KO SIOPE 28
28
Ko e Fakahīkihiki‘i ‘o e Potó#28.0 ‘Oku ‘ikai ke mahino mei he faka-Hepeluú pe ko hai ‘oku lea ‘i he vahe ko ení.
1TŪ ko e siliva ‘oku ai hono keli‘anga,
Pea ai ha nofo‘anga ‘o e koula ‘oku fakama‘a vai;
2‘Oku ma‘u ‘a e ‘aione mei he efu,
Pea ‘oku haka ‘a e maka ‘o kapa.
3Ko e tangata–‘oku ne teke atu ‘a e ngata‘anga ‘o e po‘uli,
Ko ‘ene ngata leva ha potu, hakule atu ‘a e tangata ia
‘a e maka ‘o e po‘uli lōlō mo e ‘ata ‘o mate.
4‘Oku ne foa ha tafu mama‘o mo e nofo;
‘Oku puli kinautolu mei he va‘e ‘o ē ‘i ‘olunga;
‘Oku nau tāupe mama‘o mei he kakai, ‘o sīsīfā holo.
5Ko e fonua–‘oku tupu mei ai ‘a e mā;
Pea ko hono takele kuo mafuli hangē ko e fai ‘e he afi.
6Ko hono ngaahi maka ko e potu ‘o e sāfaia,
Pea ‘oku ‘i ai ‘a e efu koula.
7Ko e hala ko ē–‘oku ‘ikai ‘ilo ‘e he manupuna fekai,
Te‘eki hila ki ai ‘a e mata ‘o e faokona:
8Te‘eki hā‘elea ia ‘e ha manu hau,
Te‘eki laka ai ‘a e tama ngungulu.
9Na‘a mo e makahunu ka ‘oku ne ‘ai atu hono nima ki ai;
‘Oku ne fuli takele ‘a e ngaahi mo‘unga.
10‘Oku ne foa halanga ‘i he maka;
Pea ‘ilonga ha me‘a mahu‘inga, pea sio ki ai hono mata.
11‘Oku ne punupunu ‘a e ngaahi vai ke ‘oua te nau tutulu mai;#28.11 ‘Okú ne… tutulu mai; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘Oku nau keli ‘o a‘u ki he ngaahi tefito‘i tupu‘anga ‘o e ngaahi vaitafe.
Pea ko e me‘a ‘oku fufū ‘oku ne ‘omi ki he maama.
12Ka ko Poto ‘e ‘ilo ia ‘i fē?
Pea ko e fe‘ia ‘a e potu ‘o e maama?
13‘Oku ‘ikai ‘ilo ‘e ha Maama hono fokotu‘unga;
‘Io, ‘oku ‘ikai ma‘u ‘i he fonua ‘o e kau mo‘ui.
14‘Oku pehē ‘e Lolofonua,
‘Oku ‘ikai ‘iate au.
Pea ‘oku pehē ‘e he moana,
‘Oku ‘ikai nonofo mo au.
15‘E ‘ikai ‘ange ki ai ‘a e koula ma‘opo‘opo,
Pea ‘e ‘ikai fua siliva mōno totongi.
16‘E ‘ikai fua ki ai ‘a e tu‘utanga koula mei ‘Ōfela;
‘A e ‘onike mahu‘inga, mo e sāfaia.
17‘E ‘ikai ala tatau mo ia ‘a e koula mo e sio‘ata;
Pea ‘e ‘ikai fetongi ‘aki ha nāunau koula fungani.
18Ko e feo kula mo e kilisitala ‘e ‘ikai ha momo‘i lau ki ai:
Seuke, ko e totongi ki he poto ‘oku hulu ‘i he makakula koloa.
19‘E ‘ikai ala tatau mo ia ‘a e tōpasi mei Kusa,
Pea ‘e ‘ikai fua ki ai ‘a e koula ‘asinisini.
20Ka ko Poto–‘oku ha‘u mei fē ia?
Pea ko e fe‘ia ‘a e nofo‘anga ‘o maama?
21He kuo puli mei he mata ‘o e kau mo‘ui,
Pea kuo fufū mei he manupuna ‘o e ‘atā.
22Ko Hētesi#28.22 Hētesi; pe ‘Apatoni. mo Mate ‘oku na pehē,
“TŪ kuo mofisi mai hono talanoa ki homa telinga.”
23Ko e ‘OTUA pē ‘oku mahino ki ai hono hala,
Pea ko ia pē ‘oku ne ‘ilo hono potu.
24He ‘oku a‘u ‘ene kilo ki he ngaahi ngata‘anga ‘o māmani,
Pea ko e lalo langi kotoa ‘oku ne sioa.
25Ko e taimi na‘a ne fai ‘a e mamafa ‘o e matangi;
Mo fakafuofua ‘a e vai ‘i ha me‘a fua,
26He‘ene fokotu‘u ha tu‘utu‘uni ki he ‘uha,
Mo e hala ki he ‘uhila ‘o e mana;
27Ko e taimi ko ia na‘a ne sio ki ai, ‘o ne ‘a‘au;
Na‘a ne tuku hano tu‘unga, ‘o ne hakule foki.
28Pea ne toki folofola ki he tangata,#Saame 111.10; Pal 1.7; 9.10
Vakai, ko e ‘apasia kia ‘Ātonai, ko ia ia ‘a e poto.
Pea ko e afe mei he kovi ko ‘ete maama ia.
Currently Selected:
KO SIOPE 28: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
