KONI TANGILĀULAU 1
1
1 a ‘OIAUĒ si‘i nofo li‘aki ‘a e fefine ni,
‘A e kolo na‘e fonu kakai!
Si‘ene hoko ko e uitou tofu pē!
‘A ia na‘e fotu ‘i he ngaahi pule‘anga,
Si‘i toko taha na‘e fine‘eiki ‘aki ‘e he ngaahi vahefonua,
Kuo ne hoko ko e tali fatongia!
2 b Ko ‘ene tangi po‘uli ko e me‘a lahi,
Pea ‘oku fetafei hono kou‘ahe ‘i hono lo‘imata;
‘Oku ‘ikai ha taha ‘i hono kau ‘ofa‘anga
‘E fai ha fakalelu ki ai:
Kuo kākaa‘i ia ‘e hono ngaahi kaume‘a,
Kuo nau hoko ko hono fili.
3 g Kuo ‘alu fakahee‘i ‘a Siuta koe‘uhi ko e kovi,
Pea koe‘uhi ko e lahi ‘o e fatongia;
‘Oku ne nofo he lotolotonga ‘o e ngaahi pule‘anga
Ta‘e te ne ma‘u ha nonga:
Ne a‘u ki ai hono kau tuli
Fe‘unga mo e ngaahi potu pokosi‘i.
4 d ‘Oku nofo mamahi ‘a e ngaahi hala ki Saione,
Ko e ‘ikai ‘alu ai ha ni‘ihi ki he kātoanga tu‘utu‘uni;
‘Oku lala hono ngaahi matanikolo,
Koni kau taula‘eiki ē ‘oku māpuhoi:
Ko ‘ene kau finemui ‘oku mamahi,
Pea ko si‘i kolo foki ‘oku kona hono loto.
5 h Ko hono kau fakamamahi kuo hoko ‘o tau‘olunga,
Ko hono ngaahi fili ‘oku nau tu‘umālie;
He ko Sihova kuo ne fakamamahi ia
Koe‘uhi ko e lahi ‘o ‘ene fai hala:
Kuo ‘alu pōpula ‘ene longolonga‘i tamaiki,
He fakateka kinautolu ‘e he fili.
6 w Pea kuo mahu‘i mei he ta‘ahine ko Saione
Hono fu‘u lāngilangi;
Kuo hoko hono hou‘eiki hangē ko e fanga tia
Kuo ‘ikai ‘ilo ha kaikai‘anga,
Pea ‘oku nau ‘alu ta‘eha ivi
‘I he fakateka kinautolu ‘e he tuli.
7 z ‘Oku fakamanatu ‘e Selusalema ‘i he taimi ‘o ‘ene kovi mo fakafe‘ātungia
‘A hono ngaahi mālie kotoa talu mei mu‘a:
Si‘i tō ‘e hono kakai ki he nima ‘o e fili,
‘O ‘ikai ha taha ke tokoni mai:
Ko e fefine ka kuo sio kiate ia ‘e hono ngaahi fili,
Kuo manuki‘i ‘ene ngaahi fakataputapu.#1.7 fakataputapu; pe tauhi sāpate.
8 x Kuo mātu‘aki hia ‘a Selusalema;
Ko ia, kuo ne hoko ko e me‘a ke fakalili‘a ki ai:
Ko kinautolu kotoa na‘e fakahīkihiki‘i ia
‘Oku nau va‘inga‘aki,
He kuo nau mamata ki hono telefua:
‘Io, na‘a mo ia ‘oku ne māpuhoi,
Pea ‘oku ne fulitu‘a.
9 t Ko hono fakalielia ‘oku ‘i hono kapa‘i kāuni;
Na‘e ‘ikai te ne manatu ki he me‘a ‘e iku ki ai;
Ko ia, ‘oku fakaofo ‘ene ‘alu hifo;
‘Oku ‘ikai ha taha ke fai ha fakalelulelu ki ai:
“Sihova ē, ‘afio mai ki he‘eku kovi;
He kuo fakata‘emālū‘ia ‘a e fili.”
10 y Kuo ala noa ‘a e fili
Ki he‘ene ngaahi me‘a mālie:
Seuke, kuo ne mamata ki he hīteni
Kuo nau hū ki hono fale tapu!
‘a e fa‘ahinga na‘a ke tu‘utu‘uni
‘Oku tapu ‘enau hū ki ho siasi.#1.10 siasí; pe fakatahá.
11 k ‘Oku māpuhoi hono kakai kotoa,
Si‘enau kumi me‘akai;
Kuo nau ‘atu ‘enau ngaahi me‘a mālie ki ha mā‘anga,
Ke nau mānava hake ai:
“Me‘a mai, Sihova, ‘o tokanga‘i
He kuo u hoko ko e me‘a ke va‘inga‘aki.”
