KO SIOPE 32
32
Ko e Lea ‘a ‘Ēlihu
(32.1–37.24)
1PEA tuku ai ‘e he tu‘unga me‘a ‘e toko tolu ko ē ‘enau tali ‘a Siope, koe‘uhi ‘oku ne kei taukave ‘ene tonuhia. 2Toki kohu ‘a e ‘ita ‘a ‘Ilaiū foha ‘o Palakela, ko e ha‘a Pusa mei he fāmili ‘o Lame: ‘io, na‘e kohu ‘ene ‘ita kia Siope, koe‘uhi ko ‘ene fakatonuhia‘i ia ‘e ia, ‘o tuku ‘a e ‘Otua. 3Na‘e kohu foki ‘ene ‘ita ki hono kaume‘a ‘e toko tolu, koe‘uhi na‘e ‘ikai te nau ma‘u ha tali; ka neongo ia ka nau fakahalaia‘i ‘a Siope. 4Pea kuo nofo‘aki tali ‘e ‘Ilaiū mo ‘ene ‘ū lea, kae‘oua ke ‘osi ‘a Siope, he kuo motu‘a ange ‘a kinautolu ‘iate ia. 5Ka ‘i he vakai ‘e ‘Ilaiū ‘oku ‘ikai ha tali ‘i he ngutu ‘o e tu‘unga me‘a ‘e toko tolu, pea kohu ai ‘ene ‘ita.
6Toki tali ‘e ‘Ilaiū foha ‘o Palakela ko e ha‘a Pusa, ‘o ne pehē,
Ko e si‘i au ‘i he lau motu‘a,
Pea ko e ha‘a sialea kimoutolu;
Ko ia na‘a ku fakateteki,
‘O u papaka ke ‘a‘au atu ‘a e me‘a kuo u ma‘u.
7Na‘a ku pehē, Na‘e mei lea ‘a taimi lahi,
Pea ke faka‘ilo poto ‘e he lahi ta‘u.
8Ka ko e laumālie ‘i he tangata, ko ia ia;
‘Io, ko e hō ‘a Sātai ‘oku ne ‘atamai ai.
9Tala‘ehai ko e lalahi pē ‘oku poto,
Pea tala‘ehai ko ha‘a mātu‘a pē ‘oku ‘ilo ‘a e totonu.
10Ko ia ‘oku ou pehē, Fanongo mai koe kiate au,
Ka u ‘a‘au foki ‘e au ‘a e me‘a kuo u ma‘u.
11Tū na‘a ku nofo ‘amanaki ki ho‘omou lea;
Na‘a ku fokotu‘u telinga, kae‘oua ke ‘osi ho‘omou fakamatala:
Kae‘oua ke mou hakule ha‘amou faka‘uhinga.
12Ka neongo na‘a ku mātu‘aki tokanga atu kiate kimoutolu;
Kae uoke, ‘oku ‘ikai ha taha ‘e ha‘aki ‘a Siope,
Ha taha ‘e matali ‘ene ngaahi lea–hamou taha.
13Ka te mou lau ‘apē,
Kuo tau a‘u atu ki ha poto;
Ko ‘Ela pē ‘e mafakateka ia; ‘e ‘ikai lava ‘e ha tangata:
14Ka kuo te‘eki ke ne faka‘otu ‘ene lau kiate au;
Pea tala‘ehai te u tali ‘aki ‘a e ngaahi lea ‘amoutolu.
15Kuo puputu‘u ‘a ē; ‘oku ‘ikai ha‘anau kei tali:
Kuo mahu‘i ‘a e lea meiate kinautolu.
16‘Io, ne u tatali, kae ‘ikai te nau lea,
Ka nau mo‘unofoa pē, ‘o ‘ikai toe tali.
17Ka u lea mu‘a ‘e au koe‘uhi ko ho‘oku, ‘inē?
‘Io, ka u ‘a‘au ‘a e me‘a kuo u ma‘u foki ‘e au.
18He ‘oku ou pito he lea;
Ko e laumālie ‘i hoku fatu ‘oku kukuta tu‘u, ‘o ue‘i au.
19Seuke, ko hoku fatu ‘oku hangē ko e uaine ‘oku ‘ikai hano fakamao:
‘Oku hangē ka pā, tatau mo e ‘ainga uaine fo‘ou.
20Ka u lea mu‘a ka u ma‘u ha nonga;
Ka u to‘o hoku ngutu, ‘o u fai ha tali.
21Molekemama‘o ha‘aku toka‘i ha taha;
Pea tala‘ehai te u lapu ki ha tangata.
22Seuke, ‘oku ‘ikai te u ‘ilo ki he lapu;
Ka ne u fai ia, ko e kemo pē ‘a e ‘ave au ‘e he ‘Afio na‘e ngaohi au.
Currently Selected:
KO SIOPE 32: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
