Sioné 15
15
Ko e Vaine Mo‘oní ‘a Sīsū
1Ko au ko e uaine mo‘onia, pea ko ‘eku Tamai ko e tauhi ngoue ia. 2‘Ilonga ha va‘a ‘iate au ‘oku ‘ikai fua, ‘oku ne motuhi ia: pea ‘ilonga ha va‘a ‘oku fua, ‘oku ne ‘auhani ia, ke ‘āsili ‘ene fua. 3Kuo mou tafe sino‘ivai ‘eni kimoutolu, ko e me‘a ‘i he lea kuo u fai kiate kimoutolu. 4‘Ē, ‘ai ke mou nofo ma‘u ‘iate au, mo au ‘iate kimoutolu. Hangē ‘oku ‘ikai ke fa‘a fua ‘a e va‘a ‘iate ia pē, ‘o kapau ‘e ‘ikai nofo ma‘u ‘i he vaine; pehē foki, ‘e ‘ikai te mou lava ‘e kimoutolu, ‘o kapau ‘e ‘ikai te mou nofo ma‘u ‘iate au.
5Ko au pē ko e vaine, ko kimoutolu ko e ngaahi va‘a: ko ia ‘oku nofo ma‘u ‘iate au, mo au ‘iate ‘ia, ‘oku fua lahi ‘a e toko taha ko ia: he ka māvae mo au, ‘oku ‘ikai te mou fa‘a fai ha me‘a. 6Ka ai ha taha ne ‘ikai nofo ma‘u ‘iate au, ne li‘aki atu hangē ko e va‘a na, pea ne mae; pea ‘oku nau tānaki ‘a e ngaahi me‘a pehē, ‘o laku ki he afi, pea ‘oku vela. 7Kapau te mou nofo ma‘u ‘iate au, pea kapau ‘e nofo ma‘u ‘eku ngaahi lea ‘iate kimoutolu, pea neongo pe ko e hā te mou loto ki ai, mou kole, pea ‘e fai kiate kimoutolu. 8Ko e me‘a ko ia kuo fakalāngilangi‘i ai ‘a ‘eku Tamai, koe‘uhi ke iku ki ho‘omou fua lahi, mo ho‘omou mātu‘aki hoko ko e kau ako ‘a‘aku. 9Hangē ko e ‘ofa‘i au ‘e he Tamai, kuo pehē ‘eku ‘ofa‘i kimoutolu: mo u nofo ma‘u ‘i he ‘ofa ko ia ‘a‘aku. 10Kapau te mou tauhi ‘eku ngaahi tu‘utu‘uni, te mou nofo ma‘u ‘i he‘eku ‘ofa; ‘o hangē foki kuo u tauhi ‘e au ‘a e ngaahi tu‘utu‘uni ‘a e Tamai, pea u nofo ma‘u ‘i he ‘ofa ‘a‘ana.
11Ko e ngaahi me‘a ni kuo u tala atu, koe‘uhi ke ‘iate kimoutolu ‘eku fiefia, pea ke kakato ‘a e fiefia ‘amoutolu. 12Ko eni ia ‘a e tu‘utu‘uni ‘a‘aku, Ke mou fe‘ofa‘aki, ‘o hangē ko e ‘ofa ne u fai kiate kimoutolu.#Sioné 13.34; 15.17; 1 Sione 3.23; 2 Sione 5 13Tala‘ehai ‘oku ai ha ‘ofa ‘a ha taha ‘e lahi ‘i he ‘ofa ko ē, ke ne li‘aki ‘ene mo‘ui koe‘uhi ko hono ngaahi kaume‘a. 14Ko hoku ngaahi kaume‘a ‘a kimoutolu ‘o kapau ‘oku mou fai ‘a e ngaahi me‘a ‘oku ou tu‘utu‘uni atu. 15‘Oku ‘ikai te u kei lau kimoutolu ko e kau tamaio‘eiki; he tala‘ehai ‘oku ‘ilo ‘e he tamaio‘eiki ‘a e me‘a ‘oku fai ‘e he‘ene ‘eiki: ka kuo u ui kimoutolu ko hoku ngaahi kaume‘a; koe‘uhi ‘ilonga ha me‘a ne u fanongo mei he‘eku Tamai kuo u faka‘ilo kiate kimoutolu. 16Na‘e ‘ikai ko kimoutolu na‘e fili au, ka ko au na‘a ku fili kimoutolu, pea na‘a ku fakanofo kimoutolu, ke mou ‘alu kimoutolu ‘o fua, pea ke nofo ma‘u homou fua; koe‘uhiā ke ‘ilonga ha me‘a te mou kole mei he Tamai ‘i hoku hingoa ke ne ‘atu ia. 17Ko e ngaahi me‘a ko eni kuo u tu‘utu‘uni atu, koe‘uhi ke mou fe‘ofa‘aki.
