KO SIOPE 5
5
1TAUTAPA mu‘a: ko hai ‘e tali koe?
‘Io, ko hai ‘i he ha‘a Tapu te ke hanga ki ai?
2Sa‘a! ko e vale ‘oku ‘itangofua te ne ‘auha,
Pea ko e lēlea lau ‘oku māfana vave, ko hono mate‘anga ia.
3Ne u mamata ‘e au ki he vale kuo fu‘u ma‘uma‘uluta;
Kae fokifā pē na‘a ku talakaa‘i hono nofo‘anga.
4Ko ‘ene fānau ē na‘e masiva ha ni‘ihi ke tokoni,
Pea ‘oku laiki kinautolu ‘i he fai‘anga fono, ‘o ‘ikai ha ‘aofi.
5‘Io, ‘oku kai hono ta‘u ‘e he fiekaia,
‘O ne to‘o mei he loto ‘ā talatala,#5.5 ‘ā talatala; ‘Oku ngali tonu hono hiki ko iá, ka ‘oku ‘ikai ke mahino ‘a hono faka-Hepeluú.
Pea ‘oku fanga ‘a e hele ki he‘enau koloa.
6He ‘oku ‘ikai ke fisi ‘a e kovi mei he efu,
Pea ‘oku ‘ikai ke tupu mei he kelekele ‘a e mamahi;
7He na‘e fā‘ele‘i ‘a e tangata ki he mamahi,
Hangē ‘oku puna hake ‘a e ngaahi kalofiama.#5.7 puna… kalofiama; pe manupuna ki he ‘ataá.
8Ka ‘oka ne ko au, te u ha‘ao kia ‘Ela,
‘Io, te u ‘ave ki he ‘Otua ‘eku me‘a:
9‘A ‘Ene ‘Afio ‘oku ne fai me‘a lalahi mo ta‘emahakulea;
‘Ani me‘a fakaofo mo ta‘efa‘alaua.
10‘Oku ne tuku ‘uha ki he funga fonua,
‘O fekau atu ha vai ki he mata ‘o e ngoue‘anga:
11Ko ‘ene fakamā‘olunga ‘a si‘i mā‘ulalo;
Pea nofo ‘a kau tangi ki he malu ‘a mo‘unga.
12‘Oku ne motuhi ‘a e fakakaukau ‘a e kau olo,
Ko ia ‘oku ‘ikai ke lava ‘e honau nima ‘a e me‘a ‘oku nau fai ki ai.
13‘Oku ne pō ‘a e kau poto ‘i he fai olopoto ‘anautolu;
Kae tū‘ulu ‘a e fale‘i ‘oku fai ‘e he kau mamio.#1 Kol 3.19
14Kei ‘aho ‘oku nau hū ki he po‘uli,
‘Io, ‘oku nau taupō ho‘atā ‘o hangē ko e pō ia.
15Pea ‘oku ne fakahaofi si‘i masiva#5.15 masiva; ‘Oku ngali tonu hono hiki ko iá, ka ‘oku ‘ikai ke mahino hono faka-Hepeluú. mei he heletā ‘a honau ngutu,
Pea mei he nima ‘o e kau fakamālohi.
16Ko ia ‘oku tupu ha ‘amanaki ki he vaivai,
Pea ‘oku kū ngutu ‘a e kovi.
17Tala atu, ‘oku monū‘ia ‘a e tangata ‘oku tautea ‘e ‘Elohā:#Pal 3.11; Hep 12.5-6
Ko ia, ‘oua te ke va‘inga‘aki ‘a e ako ‘oku fai ‘e Sātai.
18He ko e taha ia ‘oku mulu‘i, ‘o toe ha‘iha‘i;#Hōs 6.1
‘Oku ne ‘ai ke kafo, pea ko hono nima ai pē ‘oku faito‘o,
19Te ne fakahaofi koe ‘i he faingata‘a ‘e ono;
Pea ‘i hono fitu ‘e ‘ikai lave ha kovi kiate koe.
20Ka honge, te ne fakahaofi koe mei he mate;
Pea mei he ivi ‘o e heletā ‘oka ko e tau.
21‘I he tā ‘a e uipi ko e ‘elelo, te ke nofo fufū;
‘E ‘ikai te ke manavahē ki he faka‘auha ‘oka ‘unu‘unu mai.
22Ko e faka‘auha mo e hālofia te ke kata ki ai;
Pea ‘e ‘ikai te ke manavahē ki he manu fekai ‘o e fonua.
23Kaekehe, ‘e ai ha‘o talite mo e ngaahi maka ‘o e vao;
Pea ‘e melino ho vā mo e manu kaivao.
24Pea te ke ‘ilo ‘oku tu‘umālie ho tēniti;
Pea ‘i ho‘o lau ho‘o monumanu, ‘oku ‘ikai hē ha taha.
25Pea te ke ‘ilo ‘e lahi ho hako,
Pea hangē ko e mohuku ‘o e fonua ho pikilau.
26Te ke hoko ki ho tanu‘anga kuo ke fu‘u a‘u,
Pea hangē ha ‘ū koane ‘oku utu ‘i Faka‘afumate.
27Tala atu, ko eni pē:
Kuo mau hakule ki ai, pea ko ia pē;
Fanongo ki ai, pea ‘ilo ‘e koe ma‘au.
Currently Selected:
KO SIOPE 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
