KO SIOPE 29
29
1PEA fai atu ‘e Siope,
‘O ne ofa‘aki ‘ene ta‘anga, ‘o ne pehē:
2Taumaiā ke u hangē ko e ngaahi māhina mu‘a,
‘A e ngaahi ‘aho ne tauhi ai au ‘e ‘Elohā!
3He taimi na‘e ulo ‘ene maama ‘i hoku funga ‘ulu,
‘I he‘ene fakamaama na‘a ku laka ‘i he po‘uli!
4Ke u hangē ko e taimi na‘a ku utu hoku ta‘u,
He taimi na‘e toka ki hoku tēniti ‘a e tāpuaki fufū ‘a ‘Elohā!
5‘a e taimi na‘e kei kau mo au ‘a Sātai;
Na‘e kei kāpui au ‘e he‘eku fānau!
6‘a e taimi na‘e lōmaki hu‘akau fatu ‘a hoku ngaahi laka‘anga,
Pea fakapuna ‘e he makatu‘u he‘eku ofi ki ai ‘ani tafenga lolo!
7Ka u ka ‘alu ki he matanikolo, ‘ohake ki kolo,
Ka u ka teu‘i hoku nofo‘anga ‘i mala‘e;
8Ka sio kiate au ha kau talavou, na‘a nau toi,
Pea mālanga hake ‘a mātu‘a, ‘o tu‘u ai pē;
9Na‘e fakama‘uma‘u ‘a e lea ‘a hou‘eiki,
‘O nau kū ngutu pē.
10Na‘e toi ‘a e le‘o ‘o ha‘a fotu,
Pea piki honau ‘elelo ki honau ‘ao‘ingutu.
11Seuke, ka fanongo ‘e ha telinga ko au, na‘a ne talamonū;
Pea ka sio mai ha mata, na‘e fai ha fakamo‘oni ma‘aku:
12He na‘a ku hamusi ‘a e tu‘utāmaki na‘e tautapa,
Ko e tamai mate foki, mo ia ‘oku ‘ikai hano pāletu‘a.
13Na‘e tō kiate au ‘a e tāpuaki ‘a e mei tu‘utāmaki,
Pea ko e loto ‘o si‘i uitou na‘a ku fakahiva fiefia.
14Ko e totonu na‘a ku tui mōku kofu loto, pea ne kofu ‘aki au,
Ko ‘eku fai ki he lao ko e kofu tōtōlofa mo e ao.
15Ko e mata au ki he kui,
Pea ko e va‘e au ki he heke.
16Ko e tamai kita ki he masiva:
Pea u hakule ‘a e tangi ‘a e kakai na‘e ‘ikai te u ‘ilo ki ai.
17Pea u laiki ‘a e nifo ‘o e pau‘u,
‘O u fa‘ao ‘a e me‘a kuo ne ‘ūtaki.
18Pea u pehē, Kuo pau te u mate ‘i he fe‘ao mo hoku pununga,
Te u fakalahi ta‘u hangē ko e Finiki.
19‘E ava hoku akaaka ki vai,
Pea ‘e hausia hoku ngaahi va‘a he pō kotoa.
20‘E fe‘ao mo au hoku lāngilangi, ‘o fo‘ou ai pē,
Pea ‘e foki ai pē ‘a e ngū ‘o e kaufana ‘oku ou puke.
21Na‘a nau fanongo kiate au ‘o talitali,
Pea nau fakalongo ke ma‘u ‘eku fakakaukau.
22Hili ‘eku lea na‘e ‘ikai ha toe lea;
Pea ko ‘eku lea kiate kinautolu na‘e hangē ha tu‘u tofu.
23‘Io, na‘a nau tatali kiate au hangē ha tatali ki he ‘uha;
Pea nau ‘ai ke mafa‘a honau ngutu, ‘o hangē ko e fai ki he vai mui.
24Na‘a ku malimali kiate kinautolu ‘i he‘enau ta‘etui;
Pea ko e maama ‘o hoku mata na‘e ‘ikai te nau lava ke liliu.
25Na‘a ku fili honau hala, ‘o u nofo ko e angi;
‘Io, na‘a ku nofo hangē ko ha tu‘i mo ha kongakau;
Hangē ko ia ‘oku ‘a‘ana ‘a e fakalelu ‘o e kau tangi.
Currently Selected:
KO SIOPE 29: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
