KO SIOPE 40
40
1PEA fai atu ‘e Sihova ‘a e tali ‘o Siope, ‘o ne folofola mai,
2Fēfē eni ‘a e fakaanga? te ne fie hopo mo Sātai?
Ke tali mai ‘a e fakatonutonu ‘o ‘Elohā.
3Pea tali ‘e Siope kia Sihova ‘o ne pehē,
4‘Ā, ko e momo‘i me‘a au;
Ko e hā ha‘aku tali ‘e fai?
Ko e ‘ai pē hoku nima ki hoku ngutu.
5Kuo u lea tu‘o taha, kae ‘ikai te u tali;
‘Isa, kuo tu‘o ua, kae ‘ikai te u toe fai.
Ko Sihova
6Pea fai atu ‘e Sihova ‘a e tali ‘o Siope mei he loto taufa,
‘O ne folofola mai:
7Huke mu‘a ho vala hangē ha to‘a;
Ka u fehu‘i atu, ka ke hīnoi‘i au.
8Te ke laiki koā ‘eku totonu fakalao?
Te ke tuku au ko e halaia ka ke tonuhia koe?
9Pea tā ‘oku ‘iate koe ha nima tatau mo ‘Ela?
Pea ‘oku ke lava ke mana ‘o hangē ko ho‘ona?
10Pe‘i ‘ai mu‘a ha fotu mo ha mā‘olunga,
Pea kofu ‘aki ha lāngilangi mo ha fakangeingei.
11Tuku ke tafola ‘a e mahua ho houhau;
‘Io, sio ki he fu‘u mofuta ‘oku fai, ‘o lolomi.
12Sio ki he fu‘u mofuta ‘oku fai, ‘o fakatōkilalo‘i;
Pea laiki ‘a e kau angahala he potu ‘oku nau ‘i ai.
13Tāpuni kinautolu fakataha ‘i he efu:
Ha‘i kinautolu ‘i ha potu ‘oku puli.
14Pea te u toki fakamālō kiate koe ‘e au foki,
Tokua ‘oku lava ‘e ho nima to‘omata‘u ke fakamo‘ui ma‘au.
15Vakai mu‘a ‘a Pi‘imoti,#40.15 Pi‘imoti; ‘Oku faka‘uhinga ‘e ‘e he ni‘ihi ‘a e Pi‘imotí ko e hipó ia, ka ‘e he ni‘ihi ko ha manu fakailifia ‘i he ngaahi talatupu‘a ‘o ono‘aho.
‘A ia kuo u ngaohi ke fe‘ao mo koe;
‘Oku ne kai mohuku hangē ha pulu.
16Vakai ange hono ivi ‘ene tefito ki hono kongaloto;
Mo hono ngū ki he ngaahi uoua ‘o e kete.
17‘Oku ne tātāfue hono iku hangē ha va‘a sita:
‘Oku fihifihi ‘a e ngaahi uoua ‘o hono tenga.
18Ko hono ngaahi hui ko e ‘ū paipa kapa:
Ko hono hui palalulu ko e ngaahi va‘a ‘aione.
19Ko e mata ia ‘o e fai ki tu‘a ‘a ‘Ela:
Na‘e ‘ange ‘ene heletā ‘e ia na‘e ngaohi ia.#40.19 ‘Oku fihi.
20He ko e ngaahi mo‘unga ‘oku nau tokonaki ‘ene me‘akai;
Pea ko e manu kehekehe ‘o e vao ‘oku nau va‘inga ai.#40.20 ‘Oku ‘ikai ke mahino ‘a e faka-Hepelū ‘o e vēsí ni.
21‘Oku ne tokoto ‘i he lolo lotosi;
‘I he fihi ‘a kaho mo e ano.
22‘Oku fakamalumalu ki ai ‘a e lotosi mōno fale;
‘Oku kāpui ia ‘e he ngaahi uilou ‘o e tafenga vai.
23Vakai, ka fu‘u fā ‘a e vaitafe ‘oku ‘ikai te ne manavahē;
Ka ‘iloange ‘e ‘oho hake ‘a Soatani ki hono ngutu, falala pē ia.
24‘Ahi‘ahi ha taha: te ke lava koā ke puke ia ‘oku ne sio ki ai?
Te ke lava ke tui hono ihu ‘aki ha hele?
Currently Selected:
KO SIOPE 40: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
