KONI TANGILĀULAU 2
2
‘OIAUĒ ‘a e ‘ufi‘ufi ‘e ‘Ātonai ‘aki ha ‘ao ‘i he‘ene houhau
1 a ‘A si‘i ta‘ahine ko Saione!
‘Ene lī mei langi ki māmani
‘a e lāngilangi ‘o ‘Isileli,
Pea kuo ‘ikai te ne manatu ki hono tu‘ungava‘e
‘I he ‘aho ‘o ‘ene houhau.
2 b Kuo folofua ‘e ‘Ātonai, ta‘eha‘ane mamae,
‘A e nofo‘anga kotoa ‘o Sēkope;
Kuo ne holoki he‘ene matua mai
‘a e ngaahi talitau‘anga ‘o e ta‘ahine ko Siuta;
Kuo ne holoki ki he kelekele,
Kuo ne fakame‘avale‘i ‘a e pule‘anga mo hono hou‘eiki.
3 g Kuo ne paki‘i ‘i he vela hono houhau
‘a e nifo kotoa ‘o ‘Isileli;
Kuo ne momou hono to‘omata‘u
‘I he fepaki mo e fili:
Pea ‘oku ne fakapuho ‘i Sēkope hangē ha afi ulo,
‘A ia ‘oku ne keina takatakai.
4 d Kuo ne teke ‘ene kaufana hangē ha fili,
Kuo ne tu‘u ‘oku hiki tā mai hono to‘omata‘u,
Kuo ne tāmate‘i kotoa
‘a e ngaahi me‘a ‘oku holi ki ai ‘a e mata;
Kuo ne lilingi ‘ene tafulu hangē ha afi
‘I he tēniti ‘o e ta‘ahine ko Saione.
5 h Kuo hoko ‘a ‘Ātonai hangē ko ha fili,
Kuo ne folofua ‘a ‘Isileli;
Kuo ne folofua hono ngaahi palasi,
Kuo ne faka‘auha hono ngaahi talitau‘anga:
Pea kuo ne fakalahi ‘i he ta‘ahine ko Siuta
‘a e to‘e mo e māpuhoi.
6 w Pea kuo ne ngaohikovi‘i hono loto‘ā, ‘o hangē ko ha ngouetapu pē;
Kuo ne faka‘auha hono potu fe‘iloaki‘anga;
Kuo ‘ai ‘e Sihova ke ngalo ‘i Saione
‘a e kātoanga tapu mo e Sāpate;
Pea ‘i he kakaha ‘ene tuputāmaki
Kuo ne keu‘i ‘a e tu‘i mo e taula‘eiki.
7 z Kuo li‘aki ‘e ‘Ātonai ‘ene ‘ōlita ‘a‘ana,
Kuo ne fakalili‘a ki hono potu tapu,
Kuo ne tukuange ki he nima ‘o e fili
‘a e holisi ‘o hono ngaahi palasi:
‘Oku nau tukuna atu ha longoa‘a ‘i he fale ‘o Sihova,
‘O hangē ko ha ‘aho kātoanga.
8 x Kuo tu‘utu‘uni ‘e Sihova ke faka‘auha
‘a e ‘ā ‘o e ta‘ahine ko Saione;
Kuo ne falō atu ‘a e kafa,
Kuo te‘eki momou hono nima mei he faka‘auha:
Pea kuo ne ‘ai ke tangimahū ‘a e keli mo e ‘ā;
‘Oku na faka‘au hifo fakataha.
9 t Kuo ngoto ‘i he kelekele hono ngaahi matanikolo;
Kuo ne maumau‘i mo laiki hono ‘akau fakama‘u:
Ko hono tu‘i mo hono hou‘eiki ‘oku ‘i he lotolotonga ‘o e ngaahi kakai,
‘A ia ‘oku ‘ikai ‘i ai ‘a e Lao;
Mo hono kau palōfita foki,
‘Oku ‘ikai te nau ma‘u ha vīsone meia Sihova.
10 y Ko e mātu‘a ‘o e ta‘ahine ko Saione
‘Oku nau nofo ‘i he kelekele, ‘oku nau fakalongo pē;
‘Oku nau laku ‘a e efu ki honau ‘ulu;
Kuo nau no‘o ‘aki ‘a e tauanga‘a;
Ko e kau finemui ‘o Selusalema
Kuo nau vilitaki honau ‘ulu ki he kelekele.
11 k Kuo ‘osi‘osi hoku mata ‘i he tangi lo‘imata,
‘Oku hangatāmakia hoku to‘oto‘onga,
‘Oku malingi hoku ‘ate ki he kelekele,
Koe‘uhi ko e lavea ‘a e ‘ōfefine ‘o hoku kakai;
He pongia ‘a e tamaiki iiki mo e valevale
‘I he ngaahi mala‘e ‘o e kolo.
