KO SIOPE 39
39
1‘OKU ke ‘ilo ‘a e taimi ‘e fā‘ele ‘a e fanga kosi nofo mo‘unga?
‘Oku ke tokanga‘i ‘a e langā ‘a e fanga tia?
2‘Oku ke lava ke lau ‘a e ngaahi māhina kuo kakato?
Pea ‘oku ke ‘ilo ‘a e taimi te nau fā‘ele ai?
3‘Oku nau hanoku hifo, ‘oku nau tuku ‘enau fānau ke hae mai,
‘Oku nau sī atu honau mamahi‘anga.
4‘Oku ma‘u mālohi ‘enau fānau, ‘o tupu ke lahi ‘i he tuku‘uta;
‘Oku nau ‘alu atu, ‘o ‘ikai foki mai kiate ia.
5Ko hai na‘a ne tuku atu ‘a e ‘asi kaivao ke tau‘atāina?
‘Io, ko hai na‘e vete ‘a e ha‘i ‘o e kai kilokilo?
6‘A e manu kuo u tuku ke ne ‘api ‘aki ‘a e fonua mamate,
Pea ke ne nofo‘anga ki he kelekele māsima.
7‘Oku ne ‘ū‘ū ki he longoa‘a mai ‘a e kolo;
Kuo te‘eki ke ne ongo‘i ‘a e le‘o ‘o e tama fakateka.
8Ko e me‘a ‘oku ma‘u ‘i he mo‘unga ko hono kaikai‘anga ia;
Pea ‘oku ne ha‘ao ki he me‘a kotoa ‘oku mata.
9‘E loto ‘a e pufaloe vao ke ngāue kiate koe?
Te ne mohe po‘uli ki ho fale manu?
10Te ke no‘otaki ‘a e pufaloe vao,
Ke ‘i he kauefu ‘a e leta ‘o hono piti?
Te ne muimui kiate koe ‘i he ngaahi tele‘a, he toho ‘a e fu‘u leki?
11Te ke falala kiate ia koe‘uhi ko e lahi hono ngū?
Pe tuku ‘atā kiate ia ho‘o fita?
12Te ke tu‘anaki ki ai ke fakafoki ho tenga na‘e tō?
Mo tānaki ki ho haha‘anga uite?
13‘Oku faka‘ofo‘ofa ‘a e ngalulululu ‘a e kapakau ‘o e ‘ositalesi;
Ka he ko e kapakau mo e fulufulu ‘o e sitoaki?#39.13 ‘Oku ‘ikai ke mahino ‘a e faka-Hepelū ‘o e vēsí ni.
14He ‘oku ne li‘aki hono fua ‘i he kelekele,
‘O ne tata‘o pē ‘i he funga efu,
15Pea kuo ngalo ‘iate ia ‘e malaki nai ‘e ha va‘e,
Pe laiki ‘e he manu ‘o e vao.
16‘Oku ne fai ta‘e‘ofa ki he‘ene fānau, ‘o hangē ‘oku ‘ikai te nau kau kiate ia;
Ko e kulanoa ‘ene ngāue, ka ‘oku ‘ikai te ne hoha‘a:
17He kuo tuku ‘e ‘Elohā ke ngalo ‘ene poto,
‘O ‘ikai vahe kiate ia hono ‘inasi ‘atamai.
18Ka ‘oka ‘iloange te ne mafao atu, ‘o laka puna;#39.18 mafao atu, ‘o laka puna; ‘Oku ngali tonu ‘a hono hiki ‘o: kamata lele; ka ‘oku ‘ikai ke mahino hono faka-Hepeluú.
‘Oku ne kakae‘i ‘a e hoosi mo ia ‘oku heka ai.
19Ko koe koā ‘oku foaki ki he hoosi ‘ene mālohi?
Ko koe kuo kofu ‘aki hono kia ‘a e tala ‘oku tu‘u tekiteki na?
20Ko koe na‘e ngaohi ia ke fepunakaki hangē ha he‘e?
‘Oku fakangeingei ‘a e ha‘aha‘a ‘ene holi!
21‘Oku nau vaku ‘i he lautoka, ‘o hākahaka ‘i honau mālohi;
‘Oku ne ‘alu atu ke fakafetaulaki ki he mahafu;
22‘Oku ne kata mate ki he fakailifia,
‘O ‘ikai si‘i ke tuka:
Pea ‘oku ‘ikai te ne popoi ki he mata ‘o e heletā.
23‘Oku ngatata ‘i hono funga ‘a e hōfanga hau,
‘A e tao ngingila, mo e sifatau.
24‘I he‘ene ngaungaue, mo ‘ene ‘oho, ‘oku ne folofua ‘a e kelekele;
‘Oku ‘ikai te ne pā ki lalo ka ifi ‘a e talupite.
25‘I he ongo mai ‘a e ifi kotoa pē ‘oku mahe‘a mai ‘ene “Hahā!”
‘Oku ne fakahongi ki he tau kei mama‘o;
‘A e longoa‘a ‘o e hou‘eiki tau, mo e tuē.
26Ko ho‘o fakahinohino koā ‘oku fakafolau ai ‘a e haoke,
‘O ne folahi ai hono kapakau ke puna ki he tonga?
27Ko ho‘o fekau ‘apē ‘oku puna mā‘olunga ai ‘a e ‘īkale,
‘O ne ‘ai hono pununga ki he taua kapa?
28‘Oku ne nofo‘ia ‘a e makatu‘u, ‘o ngaohi ai hono pununga,
‘I hono tumutumu māsila mo e puke.
29‘Oku ne ha‘ao mei ai ki he‘ene kai,
‘Oku vakai‘i ‘e hono mata mei he mama‘o.
30Na‘a mo hono fānganga ‘oku nau misi toto,
Pea ko e potu ‘oku ‘i ai ‘a e mate, ‘i ai leva ia.#Māt 24.28; Luk 17.37
Currently Selected:
KO SIOPE 39: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
