KO SIOPE 19
19
Ko Siope
1PEA tali ‘a Siope, ‘o ne pehē,
2‘E tuku ‘afē ho‘omou fakamamahi‘i hoku laumālie,
‘O laiki au ‘aki ha koto lea?
3Ko e tātu‘ohongofulu eni ho‘omou tuki au;
Koloto ke mou mā ho‘omou fakalielia‘i au.
4Pea kae‘uma‘ā ka ne mo‘oni kuo u hē,
Ko ‘eku hē ‘oku nofo ‘i ho‘oku fale pē.
5Kapau mo‘oni ‘oku mou lea mei ‘olunga kiate au,
‘O fakalielia‘i au ‘aki hoku mā‘anga;
6Mou ‘ilo mu‘a kuo piko‘i ‘e ‘Ela hoku fakamaau,
Pea kuo ne ha‘o au ‘aki hono kupenga.
7Vakai, ‘oku ou ‘ioho, “Ko e fai fakamālohi!”
Ka ‘oku ‘ikai ha tali.
‘Oku ou tangi ki ha taukapo,
Kae ‘ikai ha fakamaau ‘e fai.
8Ko hoku hala ‘oku ne pupunu,
Pea ‘oku ‘ikai te u lava ke laka atu;
Pea kuo ne ‘ai ‘a e po‘uli
Ki he ngaahi hala na‘a ku mei fou ai.
9Kuo ne hu‘i meiate au hoku lāngilangi,
Pea kuo ne ‘ave ‘a e kalauni mei hoku ‘ulu.
10Kuo ne laiki faka‘āufuli au, pea kuo u mole:
Pea kuo ne ta‘aki hangē ha ‘akau ‘eku ‘amanaki.
11‘Oku ne tafunaki foki ‘ene houhau kiate au,
Pea ‘oku ne lau au hangē ha taha ‘o hono ngaahi fili.
12‘Oku fakatahataha mai ‘ene ngaahi kongakau,
Pea nau tanu hanau puke ke tau‘i au,
Pea nau ‘apitanga takatakai ki hoku tēniti.
13Ko hoku ngaahi tokoua kuo ne fakamama‘o meiate au,
Pea ko hoku kau fe‘iloaki ‘oku nau mātu‘aki muli ‘aki au.
14Kuo hala hoku kāinga,
Pea kuo u ngalo meiate kinautolu na‘a nau ‘ilo au.
15Ko e ‘āunofo ‘i hoku fale, mo ‘eku kau kaunanga,
‘Oku nau muli ‘aki au;
Kuo u hoko ko e kehe ‘i he‘enau vakai.
16‘Oku ou ui ki he‘eku tamaio‘eiki;
Ka ‘oku ‘ikai te ne tali,
Ko hoku ngutu ē ‘oku fakakolekole kiate ia.
17Ko ‘eku mānava ‘oku kovi ki hoku uaifi,
Pea kuo u fakalielia ki hoku kaungā uho.
18Ko e tamaiki pau‘u foki ‘oku nau taukae‘i au;
Ka u ka fai ke tu‘u hake, ‘oku nau lau‘i au.
19‘Oku fakalili‘a kiate au ‘a hoku kaume‘a fafale kotoa:
‘Io, ko kinautolu kotoa na‘a ku ‘ofa pehē ki ai,
Kuo nau tafuli meiate au.
20Kuo piki hoku hui ki hoku kili mo kakano,
Pea mālō ‘eku hao mo e kili‘i nifo ni.#19.20 ‘Oku ‘ikai ke mahino ‘a hono faka-Hepelū ‘o e vēsí ni.
21‘Ofa mai, ‘ofa mai, ‘a kimoutolu hoku ngaahi kaume‘a;
He ko e nima ‘o ‘Elohā kuo ala kiate au.
22Ko e hā ‘oku mou fakafe‘ātungia ai au hangē ko ‘Ela?
‘Io, koloto ke mou topono ‘i hoku kakano ni.
23Taumaiā kuo tohi ‘eku ngaahi lea!
Taumaiā kuo ‘ai ki he puka!
24Kuo fai‘aki ‘a e peni ukamea, ‘o fonofono pulu,
‘O tongi ‘i he makatu‘u ‘o ta‘engata!
25He ‘oku ou ‘ilo ‘oku mo‘ui ‘a hoku Koeli,
Pea te ne tu‘u mai ki he funga efu kimui;
26Pea hili hoku kili–hono ‘aunga pehē–
Ka–ko ia ai pē ha kakano–te u mamata kia ‘Elohā:
27‘A ia te u mamata ki ai ‘oku ne kau mo au,
Pea ko ho‘oku ni mata ‘e sio ki ai, ‘o ‘ikai ‘o e kehe.#19.27 ‘o ‘ikai ‘o e kehe; ‘Oku hiki ‘e he ni‘ihi: pea ‘oku ‘ikai te ne muli ‘aki au.
‘Ā, kuo ‘osi‘osi hoku kofuua he holi ki ai!
28He ‘oku mou pehē, Ko e hā ‘a e tangata fakafe‘ātungia mo ‘Ene ‘Afio?
Pea ko e tefito ‘o e me‘a ‘oku ‘iate au.#19.28 Pea ko e tefito… au; pe Te mau fakatanga‘i fēfē ia, he ko e tefito; etc.
29Tokanga kiate kimoutolu telia ‘a e heletā:
He ko e hiamatea ‘a e fa‘ahinga ko ia:
Koe‘uhi ā ke mou ‘ilo ‘oku ai ha fakamaau.
‘Oku hiki kehekehe mo e ngaahi kupu he ko e potu ‘oku fihi.
Currently Selected:
KO SIOPE 19: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
