KO SIOPE 7
7
1LAU ‘e au ‘oku ai ha fatongia tau ki si‘i tangata ‘i māmani;
Pea ko hono taimi ‘oku hangē ko e taimi ‘o e ngāue nō.
2Hangē ko e holi ‘a e tamaio‘eiki ke a‘u ‘a e ‘ata,
Mo e mo‘usioa ‘a e unga ngāue ki he‘ene totongi,
3Pehē kuo vahe kiate au ‘a e ngaahi māhina faka‘amanakinoa,
Pea kuo tufa kiate au ‘a e ngaahi pō fakaongosia.
4Ka u ka tokoto, pea u pehē,
‘Afē mai ā te u toe tu‘u!
Ka ‘oku ne falō atu ‘a e pō;
Pea ‘oku ou fiu he fetafokifoki‘aki,
‘O a‘u ki he ma‘a ‘a e ‘aho.
5‘Oku tofu hoku kakano
‘I he ‘uanga mo e lefetona kelekele;
‘Oku hakita hoku kili, ‘o toe pā.
6‘Oku fepunakaki noa ange hoku ngaahi ‘aho
‘I he fa‘onga filo ‘a e tangata lalanga,#7.6 fa‘onga… lalanga; Ko e ki‘i konga ia ‘o e me‘a [mīsini] langa tupenu ‘oku fai ‘aki ‘a hono fetuiaki e filó ‘i he lalanga tupenú.
Pea nau mole ta‘eha ‘amanaki‘anga.
7Manatu mu‘a ko ‘eku mo‘ui ko e matangi pē!
‘E ‘ikai toe sio hoku mata ki he lelei.
8Ko e mata ‘oku sio kiate au, ‘e ‘ikai toe mamata mai:
Te ke fofonga mai Koe, ka kuo u ‘ikai.
9Hangē ko e ‘osi ‘a e ‘ao, ‘o mole,
Pehē ko e hifo ki Hētesi ‘e ‘ikai toe hake mai.
10‘E ‘ikai te ne toe foki ki hono ‘api,
Pea ‘e ‘ikai toe ‘ilo ia ‘e he potu na‘a ne kau ki ai.
11‘Āua! pea koe‘uma‘ā ‘eku ta‘ofi hoku ngutu;
Te u lea ‘i he mamahi ‘a hoku laumālie:
Te u tangilāulau ‘i he kona ‘o ‘eku mo‘ui.
12He ko e tahi au, pe ko e tanini,#7.12 tanini; Ko e manu fakailifia eni he ngaahi talatupu‘a ‘o ono‘aho. Tokua, ko e manu ia kuo pau ke mātu‘aki le‘ohi telia na‘a ‘alu ‘o fakatupu ha maumau.
‘A ē ā ‘oku ke fokotu‘u ai ha le‘o kiate au?
13Ka u ka pehē, ‘E fakafiemālie‘i au ‘e hoku tokoto‘anga,
Ko hoku mohenga te ne tokoni kiate au ke fua ‘eku mamahi;
14Tā ‘oku ke fakailifia‘i au ‘aki ‘a e ngaahi misi,
Pea ke ‘omi vīsone ke u līfusia ai:
15Ko ia ‘oku lelei ki he‘eku mo‘ui ke no‘o u‘a;
‘Oku lelei ‘a e mate ‘i he‘ete ‘ūhui ni mu‘a.
16‘Oku ou fakalili‘a ki ai;
‘Oku ‘ikai te u fie mo‘ui ma‘u ai pē:
Tuku ai pē au; he ko e muna pē hoku ngaahi ‘aho.
17Ko e hā fua ‘a e me‘a vaivai ni ko e tangata
‘Oku ke lau ai ia ko e me‘a lahi?#Saame 8.4; 144.3
Pea ‘oku ke ‘ai ia ki ho loto ke tokanga ki ai,
18Pea ‘oku ke ‘a‘ahi kiate ia ‘i he ngaahi pongipongi,
Pea ‘oku ke sivi ia ‘i he mōmeniti kotoa pē?
19Ko futu mo e ‘ikai te ke tafoki meiate au,
Pe ki‘i tuku au ke u folo hoku ifo!
20Kuo u angahala koā–Ko e hā fua te u lava ke fai ki he ‘Afiona?
Si‘i Lama ‘o e tangata,
Ko e hā kuo ke ‘ai ai au ko ho pākia‘anga,
Pea u hoko ai ko e kavenga ki he ‘Afiona?
21Pea ko e hā ‘oku ‘ikai te ke fakamolemole ai ‘eku angahala,
‘O ‘ave ‘eku kovi?
He ko eni te u tokoto ‘i he efu;
Pea te ke mātu‘aki kumi au,
Ka kuo u ‘ikai.
Currently Selected:
KO SIOPE 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
