KO SIOPE 14
14
1KO E tangata kuo fanau‘i ‘e he fefine
‘Oku fuonounou ‘ene mo‘ui, pea ‘oku fonu ‘i he mamahi;
2‘Oku ne tupu hake pea tu‘usi, hangē ha fisi‘i ‘akau;
‘Oku ne mole hangē ha ‘ata, pea ‘oku ‘ikai ‘aupito ha‘ane tu‘u ma‘u.
3Pea ‘oku ke hila‘i koā ha taha pehē,
‘O taki au ke hopo ‘i he fakamaau mo koe?
4Koloto ke tupu ha ma‘a mei he ta‘ema‘a;
Ka ‘oku ‘ikai ha taha!
5Kapau kuo ‘osi fua ‘a e taimi ‘o e tangata,
Kapau ‘oku fe‘ao mo koe ‘a e lau ‘o hono ngaahi māhina;
Kapau kuo ke ‘ai hono ngaahi ango, pea tapu ‘ene laka ange:
6Pe‘i hanga kehe meiate ia, ‘o tuku ai pē,#14.6 ‘o tuku ai pē; Ko hono faka-Hepelū ia ‘i he tohi ‘e taha, ka ‘oku pehē ‘i hono toé: koe‘uhí ka nau mālōlō.
Kae‘oua ke ne faka‘osi hono taimi hangē ha ngāue nō.#14.6 Kae‘oua… noó; pe tuku ai pē ke ne ma‘u ha ki‘i fiemālie ‘i he funga ‘o si‘ene mo‘ui faingata‘a‘iá-‘o kapau te ne lava.
7He ‘oku ai ha ‘amanaki ki he ‘akau,
Kapau ‘e tā, ‘e toe huli hake,
Pea ‘e ‘ikai tuku ‘ene muka;
8Neongo ‘oku motu‘a hono aka ‘i he kelekele,
Pea mate hono sino ‘i he efu,
9Ka ‘i he nanamu mai ha vai te ne huli hake,
‘O to‘ulu hangē ha ‘akau mui.
10Ka ‘oka pekia ha to‘a, ‘oku ne toka ai pē:
‘Io, ka hokotaki ha tangata pea Kofa‘ā ia?
11Hangē ko e mole ‘a e vai mei he anovai,
Mo e maha ‘a e vaitafe, ‘o pakukā:
12Pehē ‘oku toka ‘a e tangata ‘o ‘ikai toetu‘u;
Fai atu ki he mole ‘a e ngaahi langi ‘oku ‘ikai te nau toe ‘ā,
‘Io, ‘e ‘ikai fafangu kinautolu mei he‘enau mohe.
13Taumaiā ke ke fa‘o au ‘i Hētesi!
‘O ke fufū au kae‘oua ke lolou ho‘o houhau na!
‘O ke tu‘utu‘uni haku taimi, pea toki manatu mai!
14Ka pekia ha tangata, te ne toe mo‘ui koā?
‘Ā, te u lava noa ke tatali ke ‘osi hoku fatongia tau;
Kae‘oua ke a‘u mai hoku liliu;
15Te ke toki ui, pea te u tali atu ‘e au:
‘E kāvea ho finangalo ki he fita‘a ‘a ho nima.
16Ka ko eni ‘oku ke lau ‘eku fo‘i taulaka:
‘Ikai ‘oku ke lama ha‘aku laka vale?
17Ko ‘eku angahala kuo sila‘i ‘i ha tangai,
‘Io, ‘oku ke kake‘i ‘eku kovi.
18Kae vakai, na‘a mo e fu‘u mo‘unga na ‘oku tolia hifo,
Pea ko e makatu‘u ‘oku hiki mei hono potu;
19Ko e ngaahi maka na ‘oku momo ‘e he vai;
Pea ko ‘ene fa‘a mahua ‘oku ‘auhia ai ‘a e funga fonua:
Pehē ‘oku ke fakaka‘anga ‘a e ‘amanaki ‘a e tangata me‘a vaivai.
20‘Oku ke ha‘aki ia, ‘o talu ai pē, pea ‘oku ne ‘alu.
‘Oku ke fulihi hono mata, ‘o li‘aki atu.
21Ka hākeaki‘i ‘ene fānau, ‘oku ‘ikai te ne ‘ilo;
Pea ka fakamo‘ulaloa‘i, ‘oku ‘ikai te ne tokanga‘i.
22Ma‘ana pē ‘a e ongo‘i mamahi ‘e hono sino:
Ma‘ana pē ‘a e to‘e ‘a hono laumālie.
Currently Selected:
KO SIOPE 14: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
