KO SIOPE 15
15
Ko e Tālanga Hono Uá
(15.1–21.34)
Ko ‘Elifasi
1PEA na‘e tali ‘e ‘Elifasi mei Tīmani, ‘o pehē,
2He ko e anga ‘o e poto ke ‘a‘au ha ‘ata‘i ‘ilo,
Pea ke fakafonu hono kete ‘i he matangi hahake?
3Ke fakakikihi ‘aki ‘a e ngaahi lea ‘oku ‘ikai sia‘a,
Mo e ngaahi malanga ‘oku ‘ikai hano ‘aonga?
4Kae‘uma‘ā ‘oku ke fakaka‘anga ‘a e lotu,
Pea ke fakasi‘isi‘i ki he‘ete fie hū ki he ‘ao ‘o ‘Ela.
5Seuke, ‘oku fakamatala ho‘o kovi ‘e ho ngutu ‘o‘ou,
Neongo ho‘o fie fai‘aki ‘a e ‘elelo ‘o e fiemu‘a.
6‘Oku fakahalaia‘i koe ‘e ho ngutu ‘o‘ou, ‘o ‘ikai ko au;
‘Io, ko ho‘ou loungutu na ‘oku fakamo‘oni ki ho‘o kovi.
7Ko e ‘uluaki tangata koā koe na‘e fanau‘i?
Pe na‘e fā‘ele‘i koe ki mu‘a atu ‘i he ngaahi mā‘olunga?
8Na‘a ke ‘i he kāpineti ‘a ‘Ela koā, ‘o fanongo?
Pe ne ke fakatae ‘a e poto ma‘a u?
9Ko e hā ‘a e me‘a kuo ke ‘ilo ki ai kuo te‘eki ke mau ‘ilo?
Ha me‘a ‘oku mahino kiate koe, ka ‘oku ‘ikai ‘iate kimautolu foki?
10Ko e fotufotu hinā mo e sialea ‘oku fakatou ‘iate kimautolu,
Motu‘a ange noa ‘i ho‘o tamai.
11‘O ‘ikai koā te ke āfeitaulalo ki he ngaahi lea ‘ofa ‘a ‘Ela?
Mo e lea momole ‘oku fai atu?
12Ko e hā ‘oku ‘oho pehē ai ho loto?
Pea ko e hā ‘oku teteka ai ho mata?
13‘Ā, ‘oku ke mio‘i ho‘o mānava ke fana kia ‘Ela,
Pea ‘oku ke pu‘aki mei ho ngutu ha koto lau.
14Ko e hā ‘a e tangata me‘a vaivai ke ne ma‘a?#Siope 25.4-6
Mo e me‘a fanau‘i ‘e he fefine ke ne mā‘oni‘oni?
15Vakai, na‘a mo Hono holonga tapu,
Ka ‘oku ‘ikai ke falala ki ai ‘a ‘Ene ‘Afio;
Pea na‘a mo e ngaahi langi,
Ka ‘oku ‘ikai ma‘a ‘i he‘ene fofonga ki ai.
16Kae huanoa ‘a e me‘a fakalielia mo pua‘a,
‘A e tangata ‘oku inu kovi hangē ko e inu vai.
17Te u hīnoi‘i koe, fanongo kiate au;
Pea ko e me‘a kuo u mamata ki ai te u ‘a‘au;
18‘A e me‘a na‘e fakahā ‘e he kau poto,
‘O ‘ikai te nau fufū ‘a e me‘a na‘e tuku fakaholo mei he‘enau ngaahi kui.
19Ko e fa‘ahinga na‘e ma‘u fakapalataha ‘a e fonua,
‘O ‘ikai ha muli ‘e ‘alu ‘i honau loto fonua.
20Ko e faikovi ‘oku ne fakamamahi‘i ia ‘e ia ‘i he ‘aho kotoa pē,
‘Io, lolotonga kuo te‘eki ‘osi ‘a e ngaahi ta‘u kuo tuku tauhi ki he tūlano.#15.20 tūlano; pe nimamālohi.
