KO SIOELI 1
1
1KO E folofola ‘a Sihova ‘a ia na‘e hoko kia
Sioeli foha ‘o Petueli.
Ko e Tangi ‘a e Kakaí koe‘uhi ko e Maumau ‘Enau Ta‘ú
2Fanongo ki he me‘a ni, ‘a e kau mātu‘a,
‘Io, fokotu‘u telinga mai, ‘a e nofo kātoa ‘o e fonua.
He kuo ai ha me‘a pehē ‘i homou taimi,
Pe ‘i he taimi ‘o ho‘omou ngaahi kui?
3Fakamatala ki ai ki ho‘omou fānau,
Pea ke fai ‘e ho‘omou fānau ki he‘enau fānau,
Pea ke fai ‘e he‘enau fānau ki he to‘utangata ka hoko.
4Ko e me‘a ne toe mei he he‘e-‘ola
Kuo kai ‘e he he‘e-fakafolau;
Pea ko e me‘a ne toe mei he he‘e-fakafolau,
Kuo kai ‘e he he‘e-‘emo;
Pea ko e me‘a ne toe mei he‘e-‘emo,
Kuo kai ‘e he he‘e-fohi.
5Ofo hake, ‘a e kau, inu kava, ‘o tangi;
Pea mou ‘oiauē, ‘a e kau inu uaine,
Koe‘uhi ko e uaine fo‘ou;
He kuo fa‘ao mei homou ngutu.
6He kuo ‘alu hake ha kakai ki hoku funga fonua,#Fkhā 9.8
Ko e fa‘ahinga kaukaua, mo ta‘emalaua;
Ko hono nifo ko e nifo ‘o e laione,
Pea ko ‘ene u‘u ko e u‘u ‘a e laione toutama.
7Kuo ne ngaohi ‘eku vaine ke ka‘anga,
Pea ko ‘eku fiki ke potupotu‘i ‘akau pē:
Kuo ne fohi ia ke mafohi, ‘o tuku li‘aki;
Kae hā hinehina mai hono ngaahi va‘a.
8Tangilāulau hangē ha ta‘ahine kuo ‘ai tauanga‘a,
Koe‘uhi ko e husepāniti ‘ene finemui.
9Kuo motuhi ‘a e feilaulau-me‘akai mo e feilaulau-me‘ainu
Mei he fale ‘o Sihova;
‘Oku fakamamahi ‘a e kau taula‘eiki,
‘A e kau tauhi ‘o Sihova.
10Kuo laiki ‘a e ngoue‘anga,
‘Oku tangi ‘a e kelekele;
He kuo laiki ‘a e uite,
Kuo mātu‘u ‘a e uaine fo‘ou,
Kuo nginingini ‘a e me‘a lolo.
11Mou mā, ‘a e kau fa‘a,
Mou tangi ‘oiauē, ‘a e kau tauhi vaine,
Koe‘uhi ko e uite, pea koe‘uhi ko e pa‘ale;
He kuo ‘auha ‘a e fua ‘o e ngoue.
12Kuo mōmoa ‘a e vaine pea ‘oku laumea ‘a e fiki;
Ko e pomikānite,
Ko e paame foki, mo e moli,
‘Io, ko e ‘akau kotoa pē ‘o e vao kuo pakupaku:
Seuke, kuo pakupaku ‘a e fiefia mei he hako ‘o e tangata.
13‘a e kau taula‘eiki, mou ‘ai tauanga‘a,
Pea tangi fetuki;
Mou tangi ‘oiauē,
‘A e kau tauhi ‘o e ‘ōlita;
Mou omi, ‘a e kau tauhi ‘o hoku ‘Otua,
‘Ila mo e tauanga‘a ‘o ‘aho:
He kuo ta‘ofi mei he fale ‘o homou
‘Otua ‘a e feilaulau-me‘akai mo e feilaulau-me‘ainu.
14Tu‘utu‘uni ha lotu ‘aukai,
Tala ha fu‘u fakataha,
Tānaki ‘a e mātu‘a,
‘Io, ‘a e nofo kotoa ‘o e fonua
Ki he fale ‘o Sihova ko homou ‘Otua,
Pea mou tautapa kia Sihova.
15‘Oiauē ‘a e ‘Aho na
He ‘oku ofi ‘a e ‘Aho ‘o Sihova,#‘Ais 13.6
‘Io, ‘oku hoko mai ‘o taau mo ha faka‘auha meia Faka‘auha.#1.15 ‘Oku toe hiki: meia Sātai.
16‘Ikai kuo tu‘usi ‘a e me‘akai
‘Oku lolotonga sio ki ai hotau mata?
Tu‘usi ‘a e fiefia mo e tome‘e,
Mei he fale ‘o hotau ‘Otua?
17Kuo popo ‘a e ngaahi fa‘ahinga tenga
Ko e ta‘omi kinautolu ‘e he kelekele fefeka;
‘Oku tuku li‘aki ‘a e ngaahi feleoko,
‘Oku holo ‘a e ngaahi fale koloa,
He kuo mae ‘a e uite.
18Hono ‘oku to‘e ‘a e fanga manu!
‘Oku puputu‘u ‘a e ngaahi takanga pulu,
Ko e ‘ikai hano kaikai‘anga;
Na‘a mo si‘i ngaahi takanga sipi ‘oku lave ai ‘a e tautea.
19Ko koe, Sihova, ‘oku ou tangi ki ai:
He kuo keina ‘e he afi ‘a e ngaahi kaikai‘anga ‘o e toafa,
Pea kuo ‘emohia ‘e he ulo ‘a e ngaahi ‘akau ‘o e vao.
20Na‘a mo e fanga manu ‘o e vao ‘oku nau lolotu ki he ‘Afiona:
He kuo mātu‘u ‘a e ngaahi tafenga vai,
Pea kuo keina ‘e he afi ‘a e ngaahi kaikai‘anga ‘o e toafa.
Currently Selected:
KO SIOELI 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
