KO SIOPE 31
31
1NA‘A ma alea mo hoku mata, ‘o u fai tu‘utu‘uni ki ai;
Pea fēfē ai ha‘aku sio kovi ki ha ta‘ahine?
2Pea fēfē ai haku tofi‘a meia ‘Elohā ‘i ‘olunga,
Mo haku ‘inasi meia Sātai ‘i Taukakapa?
3‘Ikai ‘oku a‘u ‘a e tu‘utāmaki ki he pau‘u?
Mo ha tā kehe ki he kakai ‘oku nofo ki he kovi?
4‘Ikai ko e ‘Afio ia ‘oku ne lama hoku ngaahi ‘alunga?
Mo lau ‘eku taulaka kotoa?
5Kapau ‘oku lau kuo u laka atu, ‘o ō mo loi,
Pea kuo vave hoku va‘e ke muimui kia kākā:
6Ke fakafuofua au ‘e He‘ene ‘Afio ‘i he me‘a tautau totonu,
Kae ‘afio‘i ‘e ‘Elohā ‘eku tonuhia.
7Kapau kuo afe hoku fononga mei he hala,
Pea muimui hoku loto ki hoku mata,
Pea lave ha ‘uli ki hoku ‘aofi nima:
8Tuku ke u to‘e au kae kai ‘e ha taha kehe;
Pea ke ta‘aki fu‘u hoku ngaahi huli.
9Kapau kuo to‘oa hoku loto ki ha fefine alafia,
Pea u tuku toitoi ki he matapā ‘o hoku kaungā‘api:
10Pea tuku ke fai ‘a e momosi mahoa‘a ‘e hoku uaifi ki ha taha kehe,
Pea mākau ‘iate ia ha ni‘ihi kehe.
11He ko e angahala fakalielia ia:
Pea ko e kovi ke ‘ave ki he fakamaau.
12Seuke, ko e afi ia na‘e mei keina ‘o a‘u ki ‘Apatoni,
Pea ta‘aki fu‘u hoku fua kotoa.
13Ka ne u ta‘etoka‘i ‘a e totonu fakalao
‘A ‘eku tamaio‘eiki pe kaunanga,
‘I he ‘i ai ‘enau me‘a mo au:
14Pea ko e hā ‘aku ‘e fai ‘oka tu‘u hake ‘a ‘Ela?
Pea ko e hā te u tali ‘aki, ‘oka fai ‘e ia ‘a e sivi?
15‘Ikai ko ia na‘e ngaohi au ‘i he fatu,
‘A ‘Ene ‘Afio ai pē na‘e ngaohi ‘ena?
Pea ko e Toko Taha ai pē na‘e fa‘u kimaua ‘i he manava?
16‘Ilo ‘e au ‘o kapau kuo u ta‘ofi ‘a e masiva mei he‘ene holi,
Pe kuo u tuku ke ‘osi‘osi ‘a e mata ‘o si‘i uitou he holi noa,
17Pe kuo u kai toko taha ‘eku momo‘i mā,
‘O ‘ikai tuku ke kai ai ‘a e tamai mate!
18(‘Ā, talu ‘eku talavou mo ‘eku pusiaki ‘a e siana ko ē,
‘Ou hangē ha tamai kiate ia;
Pea talu hoku fanau‘i mo ‘eku fale‘i ‘a si‘i fefine ko ē.)#31.18 ‘Oku ‘ikai ke mahino ‘a e faka-Hepelū ‘o e vēsí ni.
19‘Ilo ‘e au ‘o kapau na‘a ku sio ki ha taha
‘Oku mei tu‘utāmaki ko e masiva kofu,
Mo si‘i masiva ‘oku ‘ikai hano kafu;
20Kapau na‘e ‘ikai tāpuaki‘i au ‘e hono kongaloto,
‘O ‘ikai te ne māfana mei he fulufulu ‘o ‘eku fanga sipi!
