KO SIOPE 11
11
Ko Sofa‘a
1TOKI fokotu‘u mai ‘e Sofa‘a mei Naama, ‘o ne pehē,
2‘E tuku ta‘etali koā ha fu‘ufu‘unga lea pehē?
Pe tuku leva kuo tonuhia ha puha lau?
3‘E fakanoa kakai ‘e ho‘o ngaahi muna na?
‘O ke lava ai ke manuki ta‘efakamaa‘i ‘e ha taha?
4He ‘oku ke pehē, ‘Oku ma‘a ‘eku tokāteline,
Pea ‘oku ou ‘ata‘atā ‘i ho‘o ‘afio mai.
5Kae taumaiā ke fai ‘e ‘Elohā ha‘ane folofola,
‘O fa‘ai hono fofonga ke tali koe!
6‘O ne tala kiate koe ‘a e ngaahi ‘uhinga fufū ‘o e poto–
He ko ‘ene fakakaukau ko e kato ‘i he loto kato–
Ka ke ‘ilo ‘oku fakangalo‘i ‘e ‘Elohā ha‘a kovi ni‘ihi.
7Te ke mahakulea ‘a e uho ‘o ‘Elohā?
‘Io, ‘e a‘u ho‘o hakule ki he takele ‘o Sātai?
8‘Oku hangē ko e ngaahi tumutumu ‘o langi, ko e hā te ke fai?
‘Oku taumama‘o hifo ‘i Hētesi, ko e hā te ke ‘ilo?
9Ko hono fua ‘oku lōloa ange ‘i māmani,
Pea laulahi ange ‘i he ‘ōseni.
10Kapau te ne moulu mai, ‘o puke ha taha,
Kapau te ne ‘ave ki he fakamaau, pe matali Ia ‘e hai?
11He ko e ‘Afio ‘oku ne ‘ilo ‘a e ha‘a nge‘esi:
Pea ‘oku e‘a kiate ia ‘a e kovi ta‘e te ne fakasio.
12Ka ko e tangata ‘oku nge‘esi te ne ma‘u loto
‘Oka fokifā kuo tangata mai ha ‘uhiki‘i ‘asi kaivao.
13Neongo ko koe, kapau te ke fakahangatonu ho loto,
Pea fola nima ki He‘ene ‘Afio–
14Kapau ‘oku ai ha kovi ‘i ho nima, lī ke mama‘o,
‘O ‘oua ‘e tuku ha mamio ke nofo ‘i ho tēniti–
15Ka pehē te ke mālanga hake ta‘eha mele;
Pea kuo ke haukafa, ‘o ‘ikai toe manavahē.
16Seuke, ‘e ngalo ‘iate koe ho‘o mamahi:
Ko ho‘o manatu ki ai ‘e hangē ko ho‘o manatu ki he vai kuo mole:
17Pea ‘e hoko ha taimi ‘e maama ange ‘i he ho‘atā:
Ka ai ha po‘uli, ko e po‘uli pē kae ‘aho.
18Pea te ke nofo nonga, he ‘oku ai ha tu‘amelie;
‘Io, te ke vakai holo, ‘o tokoto noa.
19Pea te ke mālōlō, ‘o ‘ikai fakahoha‘a ‘e ha taha;
Pea ‘e ‘omi holo kiate koe ‘e ha tokolahi.
20Ka ko e mata ‘o e pau‘u ‘e ka‘anga ‘i he holi,
Pea ‘e ‘auha meiate kinautolu honau hūfanga,
Pea ko ‘enau ‘amanaki ko e tau‘aki pē ke pekia.
Currently Selected:
KO SIOPE 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