12 l Ko e me‘a noa koā kiate kimoutolu,
‘A e kau fononga ‘i he hala?
Tokanga, ‘o vakai pe ‘oku ai ha mamahi ‘oku tatau mo ‘eku mamahi,
‘A e me‘a ‘oku fai kiate au,
Hoku fakamamahi ‘oku fai ‘e Sihova
‘I he ‘aho ‘o ‘ene houhau kakaha.
13 m Mei Taukakapa kuo ne tuku mai ha afi ki hoku ngaahi hui,
Pea ‘oku ne ikuna kinautolu:
Kuo ne fola ha kupenga ki hoku va‘e,
Kuo ne fakafoki ki mui au;
Kuo ne tuku au ke u nofo maumau‘ia,
‘O vaivai ‘i he ‘aho kotoa.
14 n Ko e ‘ioke ‘o ‘eku ngaahi angahala kuo fī ‘e hono nima;
‘Oku nau fefihitaki,
Kuo nau heka ki hoku kia;
‘Oku fakahumu ai hoku ivi:
Kuo tuku au ‘e ‘Ātonai ki he nima ‘o e ni‘ihi,
‘A ia ‘oku ‘ikai te u lava ke tu‘u ki ai.
15 s Kuo va‘inga‘aki ‘e ‘Ātonai ‘eku kau mafi kotoa,
Lolotonga ‘enau ‘i loto kolo;
Kuo ne fanongonongo ha fakataha ke fai kiate au,
Ke laiki ‘eku kau talavou:
Kuo fai ‘e ‘Ātonai ha malaki ‘i he tata‘o‘anga
‘O e ta‘ahine Siuta ne tāupo‘ou.
16 ‘Koe‘uhi ko e ngaahi me‘a ko ia ‘oku ou tangi pē au;
Ko hoku mata ni, ko hoku mata ni ‘oku fetafei ai ‘a e vai;
He ‘oku mama‘o meiate au ha taha fakalelu,
Ha taha ke fakamānava hake au:
‘Oku nofo ‘eku fānau ko e maumau‘ia,
He kuo mālohi ‘a e fili.
17 p ‘Oku fola nima ‘a Saione;
‘Oku ‘ikai ha taha ke fakalelu ki ai:
Kuo fai tu‘utu‘uni ‘e Sihova koe‘uhi ko Sēkope,
Ke fili ‘aki ia ‘e he nofo takatakai:
Ko ‘enau vakai ‘a Selusalema,
Ko e me‘a ke fakalili‘a ki ai.
18 c ‘Oku tonuhia pē ‘a Sihova;
He kuo u angatu‘u ki he me‘a na‘e tō mei hono fofonga:
Fanongo mu‘a, ‘a e ngaahi kakai,
Mou vakai ‘eku mamahi:
Ko si‘eku kau finemui mo kau talavou,
Kuo nau ‘alu pōpula.
19 q Na‘a ku ui mai hoku kau ‘ofa‘anga,
Kuo fai kākā kiate au ‘e he fa‘ahinga ko ia:
Ko ‘eku kau taula‘eiki mo ‘eku kau mātu‘a
Na‘a nau hokotaki ‘i he kolo,
Lolotonga si‘enau kumi ha‘anau ma‘anga
Ke fakamānava hake ‘aki kinautolu.
20 r Me‘a mai, Sihova; he ‘oku ou ‘efihia;
‘Oku hangatāmaki hoku to‘oto‘onga;
Kuo mafuli hoku loto ‘iate au;
He ko ‘eku angatu‘u ko e me‘a lahi:
‘I tu‘a, ‘oku ‘ave ‘eku fānau ‘e he heletā;
Ko fale, ‘oku tatau ai pē mo e mate.
21 s Kuo nau fanongo ‘oku ou māpuhoi au;
‘Oku ‘ikai haku fakalelu;
Kuo fanongo ‘eku ngaahi fili ki he‘eku kovi;
‘Oku nau fiefia ‘i ho‘o fai pehē:
Te ke ‘omi pē ‘a e ‘aho kuo ke fanongonongo,
Pea te nau hangē ko au.
22 t Ke a‘u ki ho ‘ao na
‘Enau ngaahi kovi kotoa;
Pea ke fai kiate kinautolu, hangē ko ho‘o fai kiate au,
Koe‘uhi ko ‘eku ngaahi fu‘u angahala:
He ‘oku lahi ‘eku māpuhoi,
Pea ko hoku loto ‘oku vaivai.
Currently Selected:
KONI TANGILĀULAU 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