21‘Oku ne ongo‘i ma‘u ‘a e mumuhu ‘ani me‘a fakailifia;
Lolotonga ‘a e tu‘umālie, ‘oku a‘u mai ‘a e tama faka‘auha;
22‘Oku ‘ikai ha‘ane falala ki ha foki mei he po‘uli na,
Ka ko e toko taha ia ‘oku lama ke tui‘i ‘aki ‘a e heletā.
23Ko e toko taha ia ‘oku hē holo ko e kumi me‘akai–
“‘E ma‘u mei fē?”#15.23 Ko e toko taha ia… mei fē? Ko hono faka-Hepeluú ia, ka ‘oku pehē ‘i he hiki fuoloa ‘e taha: ‘Oku nofo‘aki tali ‘a e fanga fesifesihui [vultures] ke kai hono ‘anga‘angá. –
‘Oku ne ‘ilo kuo tu‘utu‘uni ofi mai ‘a e ‘aho fakapo‘uli.
24‘Oku fakailifia‘i ia ‘e he fakamamahi mo e tu‘utāmaki;
‘Oku na puke ia hangē ha tu‘i kuo ‘osi teu ke ha‘o:
25Koe‘uhi ā na‘a ne mafao atu hono nima kia ‘Ela,
Mo ne luki kia Sātai;
26Na‘a ne ‘ohofi ‘a e ‘Afio kuo fakamaneke hono kia,
Kuo fakamatolu ‘a e fakakaho ‘o hono ngaahi pā.
27Koe‘uhi ā na‘a ne ‘ufi‘ufi hono mata ‘aki ‘a e ngako,
Pea ne ‘ai ke nge‘enge‘e hono kongaloto,
28Pea ne nofo‘ia ‘a e ngaahi kolo lala,
Ko e ngaahi fale ‘e ‘ikai fie nofo ai ha taha,
Kuo tu‘utu‘uni ke tu‘unga ‘oto‘ota.
29‘E ‘ikai te ne koloa‘ia, pea ‘e ‘ikai ma‘u hono nima,
Pea ‘e ‘ikai mafesifesi va‘a ‘a e me‘a ‘oku nau lava.#15.29 Pea ‘e ‘ikai… lava. ‘Oku ‘ikai ke mahino ‘a hono faka-Hepeluú, ka ‘oku pehē ‘i he hiki fuoloa ‘e taha: Na‘a mo hono ‘atá ‘e puli.
30‘E ‘ikai te ne hiki mei he po‘uli;
‘E fakamae hono ngaahi muka ‘e he afi,
Pea te ne hiki ‘i he hō ‘a ‘Ene ‘Afio.#15.30 Pea te ne hiki… ‘Afió; ‘Oku pehē ‘i he faka-Hepeluú: ‘Oku puhi‘i atu hono ngutú ‘e he matangí; ka ko e hiki fuoloa ‘e taha ‘oku pehē: ‘Oku puhi‘i atu hono fisí ‘ei he matangí.
31Ke ‘oua te ne falala ki he muna–
Ko ‘ene mūnoa ia–
He te ne ma‘u ‘a e muna ma‘ane totongi.
32Te‘eki ‘osi hono ‘aho ‘e fakaai,#15.32 fakaai; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: mae.
Pea ko ‘ene muka‘i paame
‘Oku ‘ikai kei mata.
33Te ne maumau hono fua kei moto hangē ko e vaine,
Pea lieliaki hono fisi hangē ko e ‘ōlive.
34Pea ko e ‘api ‘o e mālualoi ‘e lala,
Pea ‘e keina ‘e he afi ‘a e ‘ū tēniti ‘o e tuku pa‘anga fufū.
35Kuo nau feitama ‘i he fakamamahi,
‘O nau fā‘ele‘i ‘a e kovi,
Pea ko honau kete ‘onautolu
‘Oku teu ai ‘a e tūkia‘anga.
Currently Selected:
KO SIOPE 15: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