Ko e Tāufehi‘a ‘a Māmani
18Kapau ‘oku fehi‘a ‘a māmani kiate kimoutolu, manatu na‘e mu‘a noa pē ‘ene fehi‘a kiate au ‘iate kimoutolu. 19Ka ne ‘o māmani ‘a kimoutolu, pehē ‘e ‘ofa ‘a māmani ki he me‘a ‘a‘ana: ka ko e me‘a ‘i he ‘ikai ‘o māmani ‘a kimoutolu kae, kehe, ko e fili kimoutolu ‘e au mei māmani, ko hono ‘uhinga ē ‘oku fehi‘a ai ‘a māmani kiate kimoutolu. 20Manatu he lea na‘a ku fai kiate kimoutolu, ‘Oku ‘ikai ha tamaio‘eiki ‘e lahi ‘i he‘ene ‘eiki. Kapau kuo nau fakatanga‘i au, te nau fakatanga‘i ‘a kimoutolu foki; kapau kuo nau tauhi ‘a e lea ‘a‘aku, te nau tauhi ‘a e lea ‘amoutolu foki.#Māt 10.24; Luk 6.40; Sioné 13.16 21Ka ko e ngaahi me‘a ko ia kotoa te nau fai kiate kimoutolu koe‘uhi ko hoku hingoa, koe‘uhi ‘oku ‘ikai te nau ‘ilo ‘a ia na‘a ne fekau mai au. 22Ka ne ‘ikai te u ha‘u ‘o lea kiate kinautolu, pehē ne ‘ikai ha‘anau angahala: ka ko eni ‘oku ‘ikai ha kofu ki he‘enau angahala. 23Ko ia ‘oku ne fehi‘a kiate au, ‘oku ne fehi‘a ki he‘eku Tamai foki. 24Ka ne ‘ikai te u fai ‘i honau lotolotonga ‘a e ngaahi ngāue ‘a ia ‘oku te‘eki ke fai ‘e ha taha, pehē ne ‘ikai ha‘anau angahala: ka ko eni kuo nau mamata pea kuo nau fehi‘a kiate au mo ‘eku Tamai fakatou‘osi. 25Ka koe‘uhiā pē ke fakamo‘oni ki he lea kuo tohi ‘i he‘enau lao, Na‘a nau fehi‘a kiate au tu‘unga‘a pē.#Saame 35.19; 69.4
26‘Oka hoko mai ‘a e Taukapo, ‘a ia te u fekau atu ‘e au mei he Tamai, ‘io, ko e Laumālie ‘o e Mo‘oni, ‘a ia ‘oku ne ‘alu atu mei he Tamai, te ne fakamatala ‘e he toko taha ko ia kiate au; 27pea ko e kau fai fakamatala foki ‘a kimoutolu, koe‘uhi kuo mou ‘iate au mei he kamata‘anga.
Currently Selected:
Sioné 15: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.