KO SIOPE 33
33
1PEA ko eni, Siope, ke ke fanongo mu‘a ki he‘eku lea,
Pea fokotu‘u telinga mai ki he‘eku ngaahi fakamatala kotoa.
2Vakai mai, kuo u fakaava hoku ngutu,
‘Oku lea hoku ‘elelo ‘i hoku ‘ao‘ingutu.
3Ko ‘eku ngaahi lea ko e totonu ‘o hoku loto;
Pea ko e me‘a kuo ‘ilo ‘e hoku loungutu, ‘e laku atu ke tafesino‘ivai.
4Ko e laumālie ‘o ‘Ela na‘e ngaohi au,
Pea ko e hō ‘a Sātai ne ue‘i ke u mo‘ui.
5Tali au, ‘o kapau te ke lava;
Fakatē ke fai mo au; ‘ai ke ma‘u ho‘o tu‘u.
6Vakai, ko au ‘oku ou alāanga mo koe; ko e me‘a ‘a ‘Ela
Na‘e la‘usi mo au foki mei he ‘umea.
7Seuke, ko hoku ngeia ‘e ‘ikai te ne fakailifia‘i koe;
Pea tala‘ehai ‘e mamafa fau ‘eku tata‘o atu.
8Ko eni, ko ho‘o lea na‘e tau mai ki hoku telinga,
‘Io, na‘a ku ongo‘i ho le‘o na‘e pehē mai,
9“Kuo u ma‘a au, ‘o ta‘eangahala;
Ko e ‘ata‘atā kita, ‘o ‘ikai ha kovi ‘iate au.
10Vakai, ‘oku Ne kumi tu‘unga ke fili ‘aki au;
‘Oku Ne lau au ko hono fili.
11‘Oku ne ‘ai hoku va‘e ki he ‘akau kii‘i,#Siope 13.27
‘Oku ne lama hoku ‘alunga kotoa.”
12Eni, ‘i he me‘a ko ia ‘oku ‘ikai te ke totonu
Ka u tali atu mu‘a;
He ‘oku lahi fau ‘a ‘Elohā ki he tangata me‘a vaivai.
13Ko e hā kuo ke talatalaaki ai ia?
Tokua ‘oku ‘ikai te ne momo‘i fakamatala ‘ene ngaahi me‘a.#33.13 Ko e hā… ngaahi me‘a; Ko e hiki ‘e taha: Ko e hā ‘oku mo fakakikihi ai mo iá? He ‘oku ‘ikai te ne momo‘i fakamatala ‘ene ngaahi me‘á.
14He ‘oku ai ha anga ‘e taha ‘o e lea ‘a ‘Ela:
‘Isa, ‘oku ua; ka tala‘ehai ‘oku tokanga ‘e he tangata,
15‘I he ngaahi misi, ‘i ha vīsone po‘uli,
Ka tō ki he kakai ha mohe ‘āvea,
He‘ene fa‘a mohe ‘i he mohenga;#Siope 4.13
16‘Oku ne toki tatala ‘a e telinga ‘o e kakai,
‘O ne sila‘i ai ‘ene ngaahi tākitala;
17Ke fakaafe ‘a e tangata mei he‘ene fa‘ahinga fai,
Pea ke fakapuli mei he tangata fita ‘ene kāfakafa.
18Koe‘uhi ke ne ta‘ofi hono laumālie mei he luo,
Pea ke ‘oua mole ‘ene mo‘ui he velo.
19‘Oku fai foki hono akonekina ‘aki ‘a e mamahi ‘i hono mohenga,
‘O fefaka‘ī‘ī‘aki ma‘u pē hono ngaahi hui:
20Pea fehi‘a ‘ene mo‘ui ki he me‘a tokoni,
Pea neongo ‘ene fiekaia, ka ne fehi‘a ki he me‘akai manako.
21‘Oku ‘osi‘osi hono kakano, ‘o ‘ikai kei hā,
Kae ‘ilonga ‘a e ‘ū hui na‘e ‘ikai kei hā.
22Toki nga‘unu atu hono laumālie ki he luo,
Pea mo ‘ene mo‘ui ki he ha‘a Tāmate.
23Ka ai ha toko taha ‘e tu‘u ma‘ana,
Ha ‘āngelo taukapo,
Ko e taha mei he toko afe,
Ke fakahā ma‘a e tangata ha‘ane totonu;
24Te ne toki ‘alo‘ofa ki ai, ‘o ne folofola,
“Veteange, ke ‘oua te ne ‘alu hifo ki he luo:
Kuo u ‘ilo ha fakamolemole‘anga.”
25Tupu ‘āfa‘afa ai hono kakano, ‘o hulu ‘i ha tamasi‘i;
Foki ai ia ki he taimi talavou:
26Lotu ia kia ‘Elohā, ‘o ne hōifua mei ai;
Ko ia ‘oku ne sio ki hono fofonga mo e mavava:
Pehē ‘ene fakafoki ki he tangata ‘ene totonu.
27‘Oku ne hiva saame ki he kakai, ‘o ne pehē,
“Na‘a ku angahala, ‘o piko‘i ‘a e totonu,
28Kuo Ne fakahaofi ‘eku mo‘ui mei he mole ki he luo,
Pea ‘oku mamata ‘eku mo‘ui ki he maama.”
29Vakai, ‘oku fai ‘e ‘Ela ‘a e ngaahi me‘a ni kotoa,
Tu‘o ua, tu‘o tolu, ‘i he fai mo ha tangata fita;
30Ke fakafoki ‘ene mo‘ui mei he luo,
Ke ne maama ‘i he maama ‘a e kau mo‘ui.
31Tokanga mai, Siope, fanongo kiate au:
Fakalongo pē koe ka u lea ‘e au.
32Kapau ‘oku ai ha‘o lea, pea tali au:
Lea, he ‘oku ou faka‘amu ke ke hā tonuhia.
33Ka ‘ikai, pea fanongo mai koe kiate au;
Fakalongo, ka u ako kiate koe ha poto.
Currently Selected:
KO SIOPE 33: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
