KONI TANGILĀULAU 3
3
1 a KO E tangata au kuo mata mamahi
‘I he me‘a tā ‘o ‘ene ‘ita.
2 a Kuo ne taki au, ‘o ‘ai ke u fou he po‘uli,
‘O ‘ikai ‘i he maama.
3 a ‘Ā, ko au pē ‘oku ne tā mo foki ki ai,
‘O ‘osi ‘a e ‘aho.
4 b Kuo ne ‘ai ke motu‘a hoku kakano;
Kuo ne fesi‘i hoku ngaahi hui.
5 b Kuo ne langa mo ‘ākolo‘i au
‘Aki ‘a e kona‘ī‘ī mo e ongosia.
6 b Kuo ne ‘ai ke u nofo he po‘uli lōlō,
Hangē ko e kakai kuo mate fuoloa.
7 g Kuo ne ‘aa‘i takai au, kuo ‘ikai te u mahū ki tu‘a;
Kuo ne ‘ai ke mamafa ‘eku seini.
8 g Ka u ka tautapa foki, mo tangi atu,
‘Oku ne ta‘ofi ‘eku lotu.
9 g Kuo ne songo hoku hala ‘aki ‘a e ngaahi maka hele,
Kuo ne piko‘i hoku ngaahi ‘alunga.
10 d Ko e pea ia ‘oku tokamalumu kiate au,
Ko ha laione ‘i he lilo.
11 d ‘Oku ne ‘ave hoku ngaahi hala, ‘o hae fakaikiiki au;
Kuo ne ‘ai ke u nofo ko e maumau‘ia.
12 d Kuo ne teke ‘ene kaufana,
Pea kuo ne fokotu‘u au ko e polo ki he ngahau.
13 h Kuo ne ‘ai ke ‘asi ‘i hoku kofuua
‘a e fānganga ‘o ‘ene hōfangahau.
14 h Kuo u hoko ko e luma‘anga ki hoku kakai kotoa;
‘Oku nau ta‘anga ‘aki au ke ‘osi ‘a e ‘aho.
15 h ‘Oku ne ‘ai ke u pito ‘i he ngaahi ifo tamala,
‘Oku ne fakakonaa‘i au he inu teve.
16 w ‘Oku ne pakipaki hoku nifo ‘i he kai me‘a ‘one‘onea,
‘Oku ne ha‘aki au ki he efuefu.
17 w Pea kuo ne keu‘i ‘eku mo‘ui mei he tu‘umālie;
Kuo ngalo ‘iate au ‘a e lelei.
18 w Pea u pehē, Kuo ka‘anga hoku ivi,
Mo ‘eku ‘amanaki kia Sihova.
19 z Manatu ki he‘eku mamahi, mo ‘eku ifo-tamala‘ia,
Ki he teve mo e kona‘ī‘ī.
20 z ‘Oku mātu‘aki manatu ki ai ‘e hoku laumālie,
Pea ‘oku mapelu hifo ‘i loto ‘iate au.
21 z ‘Oku ou fakahake ‘i hoku loto ‘a e me‘a ko eni,
Ko ia ai, ‘oku ‘i ai ha‘aku ‘amanaki.
22 x Ko e ‘ū ‘ofa pē ‘a Sihova, ‘a ia ‘oku ‘ikai te tau ‘auha ai;
Koe‘uhi ‘oku ‘ikai ke ‘osi ‘ene fai faka‘atu‘i.
23 t ‘Oku nau fo‘ou ‘i he pongipongi kotoa;
Ko e me‘a lahi ho‘o fai mo‘oni.
24 x Ko hoku ‘inasi ‘a Sihova–ko e lau ia ‘a hoku laumālie-
Ko ia ai, te u ‘amanaki kiate ia.
25 x ‘Oku lelei ‘a Sihova kiate kinautolu ‘oku tatali kiate ia,
Ki he laumālie ‘oku kumi ki He‘ene ‘Afio.
26 t ‘Oku lelei ke te ‘amanaki mo tali fakalongo pē
Ki he fakamo‘ui ‘a Sihova ka fai.
27 x ‘Oku lelei ki he tangata ke ne fua ‘a e ‘ioke
Lolotonga ‘ene kei talavou.
28 y Ke ne nofo toko taha, ‘o fakalongo,
He kuo hili ia kiate ia ‘e He‘ene ‘Afio.
29 y Ke ne ‘ai hono ngutu ki he efu;
Na‘a ‘oku ‘i ai ha ‘amanaki.
30 y Ke ne tuku hono kou‘ahe kiate ia na‘e taa‘i ia;
Ke ne ‘ai ke kakato hono manukia.
31 k Koe‘uhi ‘e ‘ikai li‘aki ‘o ta‘engata ‘E ‘Ātonai.
32 k He neongo ‘oku ne fakamamahi,
‘Oku ne faka‘atu‘i foki,
‘O taau mo e lahi ‘o ‘ene ‘alo‘ofa.
33 k He tala‘ehai ‘oku ne fai fiefie fai
‘Ene ngaohikovia mo fakamamahi ‘a e hako‘itangata.
34 l Ko e malaki ‘i hoto lalo va‘e
‘a e kau pōpula ‘o e fonua.
