KO SIOPE 21
21
Ko Siope
1PEA tali ‘a Siope, ‘o ne pehē,
2Mou fanongo mu‘a ki he‘eku lau;
Pea ke hoko ia ko ho‘omou fakalelu kiate au.
3Mou tuku ke u lea foki ‘e au,
Pea ka hili ‘eku lea, fai atu ha‘au taukae.
4Ko e me‘a kiate au, he na‘e kau ‘eku lāunga ki ha tangata?
Pea kapau kuo u kātakingata‘a, ko e hā?
5Tokanga kiate au, pea mou ofo,
‘Oku ngutu mu‘a.
6‘Io, ka u ka manatu ki ai ‘e au ‘oku ou puputu‘u,
Pea ‘oku mo‘utetea hoku kakano.
7Ko e hā ē–‘a e mo‘ui ‘a e kau angahala?
‘Oku nau a‘u atu, ‘oku nau kaukaua foki.
8‘Oku nau fokotu‘u honau hako fakataha mo kinautolu,
‘Oku nau ‘i ai pē,
Pehē mo e makapuna, ‘o nau sio ki ai.
9Ko honau ngaahi fale ‘oku ‘atā mei he manavahē,
Pea ko e sēpita ‘o ‘Elohā ‘oku ‘ikai ke tō kiate kinautolu.
10‘Oku faka‘unoho ‘ene pulu tangata, ‘o ‘ikai hala;
‘Oku fā‘ele ‘ene kau, ‘o ‘ikai tamatō.
11‘Oku nau tuku atu ‘enau tamaiki pau‘u hangē ko e tākanga sipi,
Pea ko ‘enau fānau ‘oku me‘e hopohopo.
12‘Oku nau ha‘aki mai ‘enau hiva
Mo e nafa fāngongo mo e ha‘ape;
Pea ‘oku nau fai ‘enau hākahaka
He ifi ‘a e mimiha.
13Na‘a nau ma‘u honau ‘aho ke ‘osi ‘i he tu‘umālie pē;
Pea nau toki hifo ki Hētesi ko e kemo pē.
14Ka na‘a nau pehē kia ‘Ela, “Hiki meiate kimautolu,
He ko e ‘ilo ki ho ngaahi founga ‘oku ‘ikai te mau manako ki ai.”
15Ko e hā ‘a Sātai ke tau tauhi kiate ia?
Pea ‘aonga ki he hā ha‘atau loto kiate ia?
16Vakai, ‘oku ‘ikai ‘i honau nima ‘a honau monū!
Ke mama‘o meiate au ‘a e fāliunga ‘a e kau angahala!
17Ka kuo tu‘o fiha nai ‘a e tāmate‘i ‘o e maama ‘a e angahala?
Mo e pāfua mai ‘enau tu‘utāmaki?
‘A e tufa ‘inasi ‘e He‘ene ‘Afio ‘i hono houhau?
18‘A ‘enau hoko hangē ko e veve ‘i he ‘ao ‘o e matangi,
Mo e kafukafu ‘oku ‘ave ‘e he afā?
19“‘Oku tuku tauhi koā ‘a e kovi ‘e ‘Elohā ki he fānau ‘a e tangata ko ē?”
‘Ā, na‘a Ne mei fakaai kiate ia pē, ke ne ‘ilo‘i.
20‘Oku totonu ke sio ki he‘ene tu‘utāmaki ‘e hono mata ‘o‘ona,
Pea ke ne inu ‘e ia ‘a e tuputāmaki ‘a Sātai.
21He hono tokanga ia pe ko e hā ‘e hoko ki hono fale hili ‘ene pekia,
Pea kuo tu‘usi ‘a e lau ‘o hono ngaahi māhina?
22‘E lava ke ako poto kia ‘Ela,
‘Osi, ko ia te ne fakamāu‘i ‘a ha‘a mā‘olunga?
23Ko Me‘a ‘oku pekia kei kakato hono mālohi,
Ko e koto tu‘umālie mo nonga:
24‘Oku fonu huhu‘a hono ngaahi kālava,
Pea ‘oku hauhau ‘a e uho ‘o hono ngaahi hui.
25Ka ko Me‘a ‘oku pekia loto mamahi,
Pea kuo te‘eki ke ne kamata ha tu‘umālie.
26‘Oku na tākoto fakataha ‘i he efu,
Pea ‘oku ‘ufi‘ufi kinaua ‘osi pē ‘e he kelemutu.
27‘Ā, ‘oku ou ‘ilo ho‘omou ngaahi fakakaukau;
Mo e ngaahi fifili ‘oku mou ngaohi-ta‘e-hia-‘aki au.
28He ‘oku mou pehē, “Kofa‘ā ‘a e fale ‘o e ‘eiki?
Pea Kofa‘ā ‘a e tēniti,
Ko e fu‘u nofo‘anga ‘o e faikovi?”
29Kuo ‘ikai koā te mou fehu‘i ki he kau takai fonua?
Pea tala‘ehai te mou ta‘etoka‘i ‘a e ngaahi me‘a mamafa ‘oku nau tala.
30Tokua ‘i he ‘aho ‘o e tu‘utāmaki,
‘Oku fakahao ‘a e tangata kovi:
‘I he ‘aho ‘o e tanunu mai ‘a e kovi,
‘Oku fakahā‘ele ange kinautolu.
31Ko hai ‘e fie fakahā ‘a e ‘alunga ‘o ē,
Ka ‘oku ne ‘i ai pē?
Pea ko e me‘a kuo ne fai,
Ko hai ‘e totongi kiate ia?
32Pea ‘oku fakahā‘ele ange ia ki ha fu‘u fa‘itoka,
Pea ‘oku fai ha le‘o ki hono langi.
33‘Oku melie kiate ia ‘a e kelekele ‘o e tele‘a,
He muimui ki he me‘a faka‘eiki ‘a e tangata kotoa,
Pea ko kinautolu ‘e mu‘omu‘a ‘e ta‘emalaua.
34Pea fēfē ai ho‘omou fakalelu ‘eku mamahi ‘aki ha koto muna?
He ka sivi ho‘omou ngaahi tali, ko e me‘a ‘oku toe ko e koto kākā.
Currently Selected:
KO SIOPE 21: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