12 l Si‘enau lau ki he‘enau fa‘ē,
“Kofa‘ā ha koane mo ha uaine?”
Si‘enau pōngingia hangē ha kafo ‘i he ngaahi mala‘e ‘o e kolo!
Si‘enau hua‘i ‘enau mo‘ui
Ki he fatafata ‘o ‘enau fa‘ē!
13 m Ta‘ahine Selusalema, ko e hā ‘eku lau ‘e fai atu?
Te u fakatatau koe ki he hā?
Ta‘ahine Saione na‘e tāupo‘ou, ko e hā hao tuha te u lau,
Ke u fai‘aki atu ha fakalelu?
Ko ho maumau ko e me‘a hulu hangē ko e tahi:
Ko hai ‘e lava ho faito‘o?
14 n Ko ho kau palōfita kuo mata vīsone ma‘au,
‘A ia ko e koto nge‘esi mo e vale;
Pea na‘e ‘ikai te nau tatala ho‘o kovi
Ke fakafoki ho pōpula:
Ka ko ‘enau ngaahi vīsone na‘a nau sio ma‘au
Ko e ngaahi kavenga nge‘esi pē, mo e tupu‘anga fakahē.
15 s ‘Oku pasipasi nima kiate koe
‘a e fononga kotoa ‘i he hala;
‘Oku nau faka‘ise‘isa, mo kalo ‘ulu,
Ki he ta‘ahine ko Selusalema:
“Ko eni ia koā ‘a e kolo na‘e lau ko e fungani he faka‘ofo‘ofa,
Fakaholomamata‘anga ‘o māmani kātoa?”
16 ‘Kuo fakamanga honau ngutu kiate koe
‘E ho fili fua pē;
‘Oku nau faka‘ise‘isa, pea ‘oku nau ‘ūtaki kaunifo;
‘Oku nau lau, “Kuo tau folofua ia,
‘Āua, ko e ‘aho eni na‘a tau ‘amanaki ki ai;
Kuo tau ma‘u ia, kuo tau sio ki ai.”
17 p Kuo fai ‘e Sihova ‘a e me‘a na‘a ne fakakaukau‘i;
Kuo ne faka‘osi ‘ene folofola na‘a ne tu‘utu‘uni he taimi mu‘a;
Kuo ne holoki,
Pea kuo ‘ikai ha‘ane mamae:
Pea kuo ne tuku ‘a e fili ke fiefia ‘iate koe,
Kuo ne fakamā‘olunga ‘a e nifo ‘o ho kau fakamamahi.
18 c Kuo tangi honau loto kia ‘Ātonai.
Si‘i ‘ā ‘o e ta‘ahine ko Saione,
Ke tafe hifo ‘a e lo‘imata hangē ha vaitafe,
‘Aho mo e pō;
‘Oua na‘a ai ha‘o tuku,
‘Oua na‘a mālōlō ho tama‘imata.
19 q Tu‘u, vālau po‘uli,
‘I he fokotu‘u ‘a e ngaahi le‘o;
Lilingi ho loto hangē ko e vai ‘i he hanga‘anga ‘o ‘Ātonai;
Hiki ho nima ki ai,
Koe‘uhi ko e mo‘ui ‘a si‘o tamaiki ‘oku pongia ‘i he honge,
‘I he tuliki ‘o e ngaahi hala.
20 r Me‘a mai, Sihova, ‘o tokanga,
Pe ko hai kuo ke fai pehē ki ai!
‘E kai koā ‘e he kau fefine honau fua,
‘A e tamaiki ‘oku nau kei hapahapai?
‘E fakapoongi ‘i he potu tapu ‘o ‘Ātonai
‘a e taula‘eiki mo e palōfita?
21 s ‘Oku fetākoto‘i ‘i he kelekele ‘a e talavou mo e motu‘a,
‘I he ngaahi hala;
Ko si‘eku kau finemui mo talavou
Kuo tō ‘i he heletā:
Kuo ke fakapoongi kinautolu ‘i he ‘aho ‘o e houhau;
Kuo ke tāmate‘i ta‘eha‘o mamae.
22 t ‘Oku ke fanongonongo ‘eku ngaahi ilifia
Ke ha‘u mei he potu kotoa pē,
‘O hangē ko ha ‘aho kātoanga;
Pea ‘i he ‘aho ‘o e houhau ‘o Sihova
Na‘e ‘ikai ha toe pe hao:
Ko kinautolu kuo u hapahapai mo tauhi,
Kuo faka‘osi kinautolu ‘e hoku fili.
Currently Selected:
KONI TANGILĀULAU 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
