KO SIOPE 4
4
Ko e ‘Uluaki Tālangá
(4.1–14.22)
Ko ‘Elifasi
1PEA na‘e toki fokotu‘u mai ‘a ‘Elifasi mei Tīmani, ‘o ne pehē,
2Kapau ‘e ala‘aki atu ha lea,
Te ke mamahi?
He ko hai ‘e lava ke ta‘ofi ai pē mei he lea?
3Vakai, kuo ke akonaki ki he tokolahi,
Pea kuo ke poupou nima vaivai.
4Na‘e pukepuke ‘a e heke ‘e ho‘o ngaahi lea,
Pea ko e tui fengatāliaki kuo ke ha‘iha‘i.
5Pea ko eni ko e taiēokoatu, pea kuo ke vaivai;
‘Oku ne mātu‘aki lave atu, pea ‘oku ke puputu‘u.
6‘Ikai na‘a ke mei falala ki ho‘o lotu,
Pea tu‘u ho‘o ‘amanaki ‘i he totonu ho ‘alunga?
7Manatu mu‘a, ko hai kuo ‘auha ta‘ehalaia?
Pe ‘i fē fonua ne tu‘usi ai ‘a e kakai angatonu?
8Ko ‘eku vakai ‘aku,
Ko kinautolu ‘oku ngoue ‘aki ‘a e kovi,
Mo kinautolu ‘oku tō ‘a e fakamamahi,
Ko kinautolu ‘oku utu ‘a e me‘a ko ia.
9‘I he māfulu ‘a ‘Elohā na‘a nau ‘auha,
Pea ‘i he mānava ‘o hono fofonga na‘a nau ‘osi.
10Ko e kālou ‘a e laione,
Mo e le‘o ‘o e laione fekai
Kuo ‘osi;
Pea mapaki ‘a e nifo ‘o e laione mui.
11‘Oku hē mama‘o ‘a e laione kaukaua ko e masiva ha‘alu,
Pea ‘oku movete ‘a e fānganga ‘o e laione toutama.
12Ko eni, na‘e faka‘ete mai ha folofola kia kita ni,
Pea na‘e ma‘u ‘e hoku telinga hano ngananganaiki.
13Kuo u mo‘ua ‘i he ngaahi fifili,
‘Oku tupu mei he vīsone ‘oku hoko po‘uli,
‘Oka tō ki ha tangata ha mohe ‘āvea.#Siope 33.15
14Na‘e ‘ohofia au ‘e ha ilifia, mo ha fakalilifu,
Pea fengatāliaki ai ‘a e fu‘u ‘ūhui ni.
15Toki ma‘ili mai ha matangi ki hoku mata;
Na‘e vavana hoku sino kotoa.
16Ne mamalu mai ‘a e Me‘a
Ka na‘e ‘ikai te u ma‘iloa hono fōtunga;
Ko ha ‘ata pē na‘e ma‘ali mai:
Na‘e ai ha ngananganaiki
Pea u ongo‘i ha lea,
17“‘E faitotonu ange koā ‘i he ‘Otua
Ha tangata-me‘a-vaivai?#4.17 ‘E… vaivai? pe ‘E faitotonu koā ha tangata ki he ‘afio mai ‘a e ‘Otuá?
‘Afio na‘e ngaohi ia?
18Vakai, na‘a mo hono lahi ‘oku ‘ikai te ne falala ki ai;
Pea ‘oku ne tuku ‘e ala hē ‘e he‘ene kau ‘āngelo:
19Huanoa ‘a e nofo fale kelekele,
‘A e fa‘ahinga ‘oku tupu‘anga efu,
Pea ‘oku momosingofua ange ‘i he mū!
20Mei he pongipongi ki he po‘uli ‘oku fai honau tu‘usi;
‘Oku nau ‘auha ai pē, kae ‘ikai ha tokanga.
21‘Ikai ‘oku pehē? ‘oku ta‘aki honau pou tēniti ‘i loto;
‘Oku nau mate kae te‘eki poto.
Currently Selected:
KO SIOPE 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
