KO SIOPE 8
8
Ko Pilitati
1TOKI tali ‘a Pilitati ko e matāpule Sua‘a, ‘o ne pehē,
2‘E tuku ‘afē ho‘o lau pehē?
Mo e hangē ha matangi hako ho‘o lea?
3He ‘e piko‘i ‘e ‘Ela ‘a e fakamaau?
Pe mio‘i ‘e Sātai ‘a e totonu?
4Kapau kuo hia kiate ia ho‘o fānau,
Pea kuo ne tuku kinautolu ki he nunu‘a ‘o ‘enau faikovi:
5Ko e me‘a kiate koe, ka ne ke mātu‘aki kumi kia ‘Ela,
‘O fai ho‘o kole kia Sātai;
6Kapau te ke ma‘a mo angatonu;
Kuo pau te ne ‘ā ma‘au,
‘O fakafoki ho‘o nofo mā‘oni‘oni ko ē.
7‘Io, ko ho kamata‘anga ko e me‘a si‘i,
Kae hulu fau ho ngata‘anga.
8He fehu‘i mu‘a ki he to‘utangata ‘e taha,
Pea tokanga ki he ngaahi me‘a na‘e hakule ‘e he ngaahi kui ‘anautolu;
9(He ko e ha‘a ‘aneafi pē ‘a kitautolu,
‘O ‘ikai te tau ‘ilo ha me‘a;
Koe‘uhi ko ‘etau mo‘ui ‘i māmani ko e ‘ata pē)
10‘O ‘ikai koā ako koe ‘e kinautolu na, ‘o tala,
‘O ‘a‘au ‘a e ngaahi me‘a kuo nau ongo‘i?
11‘E tupu ‘a e pepailo ta‘eha kele?
‘E tupu ‘a e kutu, ‘oka ‘ikai ha vai?
12Lolotonga ‘ene kei mata, pea te‘eki tu‘usi,
Ko ia pē ‘i he ‘akau kotoa pē ‘oku velehia vave.
13‘Oku pehē ‘a e ‘alunga ‘a ha‘a fakangalo ‘Otua;
Mo e ‘auha ‘a e ‘amanaki ‘a e ta‘elotu:
14He ko hono pou ‘e fasi,
Pea ko hono falala‘anga ko e fale ‘o hina.#8.14 ko e fale ‘o hina; Ko e matamatakupenga ia.
15‘Oku ne faaki ki hono fale ko ia, ka ‘oku ‘ikai tu‘u:
‘Oku ne puke ki ai, ka ‘oku ‘ikai ke ma‘u.
16Si‘ene huhu‘a ‘i he mata ‘o e la‘ā,
Pea ‘osi ‘a e ngoue‘anga ‘i he mafola hono pikilau.
17Si‘ene a‘u ki ha tuva maka, ‘o takai ‘aki hono akaaka,
Si‘ene sio hifo kuo falemaka‘ia.#8.17 Si‘ene… falemaka‘ia; Ko hono faka-Hepeluú ko e: ‘Oku sio [hono akaaká] ki he maká kotoa; ka ‘oku ngali tonu hono hiki ‘o: ‘Oku piki ma‘u [hono akaaká] ki he maká kotoa.
18Ka ‘iloange ‘e faka‘auha ia mei hono potu,
Pea ‘e fakafisi leva ki ai, “‘Ā, kuo te‘eki ke u sio kiate koe.”
19Ko e mālie ē ‘o ē ‘alunga ko ē,
Pea mei he efu ‘e tupu ha ni‘ihi kehe.
20Tala atu, ‘oku ‘ikai ke li‘aki ‘e ‘Ela ‘a e angatonu,
Pea ‘oku ‘ikai te na fepoupouaki mo e angahala.
21‘Oua ke ne fakafonu ho ngutu ‘i he mavava,
Mo ho loungutu ‘i he tuē.
22‘E fakakofu takaea ‘a e kakai ‘oku fehi‘a kiate koe;
Pea ko e tēniti ‘o e angahala ‘e iku ki he ‘ikai.
Currently Selected:
KO SIOPE 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
