KO SIOPE 10
10
1‘OKU fiu hoku laumālie ‘i he‘eku mo‘ui;
Te u laku atu ‘eku lāunga:
Te u lea ‘i he mamahi hoku laumālie.
2Te u fakatau folofola kia ‘Elohā,
‘Oua ‘e lau au ko e angahala:
Faka‘ilo mai pe ko e hā ‘oku ke fakakikihi ai mo au.
3‘Oku lelei kiate koe ke fai fakamālohi?
Ke va‘inga‘aki ‘a e me‘a na‘e ongosia ho nima na hono ngaohi,
Ka ke hāngai malimali mai ki he tu‘utu‘uni ‘a e kakai kovi?
4‘Oku fakakakano pē ho ongo fo‘i fofonga?
Pe ‘oku hangē ko e sio ‘a e tangata me‘a vaivai ‘a ho‘o sio?
5‘Oku tatau ho ngaahi ‘aho mo e ‘aho ‘o e me‘a vaivai ni?
Pe tatau ho ngaahi ta‘u mo e taimi ‘o e tangata?
6‘A ē ‘oku ke ‘eke ai ki ha‘aku kovi,
Mo fakatotolo ki ha‘aku angahala,
7‘Osi, ‘oku ke ‘ilo ‘oku ‘ikai ko e angahala au;
Pea ‘oku ‘ikai ha taha te ne ala fakahaofi mei ho nima.
8Ko ho nima na na‘e fakafuofua mo ngaohi au,
Hoko kotoa, ‘o takatakai:
Pea ko eni#10.8 Pea ko eni; ‘Oku ‘ikai tu‘u eni he faka-Hepeluú, kae ngata pē ‘i he Hoko… takatakai. ‘Oku tu‘u ‘a e Pea ko eni ‘i he ngaahi hiki fuoloa ‘e ni‘ihi. kuo ke faka‘auha!
9Manatu mu‘a, kuo ke ngaohi au hangē ko e ‘umea:#10.9 hangē ko e ‘umea; Ko hono faka-Hepeluú ia, ka ‘oku pehē he hiki fuoloa ‘e taha: ‘aki ‘a e ‘umea.
Pea te ke fakafoki au ke u efu.
10‘Ikai na‘a ke lingi au hangē ko e hu‘akau,
‘O ke fakafatu au hangē ko e ngaohi ‘o e siisi?
11Ko e kili mo e kakano kuo fakakofu ‘aki au ‘e he ‘Afiona,
Mo lalanga au ‘aki ‘a e hui mo e uoua.
12Ko ho‘o ngāue ma‘aku ko e mo‘ui mo e ‘ofa,
Pea ko ho‘o ‘a‘ahi tu‘u mai ‘oku matauhi ai ‘eku manava.
13Tā ko eni pē ‘a e me‘a na‘a ke longo mo koe;
‘Oku ou ‘ilo na‘e pehē ho‘o sio:
14Kapau te u angahala te ke tauhi ia,
‘O ‘ikai te ke tuku ke u hao mei ha‘aku kovi.
15Ka ai ha‘ate pau‘u, hoto fakapō!
Pea neongo ha‘ate faitotonu, tala‘ehai te u mahiki hoku ‘ulu,
Ko e ongo‘i ‘eku mā, mo e sio ki he‘eku kovi.#10.15 mo e sio… kovi; Ko hono faka-Hepeluú ia, ka ‘oku ngali tonu ‘a hono hiki ‘o: mo ‘eku mātu‘aki matahoa.
16‘Io, ka ne mahiki, te ke tuli au hangē ha laione fekai,
‘O toe fakahā ‘iate au ho ivi fakaofo na.
17Te ke ‘omi ai pē ha kau fakamo‘oni fo‘ou kiate au,
‘O fakalahi ho‘o lili kiate au;
‘O tautaufetongi ‘a e tau ‘e fai mo au.
18Pea ko e hā ē, na‘a ke ‘omi au mei he mānava?
Pehē na‘a ku mate ta‘esio kiate au ha taha.
19Na‘a ku tatau mo e te‘eki ke u mo‘ui;
Na‘e fata au mei he mānava ki he fa‘itoka.
20‘Ikai ‘oku si‘i hoku taimi? Ma‘u ā mu‘a,
Hanga kehe meiate au ke u ki‘i mānava hake,
21Te‘eki ke u ‘alu ke ‘oua ‘e foki,
Ki he fonua ‘o e Po‘uli mo e ‘Ata-‘o-mate:
22Ko e fonua po‘uli lōlō, ko e po‘uli;
Ko e ‘ata ‘o e mate, ‘o koto maveuveu,
Pea ko hono maama ko e po‘uli ‘atā.
Currently Selected:
KO SIOPE 10: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
