KO SIOPE 16
16
Ko Siope
1PEA tali ‘a Siope, ‘o ne pehē,
2Kuo u fiu ‘i he fanongo me‘a pehē:
Ko e tu‘unga fakalelu langa‘i mamahi homou kotoa.
3Lau ‘e au kuo ngata ‘a e fai ‘ata‘i lea;
Pea ko e hā nai ‘a e me‘a ‘oku hoka‘i koe ke tali?
4Ko au foki te u lava ke lea hangē ko kimoutolu;
Ka ne fetongi au ‘i heni ‘e hamou toko taha,
‘E faingofua ‘eku fokotu‘u lau kiate kimoutolu,
Mo kalokalo hoku ‘ulu kiate kimoutolu.
5Faingofua ‘eku poupou kimoutolu ‘aki hoku ngutu,
Mo fakalelu ‘aki ‘a e ngāue ‘a hoku loungutu.
6Kapau ‘oku ou lea, ‘oku ‘ikai lelei ai ‘eku mamahi:
Pea kapau ‘oku ou ta‘ofi, tala‘ehai ‘oku mōlia ai ha‘aku me‘a.
7Ka ‘oku mo‘oni kuo u ka‘anga ‘i he fai ‘a ‘Ene ‘Afio:
Kuo ke fakalala hoku ‘api kotoa.
8Pea kuo ke kofu fe‘ufe‘u au–ko e fakamo‘oni ia ‘e taha:
Pea ko hoku tutue ‘oku ou hopo mo au,
‘O mātu‘aki talatalaaki‘i au.#16.8 ‘O… au; ‘Oku ‘ikai ke mahino ‘a hono faka-Hepeluú.
9Ko ‘ene houhau ‘oku hae au, ‘o fai takai:
‘Oku ne ina, ‘o fakangatata hono nifo kiate au.
‘Oku fakamāsila ‘e hoku fili ‘a e hila mai hono mata.
10‘Oku nau fakaava mio‘i honau ngutu kiate au;
‘Oku nau taa‘i pau‘u hoku kou‘ahe:
‘Oku nau kautaha ke ngaohi au.
11‘Oku tukuange au ‘e ‘Ela ki he faka‘otuamate,
‘Oku ne fakapuna au ki he nima ‘o e faikovi.
12Na‘a ku nofo nonga, pea fokifā na‘a ne have‘i au;
‘O ne puke hoku kia, ‘o lulu;
‘Io, na‘a ne fokotu‘u au ko e polo ke ne fana ki ai.
13‘Oku puna mai ‘ene ngaahi ngahau mei he potu kehekehe,
Na‘a ne fana‘i hoku kofuua, ‘o ‘ikai te ne faka‘atu‘i;
Na‘a ne lilingi hoku ‘ahu ki he kelekele.
14‘Oku ne tuki hoku ‘ā ke ava ‘o toe ava;
‘Oku ne ‘ohofi au ‘o hangē ha mafi.
15Ko e tauanga‘a kuo u tuitui ki he funga patu ‘o hoku kili,
Pea kuo u fakalielia‘i hoku tope ‘i he efu.
16Ko hoku mata ‘oku fefulai ‘i he tangi,
Pea ko e ‘ata ‘o mate ‘oku ‘i hoku laumata;
17Neongo ‘oku ‘ikai ha fakamālohi ‘i hoku nima,
Pea ko ‘eku lotu ‘oku ma‘a.
18Kelekele, ‘oua ‘e ‘ufi‘ufi hoku toto,
Pea ke ‘oua na‘a ta‘ofi ‘a e ongo ‘o ‘eku tangi!
19Na‘a mo eni, vakai, ‘oku ‘i langi ha‘aku fakamo‘oni,#Siope 19.25
‘Io, ‘oku ‘i Taukakapa ha Taha ‘oku tu‘u ma‘aku.
20Lolotonga ‘oku ‘iuvī mai hoku ngaahi kaume‘a:
‘Oku ou lingi lo‘imata kia ‘Elohā;
21Ke ne tala tonuhia ki ha tangata kuo hopo mo ‘Elohā,
Pe ki si‘a tupu tangata ‘oku fai mo hono kaume‘a!
22He ko e ngaahi ta‘u faka‘osi ‘ena ‘oku ha‘u,
Pea u foua ‘a e hala ‘oku ‘ikai ha foki mei ai.
Currently Selected:
KO SIOPE 16: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
