KO SIOELI 2

Ko e Fanga He‘é ko e Fakamōmoatea ‘o e ‘Aho ‘o e ‘Eikí

1MOU ifi talupite ‘i Saione,

‘Io, ‘ai ke maongo atu ‘i hoku mo‘unga tapu;#2.1 mo‘unga tapú; Ko e Mo‘unga ko Saione ia (Vakai ki he “Ngaahi Huluhulu”).

Ke tete ‘a e nofo fonua kotoa pē:

He ‘oku hoko mai ‘a e ‘Aho ‘o e ‘Eiki,#2.1 pe Sihova. Seuke, ‘oku ofi.

2Ko e ‘aho po‘uli ko e kaupō‘uli, ko e ‘aho ‘o e loa mo e po‘uli matolu, ko e hangē ena ko e mafoa ‘a e ‘ata ‘i he funga mo‘unga. Ko e kakai lahi mo kaukaua ena, te‘eki hano tatau talu mei mu‘a ‘i mu‘a, pea hili ia ‘e ‘ikai toe ‘i ai, ‘o laui to‘utangata.

3‘Oku tāimu‘a ki ai ha afi keina;

Pea ‘oku ‘emo mei mui ha afi ulo:

Ko e fonua ‘i he‘ene a‘u ki ai

‘Oku hangē ko e ngouetapu ‘i ‘Īteni,

Ka ‘i he‘ene tuku ki mui

Ko e toafa mamate;

Pea na‘a mo e me‘a na‘e holataki

Na‘e ‘ikai ma‘u.

4Ko honau fōtunga na‘e hangē ko e fōtunga ‘o e hoosi;#Fkhā 9.7-9 pea hangē ko e tau heka hoosi na‘e pehē ‘enau lele. 5‘Oku ongoonga‘a ‘enau fehopokaki ‘o hangē ko e longoa‘a ‘o e ngaahi sāliote ‘i he funga mo‘unga, hangē ko e longoa‘a ‘o e ulo ‘o e afi ‘oku keina ‘a e veve, ko e longoa‘a tofu pē ‘o ha kakai kaukaua kuo ‘osi fakatē ki he tau.

6He‘enau hā mai ‘oku toutou ‘a e ngaahi kakai:

‘Oku mole ‘a e melo mei he mata kotoa.

7Ko ‘enau ‘oho ‘oku hangē ha kau helo;

‘Oku nau kaka ‘i he ‘ā hangē ha tau;

Pea ‘oku nau fou atu takitaha ‘i hono ‘alunga,

Pea ‘oku ‘ikai te nau afe mei honau ‘otu.

8Pea ‘oku ‘ikai ke fepaki ha taha mo ha taha;

‘Oku ‘alu ‘a e sōtia takitaha ‘i hono laine:

Pea ‘i he‘enau tū‘ulu ki he mahafu,

‘Oku ‘ikai motu ai ‘enau ‘alu.

9‘Oku nau lele holo ‘i he kolo;

‘Oku nau lele ‘i he ‘ā;

‘Oku nau kaka ki he ngaahi fale;

‘Oku nau hū he ngaahi tupa hangē ha kaiha‘a.

10He‘enau hā, ‘oku tete ‘a e fonua;#Fkhā 8.12

‘Oku ngāue ‘a langi;

‘Oku fakapo‘uli ‘a e la‘ā mo e māhina,

Pea ‘oku tuku ‘e he ngaahi fetu‘u ‘enau ulo.

11Pea ‘oku tukuna atu ‘e Sihova hono le‘o ‘i he ‘ao ‘o ‘ene tau;#Fkhā 6.17 he ‘oku lahi ‘aupito ‘ene ‘apitanga tau: pea ‘oku kaukaua ‘a ia ‘oku fakaai ‘ene folofola, Seuke, ko e ‘aho lahi mo fakalilifu ‘aupito ‘a e ‘Aho ‘o e ‘Eiki; pea ko hai te ne matu‘uaki?

Ko Hono Fakakouna ‘o e Kakaí ke Fakatomala

12Pea na‘a mo e taimi ni–ko Sihova ia mei he Ta‘ehāmai–mou mātu‘aki tafoki kiate au ‘aki ‘a e kotoa ‘o homou loto, pea ‘aki ‘a e ‘aukai, pea ‘aki ‘a e tangi, pea ‘aki ‘a e tangilāulau: 13Pea hae homou loto, ‘o ‘ikai ko homou kofu, pea mou foki kia Sihova ko homou ‘Otua; he ko e Angalelei ia mo e ‘Alo‘ofa, Tuai-ki-he-houhau, pea Fonu-‘i-he-kelesi, pea ‘oku ne momou ‘i he kovi. 14Na‘e ‘ilo ‘e hai te ne tafoki nai, ‘o momou, pea te ne tuku hifo ha tāpuaki ‘i he‘ene ‘alu, ‘o ai ha feilaulau-me‘akai mo ha feilaulau-me‘ainu ma‘a Sihova ko homou ‘Otua.

15Mou ifi talupite ‘i Saione,

Tu‘utu‘uni ha ‘aukai tapu,

Fanongonongo ha tapu ngāue;

16Fakatefua mai ‘a e kakai,

Tu‘utu‘uni ha fakataha fakasiasi;

Tānaki ‘a mātu‘a,

Fakatefua mai ‘a e tamaiki mo e kei huhu:

Ke ha‘u ‘a e tangata ta‘ane mei hono loki,

Mo e ta‘ahine mei hono leke.

