KO SIOPE 12
12
Ko Siope
1TOKI tali ‘a Siope, ‘o ne pehē,
2Ta ko ia! ko māmani pē kimoutolu!
Pea ka mou ka pekia, ko hono ngata ia ‘o e poto.
3Ko au foki ‘oku ai hoku loto hangē ko kimoutolu;
Tala‘ehai kuo u lalo‘aoa ‘iate kimoutolu:
Seuke, ko hai ‘oku ‘ikai ‘ilo ‘a e ngaahi me‘a pehē!
4Kuo u hoko koā ko e luma‘anga ki hoku kaume‘a?
‘A au ko e taha na‘e tautapa kia ‘Elohā, ‘o ne tali?
‘A e faitotonu, ‘a e haohaoa–ko e luma‘anga!
5Ko e hoa ‘o e tu‘utāmaki ‘i he fakakaukau ‘a e tu‘umālie ko e kakae;
‘Oku tokonaki ‘e honau loto ke fai kiate kinautolu kuo kamata tāsipa.
6Nonga pē ‘a e ngaahi tēniti ‘o e kaiha‘akau,
Nofo noa ‘a e kakai ‘oku luki kia ‘Ela;
Ha taha ‘oku ‘alu mo ia ‘a hono ‘Elohā ‘i hono nima.
7‘Ā, fehu‘i mu‘a ki he fanga manu, pea te nau ako koe;
Pea ki he manupuna ‘o e ‘atā, pea te nau fakahā atu:
8Tokanga ki he kelekele, pea te ne ako‘i koe;
‘Io, ‘e ‘a‘au atu ‘e he ika ‘o e tahi.
9Ko hai ‘oku ‘ikai ‘ilo ‘i he ngaahi me‘a ni kotoa,
Ko e nima ‘o Sihova kuo ne fai ‘a e ngaahi me‘a ni?
10‘A ‘Ene ‘Afio ‘oku ‘i hono nima ‘a e mo‘ui ‘a e me‘a mo‘ui kotoa,
Mo e laumālie ‘o e tangata fua pē.
11‘O ‘ikai koā sivi ‘e ha telinga ‘a e me‘a ‘oku tala,
‘O hangē ‘oku kamata ma‘aku ‘e he ‘ao‘ingutu ‘a e me‘akai?
12‘E ma‘u nai ha poto mei he fa‘ahinga ‘oku hinā,
Pea ko e mo‘ui fuoloa ‘oku fakatupu ‘ilo.
13Ka ‘oku fe‘ao mo e ‘Afio ‘a e poto mo e mafai;
Ko e fakakaukau mo e ‘ilo ko ‘Ene me‘a ia.
14Vakai, ‘oku Ne holoki, pea ‘ikai toe langa;
Ka loki ‘e ia ha taha, ‘e ‘ikai ha fakaava.
15Vakai, ‘oku ne ta‘ofi ‘a e vai, pea mātu‘u ia;
Pea ‘oku ne tukuange, ‘o nau ta‘aki ‘a e fonua.
16‘Oku fe‘ao mo Ia ‘a e ivi mo e matelie;
Ko e hē mo e fakahē ‘oku fakatou ‘a‘ana.
17‘Oku ne to‘o ‘a e pulupulu ‘o e kau fale‘i, ‘o taki pōpula;
‘O ne ngaohi ‘a e kau fakamaau ke hā ko e vale.
18‘Oku ne vete ‘a e ha‘i ‘a e ngaahi tu‘i,
Pea ne ‘ai ha‘i ki he kongaloto ‘onautolu.
19‘Oku ne to‘o ‘a e pulupulu ‘o e kau taula‘eiki, ‘o taki pōpula;
Pea ‘oku ne ha‘aki ‘a e kau mafi.
20Ko e kau falala‘anga, fokifā ‘oku ne to‘o ‘enau mafai ke lea,
‘O ne fa‘ao mei he mātu‘a ‘enau ‘ilo‘ilo.
21‘Oku ne hua‘i ki hou‘eiki ‘a e manukia,
‘O ne fakahomo ‘a e no‘o ‘o ha‘a kaukaua.
22‘Oku ne fakae‘a misiteli mei he po‘uli,
‘O ne ‘omi ki he maama ‘a e ‘ata-‘o-mate.
23‘Oku ne hākeaki‘i ha kakai, ‘o toe faka‘auha;
‘Oku ne fakamafola ha kakai, ‘o toki taki pōpula.
24‘Oku ne ‘ave ‘a e loto ‘o e kau tāimu‘a ‘o e fonua,
‘O ne ngaohi ke nau hē fano ‘i he lala ‘oku ‘ikai hano hala.
25‘Oku nau tautaufā ‘i he po‘uli ta‘eha maama,
‘Io, ‘oku ne ngaohi ke nau tāsipa hangē ha konā.
Currently Selected:
KO SIOPE 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
