘o fiefia mo ho‘o nēkeneka, ta‘ahine ‘Ītomi;
‘A e nofo ‘i he fonua ko ‘Usa:
‘E ‘alu atu ‘a e ipu kiate koe foki,
Te ke konā ai, pea te ke ‘ai ke ke telefua.
22 t Kuo lato ho‘o kovi, ta‘ahine Saione;
‘E ‘ikai te ne toe ‘ave pōpula koe:
Te ne ‘eke ho‘o kovi ‘au, ta‘ahine ‘Ītomi;
Te ne tatala ho‘o ngaahi angahala.
Currently Selected:
KONI TANGILĀULAU 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
