KO SIOPE 13
13
1SEUKE, kuo sio ‘e hoku mata ki he ngaahi me‘a ni kotoa,
Kuo fanongo ‘e hoku telinga, ‘o ma‘u.
2Hangē ko ho‘omou ‘ilo, ‘oku pehē mo ‘eku ‘ilo ‘a‘aku:
‘Oku ‘ikai te u lalo‘aoa ‘iate kimoutolu.
3Ka ko au eni te u lea kia Sātai;
‘Io, ‘oku ou holi ke ma veipā mo ‘Ela.
4Ka ko kimoutolu ko e fa‘ahinga ‘oku feau ‘aki ‘a e loi,
Ko e kau fuavai nge‘esi kimoutolu kotoa.
5Taumaiā ke mou longo ‘aupito!
Te mou toki ngali poto ai.
6Fanongo mu‘a ki he‘eku fakamo‘oni ma‘aku;
‘Io, tokanga ki he ngaahi tali ‘e tō mei hoku ngutu.
7Te mou lea hala koā ma‘a ‘Ela?
‘Io, te mou lea kākā ma‘a ‘Ene ‘Afio?
8Te mou lango koā ki he ‘Afio?
Te mou hoko koā ko e taukapo ‘o ‘Ela?
9‘E lelei koā ‘oka ne ka sivi kimoutolu?
Te mou hele kiate ia hangē ko ho‘omou hele ki ha tangata?
10‘E lahi ha tautea te ne hilifaki atu,
‘O kapau te mou fai fakakauvaka.
11‘Ikai na‘a mou mei ilifia ki hono mā‘olunga?
‘O tō hono ngeia kiate kimoutolu?
12Ko ho‘omou lau fakaono‘aho ko e koto palōvepi efu pē;
Ko ho‘omou ngaahi puke na kuo hoko koni puke ‘umea.
13Longo, ‘oua ‘e lea mai; ka u lea ‘e au:
Pea ka hoko ha me‘a kiate au ko ia ai pē.
14Neongo pe ko e hā ‘e iku ki ai,
Ko au te u fa‘opuku hoku kakano,
‘O ‘alu mo au ‘eku mo‘ui ‘i hoku nima.#13.14 ‘O ‘alu mo… nima; Ko hono faka-Hepeluú ia, ka ‘oku pehē he hiki fuoloa ‘e taha: Ko ‘eku ‘alu mo au ‘eku mo‘uí … koe‘uma‘aki?
15Vakai, te ne tāmate‘i au#13.15 Vakai… au; ‘Oku toe hiki: Neongo ‘ene tāmate‘i au, te u tatali ki ai. ‘oku ou tatali ki ai
Kaekehe ke u fakamatala ‘i hono ‘ao hoku ngaahi ‘alunga.
16Pea ko e me‘a ko ia foki ‘e kau mōku taukapo‘i:
He tala‘ehai ‘e fie a‘u ki he ‘ao ‘o e ‘Afiona ha mālualoi.
17Mou fanongo mu‘a ki he‘eku lea,
Pea ke hū ‘eku fakamatala ki homou telinga.
18Vakai ā, kuo u hokohoko lelei ‘eku ngaahi me‘a:
‘Oku ou ‘ilo te u hā tonuhia.
19Ko hai tū ‘e hopo mo au?
Ka ne ai ha taha, te u toki longo, ‘o hokotaki.
20Ka ko e me‘a pē ‘e ua ke ‘oua ‘e fai ‘e he ‘Afiona kiate au;
Ka lava ia, pea ‘e ‘ikai te u fufū au mei ho Fōtunga:
21To‘o ‘aupito ho nima meiate au;
Pea ke ‘oua na‘a fakailifia‘i au ‘e ho ngeia.
22Ka pehē, pea ke lea koe, ka u tali;
Pe te u lea ‘e au, kae sivi ‘e he ‘Afiona.
23Kuo fiha nai ‘eku faikovi, mo ‘eku ngaahi hala?
Faka‘ilo mai ‘eku pau‘u mo ‘eku angahala.
24Ko e hā ‘oku hanga kehe ai ‘a e ‘Afiona,
Mo ke lau au ko ho fili?
25Ko ho‘o tuli taupusia koā ha lou‘akau ‘oku vilingia?
‘Io, te ke fakapaua ha momo‘i veve?
26He ‘oku ke tu‘u ‘i ho‘o tohi ha ngaahi me‘a kona ke hoko kiate au,
Pea ‘oku ke ngaohi au ke u ‘ea ki he ngaahi kovi ‘o ‘eku talavou.
27‘Oku ke ‘ai foki hoku va‘e ki he ‘akau kii‘i,#Siope 33.11
Pea ‘oku ke lama hoku ngaahi ‘alunga kotoa;
Seuke, kuo ke laine fakangatangata hoku ‘aofiva‘e:
28‘Osi, ko e me‘a popo au ‘oku ‘aunga,
Hangē ko e kofu kuo kai ‘e he ane.
Currently Selected:
KO SIOPE 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
