KO SIOPE 22
22
Ko e Tālanga Hono Tolú
(22.1–27.23)
‘Elifasi
1PEA tali ‘e ‘Elifasi mei Tīmani, ‘o ne pehē.
2Na‘a mo e tangata mālohi te ne lava koā ke ‘aonga kia ‘Ela?
Seuke, ‘e ‘aonga ‘a e tangata ‘atamai kiate ia pē.#Siope 35.6-8
3‘E ma‘u ha me‘a ‘e Sātai koe‘uhi ko ho‘o faitotonu?
Pe fakalahi ‘ene koloa ‘i ho‘o fakahaohaoa ho ngaahi ‘alunga?
4Ko hono manavahē koā ‘oku ne akonaki‘i ai koe,
‘Oku ne hopo mo koe ‘i he fakamaau?
5‘Ikai ko e lahi pē ho‘o kovi?
Mo e ta‘efa‘alaua ho‘o faihala?
6Tala atu, na‘a ke ‘eke talifaki mei he kāinga tu‘unga‘a pē,
Pea ke to‘o ‘a e kofu kae telefua.
7Tala‘ehai na‘a ke ‘ange ha vai ki he fie inu.
Pea na‘a ke fakafisi ki he kole me‘akai ‘a e fiekaia.
8Tokua ko e nima mālohi ‘oku ‘o‘ona ‘a e fonua.
Pea ko ha‘a ‘ilonga pē ke nofo ai.
9Ko si‘i kau uitou na‘a ke fekau ke ‘alu mola pē.
Pea ko e nima ‘o e tamai mate ‘oku laiki.
10Ko hono ō ē ‘oku loki koe ‘aki ‘a e ngaahi tauhele.
Pea ‘oku faka‘ohofi koe ‘e he fakailifia fakafokifā.
11Pea na‘a ‘oku ‘ikai te ke ‘ilo‘i ‘a e po‘uli,
Mo e lōmaki ‘oku ne fakapulonga koe.
12‘Ikai ko e taupotu ‘o langi ‘a ‘Elohā?
Pea vakai ‘a e ngaahi fetu‘u hono ‘ikai mā‘olunga!
13Pea ke pehē nai, “Ko e hā ‘oku ‘ilo ‘e ‘Ela?
‘E ‘asi ‘ene fakamaau ‘i he po‘uli matolu?
14Ko e ngaahi ‘ao na ko e pulonga kiate ia,
Pea ‘ikai te ne ‘ilo mai,
Pea ko e aku pē ‘o langi ‘oku fai ai ‘ene hā‘ele.”
15Te ke piki pē ki he hala tupu‘a,
‘A ia ne foua ‘e he kau pāte‘i angahala?
16‘A kinautolu na‘e fena te‘eki hoko honau taimi,
Na‘e tafe atu ‘a e tu‘unga kolo hangē ha vai.
17‘A ia na‘a nau pehē kia ‘Ela, “Hiki meiate kimautolu;”
Pea, “Ko e hā ‘e fai ‘e Sātai ma‘atautolu?”
18‘Osi, ko ia na‘a ne fakafonu honau fale ‘i he lelei.
Ke mama‘o meiate au foki ‘a e fāliunga ‘a e kau angahala!
19‘E sio ki ai ‘a e kau mā‘oni‘oni pea te nau fiefia.
Pea kata kakae ki ai ‘a e kau ‘ata‘atā.
20“Tā ‘oku faka‘auha ‘a e kakai na‘e tu‘u kiate kitautolu,
Pea kuo kai ‘e he afi ‘enau hulu.”
21Fai ke mo vālelei mo ‘Ene ‘Afio, pea ke melino;
‘E ha‘u ai ‘a e tu‘umālie kiate koe.
22Tali mu‘a ha fono ‘e tō mei hono fofonga.
Pea ‘ai ‘ene folofola ki ho loto.
23Kapau te ke foki ‘aupito kia Sātai, ‘e toe langa koe;#22.23 Kapau… langa koe; Ko hono faka-Hepeluú ia, ka ‘oku pehē he hiki fuoloa ‘e taha: Kuo pau ke ke foki loto fakatōkilalalo ki he ‘Otuá.
Kapau te ke fakamama‘o ‘a e kovi mei ho tēniti.
24Pea ke ke tuku ‘a e koula-maka ki he efu.
Mo e ‘Ōfela ki he maka ‘o e halanga vai;
25Pea ‘e hoko ‘a Sātai ko ho‘o tu‘unga koula-maka,
Mo ho‘o siliva ngingila.
26Tala atu, te ke toki fiefia ‘ia Sātai,
Pea ke tāngaki hake kia ‘Elohā.
27Te ke lotu kiate ia, pea te ne ongo‘i koe;
Pea te ke fakaai ho‘o ngaahi tukumo‘ui.
28Pea te ke tu‘utu‘uni ha me‘a, pea ‘e tu‘u ma‘a u;
Pea ‘e hopo ‘a e maama ki ho ngaahi ‘alunga.
29Kapau ‘e tōkilalo ha ni‘ihi, pea te ke pehē,
Fai ha hiki hake;#22.29 Fai… hake; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: ‘Oku ai ha hiki hake; pe ‘e pehē ‘a e kupú kakato: ‘Oku fesi ‘e he ‘Otuá ‘a e kakai hīkisiá, ka ne fakahaofi ‘a e kakai anga fakatōkilaló.
Pea ‘e fakamo‘ui ‘e He‘ene ‘Afio ha anga vaivai.
30Te ne fakahaofi ha taha ‘oku ‘ikai tonuhia:#22.30 ‘oku ‘ikai tonuhia; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘oku tonuhiá.
‘Io, ‘e fakahaofi ‘a e toko taha ko ia koe‘uhi ko e ma‘a ho nima.#22.30 ‘Oku ‘ikai ke mahino ‘a e vēsí ni ‘i he faka-Hepeluú.
Currently Selected:
KO SIOPE 22: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
