KO SIOPE 30
30
1KA ko eni ‘oku manuki‘i au ‘e kinautolu ‘oku talavou ‘iate au,
Ko e hako ‘o e fa‘ahinga ‘e ‘ikai te u tuku ke ō mo ‘eku fanga kulī sipi.
2Seuke, he ko e hā kiate au ‘a e ngū ‘o honau nima?
Kuo mole honau mālohi;
3Ko e koto tutue ‘i he masiva mo e fiekaia;
Ko e fa‘ahinga ‘oku huhua ‘enau kai ‘i he funga vaha makamaka;
Ko e potu kei ma‘u hono anga mu‘a ko e maveuveu mo e anganoa.
4Ko e fa‘ahinga ‘oku fusi ‘akau māsima ‘oku huluni ‘i he te‘ehoosi:
Mo e aka‘i sūnipa ma‘anau kai.
5‘Oku kapusi kinautolu mei he nofo;
‘Oku kaila‘i kinautolu hangē ha kaiha‘a.
6Ka ai ha tele‘a ‘oku fakailifia ange,
Kuo pau ko honau nofo‘anga ia,
‘I he ngaahi ‘ana ‘i he kelekele mo e makatu‘u.
7‘Oku nau ngī-ngā mai mei he loto te‘ehoosi;
‘Oku hakaluku ‘enau nofo ‘i he lalo talatala.
8Ko e hako ‘o e fa‘ahinga vale,
Kae‘uma‘ā ko e hako ‘o e kakai noa:
Na‘e fakase‘e kinautolu mei he fonua.
9Ka ‘i he taimi ni kuo u hoko ko e ta‘anga ‘o e fa‘ahinga ko ia,
‘Io, kuo u hoko ko e me‘a ke nau taungalea ki ai.
10‘Oku nau fakalili‘a kiate au, ‘oku nau fakamama‘o,
‘Oku ‘ikai te nau popoi ke ‘a‘anu ki hoku mata.
11He kuo Ne fakangaloku ‘eku uka,
‘O fakamo‘ulaloa‘i au;
Ko ia, kuo veteange foki ‘e he fa‘ahinga na
‘a e piti na‘a nau ‘ai ‘i hoku ‘ao.
12‘Oku laoaki mai ‘i to‘omata‘u ‘a e fanga toki tupu na;
‘Oku nau heu‘i hoku va‘e:
Seuke, ‘oku nau tanu puke tau kiate au.
13‘Oku nau maumau hoku hala,
‘Oku nau mōia atu hoku have‘i–
‘a e fa‘ahinga na ‘oku ‘ikai hanau pāletu‘a!#30.13 hanau pāletu‘a! ‘Oku ngali tonu hono hiki ‘o: ‘Oku ‘ikai ha taha ke ne ta‘ofi kinautolu.
14Hangē kuo maumau ha konga lahi ‘o hoku ‘ā, ‘o nau ‘oho mei ai;
Lolotonga ‘a e mokulu ‘a e me‘a, ‘oku nau mateka mai.
15Kuo liliu ‘a e ngaahi ilifia, pea ko au eni ‘oku ou ongo‘i.
‘Oku nau sese‘e hoku lāngilangi hangē ha tu‘oni matangi;
Pea ‘oku mole ‘eku tu‘umālie hangē ha ‘ao.
16Ka ko e taimi ni ‘oku malingi pē kiate au
‘a e me‘a ‘oku ‘i hoku loto.
‘Oku ma‘u puke au ‘e he ngaahi ‘aho kātaki.
17‘Oku vili hoku hui ‘e he pō, ‘o hangē ka tatala;
Pea tala‘ehai ‘oku mohe ‘eku kau fe‘ola.
18‘I he fu‘u mālohi ‘o e mahaki ‘oku hā kehe hoku kofu:
‘Oku piki kiate au hangē ko e kola ‘o hoku sote.
19Kuo ne lī au ki he pelepela,
Pea ‘oku ou hangē ko ha koto efu mo e efuefu.
20‘Oku ou tautapa atu, ka ‘oku ‘ikai te ke tali au:
‘Oku ou mo‘utu‘ua pē, ka ke fakasio mai pē.
21Kuo ke liliu, ‘o hoko ko e taha ke fakamamahi kiate au:
‘Oku ke ngāue‘aki ‘a e ngū ‘o ho nima ke fakatanga‘i au.
22‘Oku ke fakaheka au ki ha fo‘i matangi:
‘Oku ke tuku ke u ma‘ali‘ali atu ai,
Pea ke u mole ‘i he felasilasi ‘a e taufa.
23Seuke, ‘oku ou ‘ilo pē te ke ‘omi au ki he mate,
Pea ki he fale fakataha‘anga ‘o e kakai mo‘ui kotoa.
24Ka ‘ikai ‘oku fai ha tautapa ‘oka tō ha taha?
Seuke, ‘i he tu‘utāmaki ‘a ha taha ‘oku fai ‘a e kaila
Koe‘uhi ko e ngaahi me‘a ko ia.#30.24 ‘Oku fihi ‘aupito ‘a e vēsí ni.
25He ‘ikai ne u tangi au ‘i he ‘aho na‘e faingata‘a‘ia ai ha taha?
Na‘e mamahi hoku loto koe‘uhi ko e masiva.
26He ko e lelei na‘a ku ‘amanaki ki ai;
Kae hoko mai ‘a e kovi:
Pea na‘a ku tatali ki he maama;
Kae hoko mai ‘a e po‘uli ‘o e po‘uli.
27‘Oku lili hoku fatu, ‘o ‘ikai toka;
Kuo mo‘utāmakia au ‘e he ngaahi ‘aho kātaki.
28Na‘a ku ‘alu fano pē kili ‘ui,#30.28 kili ‘ui; pe Kuo ‘ai tauanga‘a. ka na‘e ‘ikai ko e la‘ā;
Na‘a ku tu‘u ‘i he ‘ao ‘o e kakai, ‘o tangilāulau.
29Kuo u hoko ko e tokoua ‘o e fanga siakale,
Mo e kaume‘a ‘o e fanga ‘ositalesi.
30Ko hoku kili ‘oku ‘uli‘uli, pea mafohi,
Pea ‘oku vela hoku hui he pakukā.
31Ko ia ‘oku nofo ‘eku ha‘ape ki he tangi pē,
Pea fakapetetangi pē ‘a ‘eku mimiha.
Currently Selected:
KO SIOPE 30: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