35 l Ko e piko‘i ‘a e totonu ‘a ha tangata
‘I he mātu‘aki ‘ao ‘o ‘Elioni,
36 l Ko e mio‘i ha tangata ‘i he‘ene hopo–
‘Ikai ko e ngaahi me‘a ia ‘e vakai ki ai ‘a ‘Ātonai?#3.36 ‘Ikai… Ātonaí? pe He ko e ngaahi me‘a ia ‘oku lelei‘ia ai ‘a ‘Ātonai?
37 m Ko hai tū ha taha kuo fekau pea hoko,
‘Osi, na‘e ‘ikai ko e tu‘utu‘uni ‘a ‘Ātonai?
38 m ‘Ikai ‘oku tō mai mei he fofonga ‘o ‘Elioni
‘a e kovi mo e lelei fakatou‘osi?
39 m Koe‘uma‘ā ke māpuhoi ha tangata ‘oku kei mo‘ui?
Ke māpuhoi pē ha taha koe‘uhi ko ‘ene ngaahi angahala.#3.39 Ke… angahala; pe ‘osi ko e tautea ‘o ‘ene ngaahi angahalá.
40 n Ke tau ‘eke mo hakule hotau ngaahi ‘alunga,
Ka tau foki kia Sihova.
41 n Ke tau hiki hotau loto ke ō mo hotau nima
Kia ‘Ela ‘i langi.
42 n Kuo mau hia, pea kuo mau angatu‘u;
Kuo ‘ikai fakamolemole ‘e he ‘Afiona.
43 s Kuo ke pulupulu ‘aki ha houhau, ‘o tuli kiate kimautolu;
Kuo ke tāmate‘i, ‘o ‘ikai ha‘o mamae.
44 s Kuo ke pulupulu ‘aki ha ‘ao
Ke ‘oua na‘a ‘asi ha hū.
45 s Kuo ke ngaohi kimautolu ko e veve mo e ‘uli
‘I he lotolotonga ‘o e ngaahi kakai.
46 ‘Kuo fakamanga honau ngutu kiate kitautolu
‘E hotau fili fua pē.
47 ‘Kuo hoko kiate kitautolu ‘a e fakalilifu mo e luo,
Ko e fakalala mo e maumau.
48 ‘‘Oku hangē ha tausi ‘a e vai hoku mata,
Koe‘uhi ko e maumau ‘a e ‘ōfefine ‘o hoku kakai.
49 p ‘Oku matua atu hoku mata, ‘o ‘ikai tuku,
‘O ‘ikai me‘a mo mātu‘u;
50 p Ko e fai pē kae‘oua ke ‘afio hifo ‘a Sihova,
‘O vakai mai mei langi.
51 p Ko hoku ongo mata ni ‘oku fakatupu mamahi ki hoku laumālie,
Koe‘uhi ko e fu‘u fānau fefine ‘a hoku kolo.
52 c Ko hoku ngaahi fili tu‘unga‘a pē
Na‘a nau tulitāupaua au, hangē ko e fai ki ha misi.
53 c Na‘a nau fai ke tu‘usi ‘eku mo‘ui ‘i he lepa,
Na‘a nau lī ha maka kiate au.
54 c Na‘e fakapūlou hoku ‘ulu ‘e he vai;
Na‘a ku pehē kuo tu‘usi au.
55 q Na‘a ku kalanga‘aki ho huafa, ‘e Sihova,
Mei he takele ‘o e luo.
56 q Na‘e ongo atu hoku le‘o; ‘oua ‘e tāpuni ho telinga
Ki he‘eku māpuhoi, ki he‘eku tautapa.
57 q Na‘a ke ‘unu ke ofi ‘i he ‘aho na‘a ku tautapa atu ai:
Na‘a ke pehē,
‘Oua te ke manavahē.
58 r Kuo ke taukapo‘i, ‘e ‘Ātonai, ‘a e ngaahi me‘a ‘a hoku laumālie;
Kuo ke fai ‘a e ngāue fakakoeli ma‘a ‘eku mo‘ui.
59 r Kuo ke mamata, ‘e Sihova, ki he ta‘etotonu ‘oku fai mai;
Fakamaau ‘e koe ‘eku totonu.
60 r Kuo ke mamata ki he‘enau fu‘u sauni kuo fai,
Ki he‘enau ngaahi fu‘u fakakaukau kiate au.
61 s Kuo ke ongo‘i, ‘e Sihova, ‘enau manuki mai,
‘Enau ngaahi fu‘u fakakaukau kiate au;
62 s ‘a e me‘a ‘oku tō mei he ngutu ‘o e kakai ‘oku tu‘u kiate au,
Mo ‘enau fakalaulauloto kiate au ke ‘osi ‘a e ‘aho.
63 s Me‘a mai ki he‘enau nofo hifo, mo tu‘u hake;
‘Oku nau ta‘anga ‘aki au.
64 t ‘E Sihova, te ke fakaai honau tuha,
‘O taau mo e ngāue ‘a honau nima.
65 t Te ke ‘ange kiate kinautolu ‘a e kui loto:
Ko ho mala ia kiate kinautolu.
66 t Te ke tuli ‘ita kiate kinautolu,
Pea te ke faka‘auha kinautolu mei he lalo langi ‘o Sihova.
Currently Selected:
KONI TANGILĀULAU 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