21‘Ilo ‘e au ‘o kapau na‘a ku ino hoku nima ki he tamai mate,
Ko ‘eku sio ‘oku ‘i he matanikolo hoku poupou:
22Ke hu‘i hoku uma mei he hui fohe,
Pea motu hoku nima mei he hokotanga!
23He na‘e ‘iate au ‘a e manavahē ki ha tu‘utāmaki meia ‘Ela;
Pea na‘e ‘ikai te u lava ke fai ha me‘a telia hono fu‘u ngeia.
24‘Ilo ‘e au ‘o kapau na‘a ku tu‘u ‘i he koula ‘eku falala,
Pea u pehē ki he koula mahu‘inga,
Ko hoku pāletu‘a koe!
25‘Ilo ‘e au ‘o kapau na‘a ku fu‘u fiefia ‘i he hulu ‘eku koloa,
Mo fu‘u ma‘u hoku nima!
26‘Ilo ‘e au ‘o kapau na‘a ku sio ki he tapa mai ‘a e la‘ā,
Pe ko e hā‘ele ‘a e māhina ko e koto ngingila,
27Pea to‘oa fufū ai hoku loto,
Pea u lī atu ha ‘uma ki ai!
28Ko e kovi mo ia foki ‘e ‘ave ki he fakamaau:
He ko ‘eku faka‘otuamate‘i ‘a ‘Ela ‘oku ‘afio mei ‘olunga.
29‘Ilo ‘e au ‘o kapau kuo u fiefia ‘i he tu‘utāmaki ‘a hoku fili,
‘O māfana hoku loto ‘i he ma‘u ia ‘e he kovi!
30‘Ā, na‘e ‘ikai te u tuku hoku ‘ao‘ingutu ke angahala,
He tuputupulefanua ke tō ha mala ki he‘ene mo‘ui.
31‘Ilo ‘e au ‘o kapau na‘e ‘ikai lau ‘e he kakai ‘o hoku tēniti,
“Koloto ā ke ‘ilo ha taha kuo ‘alu mola he ‘api ni,
‘O ‘ikai mākona ‘i he kai kanomate!”
32Na‘e ‘ikai mohe ‘i tu‘a ‘a e ‘āunofo;
Na‘a ku fakaava hoku matapā ki hala.
33‘Ilo ‘e au ‘o kapau kuo u tata‘o ‘eku ngaahi angahala hangē ko ‘Ātama,
‘O fufū ‘eku kovi ‘i hoku fatafata;
34Ko ‘eku teteki na‘a ai ha fu‘u lolofi,
Mo ‘eku manavahē telia ‘a e manuki ‘a e ngaahi matakali;
‘A ia ‘e pau ai ‘eku nofo mavahe, ‘ikai ‘alu ki tu‘a–
35Taumaiā ‘oku ou ma‘u ha taha ke fanongo kiate au!
(Vakai, ko ‘eku kolosi ē, ke tali au ‘e Sātai.)
Pea ke u ma‘u ‘a e tohi kuo fai ‘e he tangata kuo ma hopo!
36Tala atu, te u ‘ai ia ki hoku uma;
Te u takai mōku ‘ū kalauni.
37Te u ‘a‘au hokohoko kiate ia ‘eku ngaahi taulaka;
Te u ‘unu‘unu kiate ia hangē ha ‘eiki.
38Kapau kuo tangi hoku kelekele koe‘uhi ko au,
Pea fetāngihi hono ngaahi kauefu,
39Kapau kuo u kai hono mālohi ta‘etotongi,
Pe fakaka‘anga ‘a e mo‘ui ‘a e kakai ‘oku ‘o‘ona:
40Pea ke tupu ā ‘a e talatala ko e fetongi ‘o e uite!
Mo e tea ko e fetongi ‘o e pa‘ale!
Ko e ngata ē ‘o e lea ‘a Siope.
Currently Selected:
KO SIOPE 31: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