17Ke tangi ‘a e kau taula‘eiki,

‘A e kau tauhi ‘o Sihova,

‘I he vaha‘a ‘o e falehū‘anga mo e ‘ōlita;

Pea ke nau pehē:

‘E Sihova, ‘alo‘ofa mai ki ho kakai,

Pea ‘Oua ‘e tuku ho tofi‘a ko e manukia,

Ke taungalea ‘iate kinautolu ‘a e hīteni:

Koe‘uma‘ā ke fai ha lau ‘i he ngaahi kakai,

“Koma‘ā honau ‘Otua?”

Ko Hono Toe Fakamahutafea ‘e he ‘Otuá ‘a e Fonuá

18Toki kamata fua‘a ‘a Sihova koe‘uhi ko hono fonua,

‘O ne manava‘ofa ki hono kakai.

19Pea tali ‘e Sihova, ‘o ne folofola ki hono kakai, Ko au eni ‘oku ou tuku atu ‘a e uite, mo e uaine fo‘ou, mo e lolo, ke mou mākona ai; pea ‘e ‘ikai te u toe tuku kimoutolu ke manukia ‘e he hīteni: 20Pea te u ‘ave ke mama‘o meiate kimoutolu ‘a e ha‘a tokelau na. Pea te u fakateka ia ki ha fonua honge vai mo lala, ko hono takitau ki he tahi hahake, pea ko hono tukutau ki he tahi hihifo; pea ‘e taufa mai hono namukū, pea ‘e ‘alu hake hono ‘elo, he kuo ne fai me‘a lalahi. 21Kelekele, ‘oua ‘e manavahē; tome‘e mo fakafiefia; he ‘oku fai me‘a lalahi ‘e Sihova. 22Fanga manu ‘o e vao, ‘oua ‘e manavahē; he ‘oku fisiki mai ‘a e ngaahi kaikai‘anga ‘i he toafa; seuke, ‘oku fakatupu fua ‘a e ‘akau, ‘oku tukuna atu ‘e he fiki mo e vaine ‘enau mālohi. 23Mo si‘i hako ‘o Saione, mou tome‘e mo fakafiefia ‘ia Sihova ko homou ‘Otua: he ‘oku ne ‘atu kiate kimoutolu ‘a Vaimu‘a#2.23 pe ha faiako. ‘i he totonu,#2.23 ‘a Vaimu‘a… totonu; pe ‘a Vaimu‘a, koe‘uhí he ‘oku faitotonu ia; ka ‘oku ngali tonu ange ‘a e: ‘a Vaimu‘a ‘o fe‘unga lelei mo ho‘omou fiema‘ú. ‘io, te ne hifo kiate kimoutolu ‘a e ‘uha, ‘a Vaimu‘a mo Vaimui he ‘uluaki māhina.#2.23 pe ko e ‘uluaki me‘a ia. 24Pea ‘e fonu uite ‘a e ngaahi ‘au‘au‘anga, pea ‘e fonu mahua ‘a e ngaahi sima ‘i he uaine mo e lolo. 25Pea te u fakaai kiate kimoutolu ‘a e ngaahi ta‘u na‘e keina ai ‘e he he‘e-fakafolau, ‘a e he‘e-‘emo, mo e he‘e-fohi, mo e he‘e-‘ola, ‘a ‘eku fu‘u hōsitē na‘a ku fekau atu kiate kimoutolu. 26Pea te mou kai, kai, ‘o mākona, pea te mou fakamālō‘ia ‘a e Huafa ‘o Sihova ko homou ‘Otua, hono kuo fakaofo ‘ene feangai mo kimoutolu: pea ‘e ‘ikai fakamaa‘i hoku kakai ‘o ta‘engata. 27Pea te mou ‘ilo ‘oku ou lotolotoi ‘a ‘Isileli ‘e au, pea ko au Sihova ia ‘a homou ‘Otua, pea ‘oku ‘ikai mo ha taha; pea ‘e ‘ikai fakamaa‘i hoku kakai ‘o ta‘engata.

Ko e ‘Aho ‘o e ‘Eikí

28Pea ‘e hoko ‘i he kuonga ki mui, te u lilingi hoku laumālie ki he kakano kotoa;#Ngā 2.17-21 pea ‘e fai palofisai ‘e homou ngaahi foha mo homou ngaahi ‘ōfefine, ko e mātu‘a ‘omoutolu te nau fa‘a misi, ko e kau talavou ‘omoutolu te nau mata vīsone: 29‘io, na‘a mo e kau tamaio‘eiki mo e kau kaunanga te u lilingi hoku Laumālie kiate kinautolu ‘i he kuonga ko ia. 30Pea te u ‘ai ‘a e ngaahi me‘a fakaofo ‘i he langi pea ‘i māmani, ko e toto, mo e afi, mo e ngaahi pou kohu. 31‘E liliu ‘a e la‘ā ‘o po‘uli,#Māt 24.29; Ma‘ake 13.24-25; Luk 21.25; Fkhā 6.12-13 mo e māhina ‘o toto, ‘i he tei hoko ‘a e ‘Aho ‘o Sihova, ‘a e ‘aho lahi mo fakalilifu. 32Pea ‘e hoko ‘o pehē, ko ia ‘oku tautapa ki he huafa ‘o Sihova ‘e fakahaofi:#Lom 10.13 he ai ha kau hao ‘i Mo‘unga Saione mo Selusalema, ‘o hangē ko e folofola ‘a Sihova, pea ‘e ‘i he kau toe ‘a kinautolu ‘oku ui ‘e Sihova.

Currently Selected:

KO SIOELI 2: TMB

Highlight

Copy

Compare