KO SIOPE 20
20
Ko Sofa‘a
1PEA tali ‘e Sofa‘a mei Nā‘ama, ‘o ne pehē,
2Fakamolemole, ka ‘oku ue‘i au ‘e he‘eku ngaahi fifili ke u lea;
Pea koe‘uhi foki ‘oku ‘iate au ha loto ongo.
3‘Oku ou ongo‘i hoku ngaohi, mo fakamaa‘i;
Pea ko hoku laumālie ‘oku ‘omi ‘eku tali mei hoku ‘atamai.
4‘Oku ke ‘ilo koā ‘a e me‘a ni, ‘a ia ‘oku talu mei tuai,
‘Io, talu he ‘ai ‘a e tangata ki he funga ‘o māmani?
5Ko e tuē ‘a e angakovi ‘oku nounou,
Pea ko e tolonga ‘o e fiefia ‘a e angahala fufū ko e kemo pē.
6Neongo e a‘u ‘ene fakapupula ki he langi,
Pea pā hono ‘ulu ki he ‘ao;
7Te ne ‘auha ‘o ta‘engata, ‘o hangē ko ‘ene kinoha‘a:
Ko kinautolu na‘e mamata kiate ia te nau pehē, Kofa‘ā ia?
8Hangē ha misi te ne puna ange, ‘o ‘ikai te nau ma‘iloa;
‘Io, ‘oku sese‘e ia hangē ko e vīsone ‘o e pō.
9Ko e mata na‘e sio ‘ofa kiate ia ‘e ‘ikai toe fai;
Pea ‘ikai toe vakai ki ai ‘i hono feitu‘u.
10Ko ‘ene fānau kuo pau te nau fakafiemālie ki he kau masiva,
‘Io, ko ho‘ona nima ‘e fakafoki ‘ene koloa.
11Neongo ‘oku fonu hono hui ‘i he ivi fakatalavou,
Ka te ne tokoto mo ia ‘i he efu.
12Mo‘oni na‘e melie ‘a e kovi ‘i hono ngutu,
Na‘a ne ta‘ofi ia ‘i hono lalo ‘elelo;
13Na‘a ne mamae ki ai, ‘o ‘ikai tuku ke ‘alu hifo,
‘O ne puke ‘i hono loto ‘ao‘ingutu:
14Ka ko ‘ene me‘akai ko ē ‘oku liliu ‘i hono fatu,
Kuo hoko ‘i hono loto ko e kona ‘o e fanga ‘ata.
15Na‘a ne folofua ‘a e koloa, pea ‘oku ne toe lua ‘aki:
‘E fakalua ‘aki ‘e ‘Ela mei hono kete.
16Ko e huhu‘a fakamamahi ‘o e fanga ‘ata na‘a ne misi:
‘E fakapōngia ia ‘e he ‘elelo ‘o e ngata u‘u kona.
17‘E ‘ikai te ne mamata ki he ngaahi vaitaki,#20.17 ngaahi vaitaki; ‘Oku ‘ikai ke mahino ‘a hono faka-Hepeluú, ka ‘oku ngali tonu ‘a hono hiki ‘o: ngaahi vaitafe lolo ‘ōlive.
‘Ani tafenga, ‘ani vaifā ‘o e honi mo e hu‘akau fatu.
18Te ne fakafoki ‘a e me‘a na‘a ne ongosia ai,
‘O ‘ikai te ne folo;
Tatau mo ‘ene koloa ‘a ‘ene fakafoki;
‘E ‘ikai ha‘ane fiefia ai.
19Ko e me‘a ‘i he‘ene tulaki, ‘i he‘ene li‘aki ‘a e masiva,
Ko ia, ka puke ‘e ia ha fale, ‘e ‘ikai te ne lava hano ngaohi.
20Ko e me‘a ‘i he ‘ikai ‘ilo ‘e hono kete ‘a e topono,
Ko ia, ‘e ‘ikai te ne haofaki ia mo ‘ene mata‘ikoloa.
21Na‘e ‘ikai hao ha me‘a mei he‘ene folo,
Ko ia, ‘e ‘ikai tolonga ‘ene tu‘umālie;
22‘I he taulōfu‘u ‘ene mo‘umo‘ua te ne ‘efihia;
‘E fele ki ai ‘a e nima kotoa ‘o e kau mamahi.
23Ko eni ‘a e me‘a ‘e hoko
‘I he‘ene fai ke fakafonu hono kete;
‘E tuku atu ki ai ‘e He‘ene ‘Afio ‘a e kakaha ‘o hono houhau,
‘Io, te ne faka‘uha ia kiate ia lolotonga ‘ene kai.
24Te ne hola nai mei he mahafu ‘aione,
Kae kafo mei he kaufana palasa.
25Ka ta‘aki ia ‘o ‘alu mei hono sino,
Mo e mata ‘o e ngahau mei hono ‘ahu;
‘Oku fakaholo mai kiate ia ha ngaahi ilifia.
26Ko e koto fakapo‘uli ‘oku ta‘ofi ma‘a hono ngaahi mata‘ikoloa:
‘Oku keina ia ‘e ha afi, ‘a ia ‘oku ‘ikai ke ifi ‘e ha tangata;
‘Oku ne anea ‘a e me‘a ‘oku toe ‘i hono tēniti.
27‘E tatala ‘e he langi ‘a e kovi kuo ne fai,
Pea tu‘u hake ‘a māmani ke talatalaaki‘i ia.
28Ko e tupu ‘o hono fale ‘e mole ‘aupito;
Ko e koto tāfea ‘i he ‘aho ‘o hono houhau.
29Ko eni ‘a e tofi‘a meia ‘Elohimi mo‘o e tangata angahala,
Mo e ‘inasi kuo vahe kiate ia meia ‘Ela.
Currently Selected:
KO SIOPE 20: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
